މެއި 6 ޙަމަލާއާ ގުޅިގެން ހައްޔަރުކުރި ޔާސީނަށް ކުރާ ދައުވާއާ ގުޅިގެން ޝަރީއަތުގެ ކުރީގެ ހުށަހެޅުންތައް ހުށަހަޅައިފި

މެއި 6 ޙަމަލާއާ ގުޅިގެން ހައްޔަރުކުރި ޙަސަން ޔާސީންގެ މައްޗަށް ކުރާ ދައުވާއާ ގުޅިގެން ޝަރީއަތުގެ ކުރީގެ ހުށަހެޅުންތައް ހުށަހަޅައިފިއެވެ.

މި މައްސަލައިގައި ދައުލަތުން ދައުވާކުރަނީ ޙަސަން ޔާސީންގެ މައްޗަށެވެ. އޭނާގެ މައްޗަށް ކުރަނީ ޓެރަރިސްޓް ޖަމާއަތަކަށް ތާއީދުކުރާ ފަދަ ލިއުމެއް ނުވަތަ ކުރެހުމެއް ނުވަތަ ފޮޓޯއެއް ގެންގުޅުމުގެ ކުށުގެ ދައުވާއެވެ. އޭނާގެ މައްޗަށް މި ދައުވާ ކުރަނީ އޭނާގެ ފޯނުން ފެނިފައިވާ ފޮޓޯތަކާއި ވީޑިއޯތަކާއި ގުޅިގެންނެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ޙަސަން ސައީދެވެ.

މި މައްސަލައިގައި އާދިއްތަ ދުވަހުގެ އަޑުއެހުމުގައި އޮތީ ޝަރީއަތުގެ ކުރީގެ ހުށަހެޅުންތަކުގެ ބައެވެ. އެގޮތުން ދިފާއުން 4 ހުށަހެޅުމެއް ހުށަހަޅާފައިވާއިރު، ދައުލަތުން ވަނީ އެ ހުށަހެޅުންތަކަށް ރައްދު ދީފައެވެ.

ދިފާއުގެ ފުރަތަމަ ހުށަހެޅުމަކީ މި މައްސަލައިގައި ކޮށްފައިވާ ދައުވާއާއި ގުޅިގެން ތަހުގީގުގައި ސުވާލު ކޮށްފައިނުވާ ކަމަށެވެ. އެގޮތުން އޭނާ ހައްޔަރުކޮށްފައިވަނީ 6 މެއި 2021 ގައި ރައީސް ނަޝީދަށް ދިން ޙަމަލާއާ ގުޅިގެންކަމަށްވާއިރު، އޭނާ ބަންދުކޮށްފައިވަނީ ވެސް، އަދި ތަހުގީގުގައި ބަޔާން ނެގިފައިވަނީ ވެސް އެ ތުހުމަތާއި ގުޅިގެންކަމަށް ދިފާއުން ބުނެއެވެ.

އެކަމާ ގުޅިގެން ދައުލަތުގެ ވަކީލު ވިދާޅުވީ، އޭނާ ހައްޔަރުކުރިއިރު އޭނާގެ މައްޗަށް ކޮށްފައިވާ ތުހުމަތުތަކަށް ބަލާއިރު، ދީނީ ގޮތުން ހައްދުފަހަނަ އަޅާފައިވާ ފިކުރު ފެތުރުމާއި، ދީނީ އެއްބައިވަންތަކަން ނަގާލުމަށް މަސައްކަތް ކުރުމުގެ އިތުރުން، ޖިހާދަށް މީހުން ފޮނުވުމަށް މަސައްކަތް ކުރުމާއި، ޓެރަރިޒަމްގެ ޙަމަލާތައް ރޭވުމުގެ ތުހުމަތުތައް ހިމެނޭ ކަމަށެވެ. އަދި މި މައްސަލައިގެ ތަހުގީގު ފުޅާވެގެން ދިޔަވަރަކަށް ހެކި ހޯދުމަށްފަހު އެކަންކަމާއި ގުޅިގެން ސުވާލު ކޮށްފައިވާކަން ދައުލަތުން ހުށަހެޅި ލިޔެކިއުންތަކުން އެނގޭނެކަމަށް ދައުލަތުގެ ވަކީލު ވިދާޅުވިއެވެ.

ދެވަނަ ހުށަހެޅުމެއްގެ ގޮތުން ދިފާއުން ހުށަހެޅީ، ޖިނާއީ އިޖުރާއަތުގެ ޤާނޫނުގެ 119 ވަނަ މާއްދާގެ ދަށުން ވަކި ހެކިތަކެއް ޝަރީއަތަށް ބަލައިނުގަތުމަށް އެދި ހުށަހެޅި ހުށަހެޅުމެކެވެ. ދިފާއުން ބުނާ ގޮތުގައި އެތަކެއްޗަކީ އޭނާގެ ފޯނުން ޑިލިޓް ކޮށްފައިހުރި ތަކެއްޗެވެ.

އެކަމާ ގުޅޭގޮތުން ދައުލަތުގެ ވަކީލު ވިދާޅުވީ، އެނާގެ ސެމްސަންގ ފޯނު ތަހުލީލުކޮށް ތަހުގީގީ އިދާރާއިން ތައްޔާރުކޮށްފައިވާ މޯބައިލް ފޮރެންސިކް ރިޕޯޓަށް ބަލާއިރު، ދައުލަތުގެ ދައުވާއާ ގުޅޭ ކަންކަން ސާބިތުކޮށްދެވޭނެއެވެ. އެގޮތުން އޭނާގެ ފޯނުގައި ހަރުކަށި ފިކުރާއި ގުޅޭ ފޮޓޯއާއި ވީޑިއޯ ހުރިކަން ދައުލަތުން ފާހަގަ ކުރެއެވެ.

ދައުލަތުގެ ވަކީލު ވިދާޅުވީ އޭނާގެ މައްޗަށް މި ދައުވާކޮށްފައިވަނީ އޭނާގެ ފޯނުން ފެނުނު ލިއުންތަކެއްގެ ސަބަބުން ނޫން ކަމަށާއި، މި ދައުވާކޮށްފައިވަނީ އޭނާގެ ފޯނުން ފެނުނު ހަރުކަށި ފިކުރާއި ގުޅޭ ފޮޓޯއާއި ވީޑިއޯގެ ސަބަބުން ކަމަށެވެ.

ތިންވަނަ ހުށަހެޅުމެއްގެ ގޮތުގައި ދިފާއުން ހުށަހެޅީ މި މައްސަލައިގައި ހުށަހަޅާފައިވާ ހެކިތަކާއި ދައުވާއާ ގުޅޭގޮތް ސާފުނުވާތީ، ދިފާއުވުމަށް ހެކި ހުށަހެޅުމުގެ ފުރުސަތު ގެއްލުނުކަން ބަޔާންކޮށް ހުށަހެޅި ހުށައެޅުމެކެވެ. ހަތަރުވަނަ ހުށަހެޅުމަކީ މި މައްސަލައިގައި ދައުލަތުން ކިތާބީ ހެކި ހާމަކޮށްފައިވާ ގޮތުން، މި މައްސަލައިގެ ދައުވާއިން ދިފާއުވުމުގެ ފުރުސަތު ގެއްލޭގޮތަށް މަގުފަހިވެގެން ގޮސްފައިވާކަމަށް ބުނެ ހުށަހެޅި ހުށަހެޅުމެކެވެ.

އެކަމަށް ރައްދު ދެއްވައި ދައުލަތުގެ ވަކީލު ވިދާޅުވީ، ދައުވާލިބޭ ފަރާތަށް މި މައްސަލައިގެ ދިފާއީ ހެކި ހުށައަޅަން 8 މަސް ދުވަހުގެ ފުރުސަތެއް ލިބިގެން ގޮސްފައިވާ ކަމަށާއި، އެހެން ނަމަވެސް ދިފާއުން މަސައްކަތް ކޮށްފައިވަނީ މި މައްސަލައިގެ ދައުވާއާ ނުގުޅޭ ވާހަކަތަކެއް ދެއްކުމަށް ކަމަށެވެ. ލިއެކިއުންތައް ދިރާސާކޮށް، ދިފާއީ ހެކި ހުށަހަޅަން އެކަށީގެންވާ ފުރުސަތު ދެވުނުކަމަށްވެސް ދައުލަތުގެ ވަކީލު ވިދާޅުވިއެވެ.

ދެން ކުރިއަށް ދިޔައީ ދައުލަތުގެ ޝަރީއަތުގެ ކުރީގެ ހުށަހެޅުންތައް ހުށަހެޅުމެވެ. އެގޮތުން ދައުލަތުން ހުށަހަޅާފައިވަނީ މި މައްސަލައިގެ ހެކި ރައްކާތެރި ކުރުމާއި ގުޅޭ ހުށަހެޅުމެކެވެ.

ދެން އޮންނަ އަޑުއެހުމެއްގައި އޮންނާނީ މި މައްސަލައިގެ ޝަރީއަތުގެ ކުރީގެ ހުށަހެޅުންތަކަށް ގޮތް ނިންމުމެވެ. އެ އަޑުއެހުން އޮންނާނީ 13 އޮކްޓޯބަރު 2022 ގައެވެ.