"އަމިއްލަ ގެދޮރަށް ގެންދާނަމޭ ބުނާނެ ކޮންމެ ދުވަހަކު... އެކަމަކު، ވާ ކަމެއް ނޯވޭ"

އަމިއްލަ ބިމެއްގައި ދިރިއުޅެމުން ދަނިކޮށް، ގޮށްމުށުގެ ބާރުން ވެރިކަން ހިންގާ ބަޔަކު އެތަނަކަށް ވެރިވަގުތުމުން އެ ކުރެވޭ އިހުސާސަކީ އެފަދަ ތަޖުރިބާއެއް ކުރި މީހަކަށް ނޫނީ ޚިޔާލަށްވެސް ގެނެވޭނެވަރުގެ ކަމެއް ނޫނެވެ. އިޒްރޭލުގެ ޔަހޫދީންގެ ނުފޫޒުން ފަލަސްތީނުގެ ބިންތައް ފޭރެމުން ދާ ދިއުމާ ދެކޮޅަށް ދުނިޔޭގެ އެކި ކަންކޮޅުތަކުން އަޑު އުފުލަމުން ދާއިރު، ޔަހޫދީންގެ އެ ޖަރީމާގެ ހަގީގީ ވޭން ސިފަވެގެންދަނީ، ފަލަސްތީނުގެ ފަންނުވެރިންގެ މަސައްކަތުންނޭ ދެންނެވުމަކުން ދޮގަކަށް ނުވާނެއެވެ.

ފަލަސްތީނަށް އުފަން ކުރެހުންތެރިއެއް ކަމަށްވާ މުހައްމަދު އަލް-ކުރުންޒް ނިސްބަތްވަނީ، 1948 ވަނަ އަހަރު މެދުއިރުމަތީގައި ކުރި ހަނގުރާމައިގެ ތެރޭގައި އަމިއްލަ ވަޒަން ދޫކޮށް ދިއުމަށް މަޖުބޫރިވި އާއިލާއަކަށެވެ.

ދުނިޔޭގައި މިވަގުތު އޮތް އަނގަމަތިހާ، އެންމެ ބޮޑު ޖަލުގެ ގޮތުގައި ސިފަކުރާ ޣައްޒާގެ ބުރައިޖު ރެފިއުޖީ ކޭމްޕުގައި ދިރިއުޅުމުގެ ދުވަސްތައް ގުނަމުންދާ މުހައްމަދު ދަނީ، އަމިއްލަ ވަޒަނުގައި ރެފިއުޖީންނަށް ވެފައިވާ މީހުންގެ ތަކުލީފުތަކުގެ އަޑުތައް، ކުރެހުމުގެ ޒަރީއާއިން އިއްވައިދެމުންނެވެ.

މީގެ ކުރިންވެސް ދޭސީ އަދި އަރަބި ގެލަރީތަކުގައި އޭނާގެ ކުރެހުންތައް ދައްކާލާފައިވާ މުހައްމަދު ބުނިގޮތުގައި، އޭނާ މިކަން ކުރުމުގެ މައިގަނޑު މަގުސަދަކީ، އެތައް ޒަމާނެއް ވަންދެން އިންތިހާ ތަކުލީފާ ވޭން އުފުލަމުންދާ މީހުންގެ ހައްގުގައި ވަކާލާތުކޮށްދިނުން ކަމަށެވެ. ރެފިއުޖީ ކޭމްޕުގައި ދުވަސްތައް ގުނަމުންދާ މުހައްމަދުގެ އާއިލާއަކީ ޣައްޒާއާ 30 ކިލޯމީޓަރު ދުރުގައި އޮންނަ ފަލޫޖާއަށް ނިސްބަތްވާ އާއިލާއެކެވެ.

އުރުދުންއާއި ލުބްނާން އަދި ސޫރިޔާގެ އިތުރުން އިޒްރޭލުން ވެރިވެގެންފައިވާ ހުޅަނގު އައްސޭރިއާއި ޣައްޒާގައި މިވަގުތު ދިރިއުޅެމުންދާ ފަލަސްތީނު ރެފިއުޖީންގެ އަދަދު 5.6 މިލިއަނަށް އަރައެވެ. އޭގެތެރޭގައި ގިނައީ ބިންތައް ފޭރެމުންދާ އިޒްރޭލާ ހެދި އަމިއްލަ ގެދޮރު ގެއްލުނު އާއިލާތަކަށް ނިސްބަތްވާ މީހުންނެވެ.

ފަލަސްތީނުގެ ފޮރިން މިނިސްޓްރީން މައުލޫމާތު ދޭގޮތުގައި، ދަފުތަރުކޮށްފައިވާ ރެފިއުޖީންގެ ތެރެއިން ގާތްގަނޑަކަށް ދެބައިކުޅަ އެއްބައި މީހުން ނިސްބަތްވާ ދަޢުލަތެއް ނުވަތަ ގައުމެއް ނެތެވެ. އެތައް ބަޔަކު ދިރިއުޅެމުން ދަނީ ތޮއްޖެހިފައިވާ ރެފިއުޖީ ކޭމްޕުތަކުގައެވެ.