އުދުހޭ ސައިކަލު: "ހީވީ ސްޓަރ ވޯޒް ގެ ދުނިޔެ ޙަޤީޤަތަކަށް ވީ ހެން"

ދުނިޔޭގެ ތާރީޚުގައިވެސް ފުރަތަމަ ފަހަރަށް އުފެއްދި "އުދުހޭ ސައިކަލު"، އެމެރިކާގެ ޑެޓްރޮއިޓް އޮޓޯ ޝޯގައި ދައްކާލާ، އެތައް ބަޔަކު އާޝޯޚް ކުރުވައިފިއެވެ.

ޖަޕާނުގެ ޒުވާން ކުންފުންޏެއް ކަމަށް ވާ އެއަރވިންސް ޓެކްނޮލޮޖީޒްއިން އުފެއްދި 'އެކްސްޓުރިސްމޯ' ހޯވަރބައިކްއަކީ، 40 މިނެޓް ވަންދެން އުދުހުމުގެ ޤާބިލުކަން ލިބިފައިވާ ސައިކަލެކެވެ. 'އެކްސްޓުރިސްމޯ' އަކީ، ގަޑިއަކު 62 މޭލު ބާރު މިނުގައި ދުއްވާލެވޭ ސައިކަލެއްވެސްމެއެވެ.

'އެކްސްޓުރިސްމޯ' ގައި އުދުހިލުމުގެ ފުރަތަމަ ތަޖުރިބާ ލިބުނު މީހުންގެ ތެރޭގައި ޑެޓްރޮއިޓް އޮޓޯ ޝޯގެ ކޯ-ޗެއަރ ތެޑް ޒޮޓް ހިމެނެއެވެ.

ތަޖުރިބާ ހިއްސާ ކުރަމުން ޒޮޓް ބުނީ، ހީވީ ޅަ އުމުރުގެ ދުވަސްތަކަށް އެނބުރި ދެވުނު ހެން ކަމަށާ، ގައިން ހީބިހި ނަގައިގެން ދިޔަ ކަމަށެވެ.

އެއަރވިންސް ޓެކްނޮލޮޖީޒްގެ ބާނީ އަދި ސީއީއޯ، ޝޫހެއި ކޮމަޓްސޫ ބުނި ގޮތުގައި އެއަރވިންސް ޓެކްނޮލޮޖީޒްގެ އެންމެ ފުރަތަމަ މަސައްކަތަކަށް ވީ ޑްރޯންއާއި އިންސާނަކާ ނުލާ އުދުހުމުގެ ޤާބިލުކަން ލިބިފައިވާ އުދުހޭ އުޅަނދުފަހަރު އުފެއްދުން ކަމަށެވެ.

އުދުހޭ ސައިކަލަކީ މިހާރުވެސް ޖަޕާނުން ގަންނަން ލިބެން ހުރި ސައިކަލެކެވެ. ކޮމަޓްސޫ ބުނީ، އޭނާގެ އަމާޒު މިހާރު ހުރީ، 'އެކްސްޓުރިސްމޯ'ގެ ކުޑަ، އުދުހޭ ސައިކަލެއް، 2023 ވަނަ އަހަރުގެ ތެރޭގައި އެމެރިކާގައި ވިއްކަން ފެށުމަށެވެ.

'އެކްސްޓުރިސްމޯ'ގެ އެމެރިކާ މޮޑެލްގެ އަގަކީ 777000 ޑޮލަރު ކަމަށް އަންދާޒާ ކުރެވެއެވެ. 2025 ވަނަ އަހަރު އަންނައިރު، 'އެކްސްޓުރިސްމޯ'ގެ ކުޑަ، އިލެކްޓްރިކް މޮޑެލްއެއް އުފައްދާ، އެ ސައިކަލުގެ އަގު، 50000 ޑޮލަރަށް ތިރި ކުރުމަށް އޭނާގެ ކުންފުނިން އުއްމީދު ކުރާ ކަމަށްވެސް ކޮމަޓްސޫ ވަނީ ބުނެފައެވެ.

އެއަރވިންސް ޓެކްނޮލޮޖީޒްއިން މިހާރު އަމާޒު ހިފާފައި ވަނީ، ނޮވެމްބަރު މަހުގެ ތެރޭގައި، ހިއްސާގެ ބާޒާރުގައި މުއާމަލާތްތައް ފެށުމަށެވެ.