ޓައިވާނުގެ އައްސޭރިފަށަށް އައި ބިންހެލުމަކާއެކު ސުނާމީގެ އިންޒާރު ދީފި
18 ސެޕްޓެމްބަރު 2022 | އާދީއްތަ 07:38ހޮނިހިރު ދުވަހުވެސް ޓައިވާނުގެ ދެކުނު އިރުމަތީ ސަރަޙައްދަކަށް 6.4 މެގްނިޓިއުޑްގެ ބިންހެލުމެއް އައިސްފައިވޭ
ރިޕޯޓުތައް ބުނާ ގޮތުން ބިންހެލުން އައިސްފައިވަނީ ޓައިވާންގެ އައްސޭރިފަށުގެ ސަރަޙައްދަކަށް
ޓައިވާނުގެ އައްސޭރިފަށަށް އައި ބާރުގަދަ ބިންހެލުމަކާއެކު ސުނާމީގެ އިންޒާރު ދީފިއެވެ.
ރިޕޯޓުތައް ބުނާ ގޮތުން ބިންހެލުން އައިސްފައިވަނީ ޓައިވާންގެ އައްސޭރިފަށުގެ ސަރަޙައްދަކަށެވެ. އެއީ 7.2 މެގްނިޓިއުޑްގެ ބާރުގަދަ ބިންހެލުމެއްކަމަށް ރިޕޯޓުތައް ބުނެއެވެ.
ޓައިވާނުގެ ނޫސްތަކާ ޙަވާލާދީ ބައިނަލްއަޤްވާމީ ނޫސްތަކުން ރިޕޯޓުކުރާ ގޮތުގައި މި ބިންހެލުމާއި ގުޅިގެން އެ ސަރަޙައްދުގައި އޮންނަ ޖަޕާނުގެ މިޔަކޮޖިމާ އައިލެންޑްސްއަަށް މިހާރު ވަނީ ސުނާމީގެ އިންޒާރު ދީފައެވެ.
ހޮނިހިރު ދުވަހު ވެސް ޓައިވާނުގެ ދެކުނު އިރުމަތީ ސަރަޙައްދަކަށް 6.4 މެގްނިޓިއުޑްގެ ބިންހެލުމެއް އައިސްފައިވެއެވެ.
ޓައިވާނުގެ އައްސޭރިފަށުގެ ސަރަޙައްދަށް ދޭތެރެ ދޭތެރެއިން ބިންހެލުން އާދެއެވެ. ސަބަބަކީ އެ ސަރަޙައްދަކީ ކަނޑުއަޑީގެ ދެ ޓެކްޓޯނިކް ޕްލޭޓް ގުޅިފައިވާ ދިމާލުގައި އޮންނަ ސަރަޙައްދަކަށްވާތީއެވެ. އެ ސަރަޙައްދަށް ބިންހެލުންތައް އައިކަމުގައިވީނަމަވެސް، ސުނާމީގެ އިންޒާރު ނެރެނީ 7.0 ގެ މެގްނިޓިއުޑަށްވުރެ ބިންހެލުމުގެ ބާރުގަދަވުމުންނެވެ.
