"ގެފުޅަށް ޒިޔާރަތްކޮށްލުމުގެ ފުރުޞަތު، މި މަންމައަށް ހޯދާދިނީ، ތި ދަރިފުޅު ފުރާނައިން ވި ޤުރުބާނީ"

ފަލަސްޠީނަށް ނިސްބަތްވާ އަލްމަޚާޠާ މަޚުރީފާއަކީ ސަޢުދީ އަރަބިއްޔާގެ ރަސްގެފާނު، ސަލްމާން ބިން ޢަބްދުޢަޒީޒު ދެއްވާ ހިލޭ ޙައްޖު ދަތުރުތަކުގެ ތެރެއިން ފުރުޞަތު ލިބިފައިވާ މުސްލިމު އުޚުތެކެވެ.

2006 ވަނަ އަހަރު ޣައްޒާގައި ކުރި ހަނގުރާމައިގެ ތެރޭގައި، އަލްމަޚާޠާގެ ފިރިހެން ދަރިފުޅު ވަނީ މަރާލާފައެވެ. އޭގެ ފަހުން ފާއިތުވީ 17 އަހަރު ދުވަސް، އަލްމަޚާޠާ ހޭދަ ކުރީ، ޙައްޖުގެ މަތިވެރިކަން އަޅުކަން އަދާ ކުރުމަށް މައްކާއަށް ދެވޭނެ ދުވަހެއްގެ އިންތިޒާރުގައެވެ.

ޔަހޫދީ އިޒްރޭލުން ފަލަސްޠީނުގެ ރައްޔިތުންނަށް ދެމުންދާ އަނިޔާތަކުގެ ޝިކާރައަކަށް ވެފައިވާ މީހުންނަށް ނުވަތަ ހަމަނުޖެހުންތަކުގެ އަސަރު ފޯރާފައިވާ މީހުންގެ ތެރެއިން ބަޔަކަށް، އެއްވެސް ފީ އެއް ދެއްކުމަކާ ނުލާ ޙައްޖުގެ އަޅުކަން އަދާ ކުރުމުގެ ފުރުޞަތު، ސަލްމާން ރަސްގެފާނު ހޯއްދަވާ ދެއްވައެވެ. ސަލްމާން ރަސްގެފާނު އެކަން އެގޮތަށް ކުރައްވަމުން ގެންދަވާތާ 10 ވަރަކަށް އަހަރަށް ވުރެ ގިނަ ދުވަސް ވެފައި ވާ އިރު، ކޮންމެ އަހަރަކުވެސް ފަލަސްޠީނުން 1000 މީހަކަށް އެ ފުރުޞަތު ދެއްވައެވެ.

ދުނިޔޭގެ އެކިކަންކޮޅުތަކަށް ފެތުރިފައިވާ މުސްލިމު ޙަޟާރަތުން ޙައްޖުގެ އަޅުކަމަށް ކުރާ ޑިމާންޑާއެކު، ފަލަސްޠީނުގެ ރައްޔިތުން، ހައްޖުގެ އަޅުކަން އަދާ ކުރުމުގެ ނިޔަތުގައި މައްކާއަށް ދިއުމަށް އެތައް އަހަރެއް ވަންދެން އިންތިޒާރު ކުރެއެވެ.

ފަލަސްޠީނުގެ އޮފިޝަލުން ވިދާޅުވާ ގޮތުގައި ޙައްޖުވުމުގެ ފުރުޞަތު ލިބޭ މީހުން ހޮވަނީ، ހުޅަނގު އައްސޭރި، ޣައްޒާ އަދި ޤުދުސްއިން އެއް ހަމައެއްގައެވެ.

ފަލަސްޠީނުގެ ރައްޔިތުން ދެކޭ ގޮތުގައި ސަޢުދީ އަރަބިއްޔާއިން ތަނަވަސްކޮށްދޭ މި ފުރުޞަތަކީ، ފަލަސްޠީނު ރައްޔިތުންގެ އަގު ވަޒަން ކުރާ ކަމުގެ ރަމްޒެކެވެ.

މުޅި ދުނިޔެ އިނދަޖައްސާލި ކޮވިޑް-19ގެ ބަލިމަޑުކަމާ ގުޅިގެން އެޅި ހަރުކަށި ހުރިހާ ފިޔަވަޅެއް އުވާލުމަށްފަހު މުސްލިމުންނާ ބައްދަލުކުރާ ފުރަތަމަ ޙައްޖު ދުވަހަށް ސަޢުދީއިން ދަނީ ވީ އެންމެ ފުރިހަމައަކަށް ތައްޔާރު ވަމުންނެވެ. 1444 ވަނަ އަހަރުގެ ޙައްޖުގެ އަޅުކަމުގައި 2.6 މިލިއަނެއްހާ މުސްލިމުން ބައިވެރިވާ ކަމަށް މަޢުލޫމާތު ލިބެއެވެ. މިއަހަރުގެ ޙައްޖު ދުވަސް ނުވަތަ އަރަފާތު ދުވަހަކީ ޖޫން 27 ވާ އަންގާރަ ދުވަހެވެ.