ނޫމަޑި މައްސަލައިގައި ދޮގު ބަޔާނެއް ދެއްވާފައިވާތީ, ކުރީގެ ހައުސިންގ މިނިސްޓަރ އަދި މިހާރުގެ މާލެ ސިޓީގެ މޭޔަރ ޑރ. މުހައްމަދު މުއިއްޒުގެ މައްޗަށް އުފުލާފައިވާ ދައުވާގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށްގެންގޮސްފިއެވެ.

މި އަޑުއެހުމުގައި އޮތީ، ދިފާއުން ހުށަހަޅާފައިވާ ޝަރީއަތުގެ ކުރީގެ ހުށަހެޅުންތަކަށް ގޮތެއް ނިންމުމެވެ. ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ސޮފްވަތު ހަބީބެވެ.

މި މައްސަލައިގައި ޝަރީއަތުގެ ކުރީގެ ހުށަހެޅުންތަކުގެ ގޮތުގައި ދިފާއުން 4 ހުށަހެޅުމެއް ވަނީ ހުށަހަޅާފައެވެ. އޭގެތެރޭގައި; ހާދިސާ ހިނގި ތަން ދައުލަތުން ދައުވާގައި ބަޔާންކޮށްފައި ނުވާކަމަށް ބުނެ ހުށަހަޅާފައިވާ ނުކުތާ ހިމެނޭއިރު، ދައުލަތުން އެ ނުކުތާއަށް މީގެ ކުރިން ބޭއްވި އަޑުއެހުމެއްގައި ރައްދުވެސް ދީފައިވެއެވެ.

ދައުލަތުން ބުނާ ގޮތުގައި މުއިއްޒު ދޮގު ބަޔާން ދެއްވީ ނެދަލެންޑްސްގެ ދި ހޭގްގައި ހުންނަ ޕަރމަނަންޓް ކޯޓް އޮފް އާބިޓްރޭޝަންގައެވެ. ގާޒީ ވިދާޅުވީ، މުއިއްޒުގެ މައްޗަށް ކޮށްފައިވާ ދައުވާގައި އޭނާއާމެދު ބޭއިންސާފުވާފަދަ ހާލަތެއް، އެގޮތުން ބަލާއިރު ނެތްކަމަށެވެ. ވުމާއެކު، މުއިއްޒުގެ އެ ހުށަހެޅުން ޝަރީއަތުން ބަލައިގެންފައެއްނުވެއެވެ.

މުއިއްޒުއާ ދެކޮޅަށް 5 ޝަފަހީ ހެކިން ހުށައަޅާފައިވާއިރު، އޭގެ ތެރެއިން 3 މީހުންގެ ހެކިބަހަކީ ޝަރީއަތަށް ބަލައިނުގަނެވޭ ހެކިތަކެއްކަމަށް ކަނޑައެޅުއްވުމަށްވެސް މުއިއްޒު ވަނީ އެދިވަޑައިގެންފައެވެ. ނަމަވެސް އެ ހެކިންގެ ހެކިބަސް ބަލައިގަންނަން ނުޖެހޭ ވަރުގެ ޝަރުއީ އަދި ގާނޫނީ ސަބަބެއް ދެއްކިފައިނުވާކަމަށް ގާޒީ ވިދާޅުވިއެވެ.

ދައުލަތުން ހުށަހަޅާފައިވާ އިކޮނޮމިކް އެންޑް ޔޫތު ކައުންސިލްގެ 2015 ވަނަ އަހަރުގެ ބައްދަލުވުމެއްގެ ޔައުމިއްޔާ، ހެކީގެގޮތުގައި ބަލައިނުގަތުމަށްވެސް މުއިއްޒު ހުށަހަޅުއްވާފައިވެއެވެ. އެއީ ޅ. ދިއްފުށިމާދޫ، ސަރުކާރުގެ ބޭނުމަށް ނެގުމުގެ މަޝްވަރާގައި މުއިއްޒު ބައިވެރިވެވަޑައިގެންފައިވާކަން ސާބިތުކުރުމަށް ދައުލަތުން ހުށަހަޅާފައިވާ ކިތާބީ ހެތްކެކެވެ. އެ ހުށަހެޅުންވެސް ޝަރީއަތަށް ބަލައިގެންފައެއްނުވެއެވެ.

މައިގަނޑުގޮތެއްގައި މުއިއްޒުގެ ފަރާތުން ހުށަހަޅާފައިވާ ޝަރީއަތުގެ ކުރީގެ ހުރިހާ ހުށައެޅުންތަކެއްވެސް ގާޒީ ސޮފްވަތު ހަބީބު ވަނީ ބަލައިނުގެންނެވުމަށް ނިންމަވާފައެވެ.

މި އަޑުއެހުމުގައި ދައުލަތުގެ ވަކީލު ވަނީ، ދައުލަތުގެ ޝަފަހީ ހެކިންނަކީ ކޮބައިކަން ބަޔާންކޮށްފައެވެ. އެގޮތުން 5 ޝަފަހީ ހެތްކެއް ދައުލަތުން ވަނީ ހުށަހަޅާފައެވެ. އަދި ގިނަ ކިތާބީ ހެކިތަކެއްވެސް ހުށަހަޅާފައިވެއެވެ.

ދިފާއުން ވަނީ، ދިފާއީ ހެކި ހުށަހެޅުމަށް އިތުރު ވަގުތު ބޭނުންވާކަން ފާހަގަކޮށްފައެވެ. ވުމާއެކު، މައްސަލަ ބައްލަވާ ގާޒީ ވަނީ 10 ދުވަހުގެ މުއްދަތެއް ދެއްވާފައެވެ.