ރައީސް އިނގިރޭސިވިލާތަށް ކުރައްވާ ދަތުރުފުޅަށް މިލިއަނެއްވެސް ޚަރަދެއްނުވާނެ: މިއުވާން
ރާނީގެ ޖަނާޒާ ބާއްވަން ހަމަޖެހިފައިވަނީ މި މަހުގެ 19 ވަނަ ދުވަހު
ރައީސުލްޖުމްހޫރިއްޔާ، ރަސްމީ ދަތުރުފުޅެއްގައި ފުރާވަޑައިގަތުން
އިނގިރޭސިވިލާތުގެ ރާނީ އެލިޒަބަތުގެ 2 އަވަހާރަވުމާ ގުޅިގެން، ޖަނާޒާގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އެ ގައުމަށް ކުރައްވާ ދަތުރުފުޅަށް މިލިއަނެއްހާ ރުފިޔާވެސް ހޭދަނުވާނެކަމަށް ސަރުކާރުން މިއަދު ބުނެފިއެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުުވުމުގައި، ދިޔަރެސް ނޫހުން، ރައީސްގެ ދަތުރުފުޅަށް 2 މިލިއަން ރުފިޔާ ޚަރަދުކުރާނެކަމަށް ބުނެފައިވާތީ، އެކަމާގުޅޭގޮތުން ނޫސްވެރިއަކު ވަނީ ސުވާލުކޮށްފައެވެ. އެ ސުވާލަށް ޖަވާބުދެއްވަމުން ތަރުޖަމާނު މިއުވާން މުޙައްމަދު ވިދާޅުވީ، ރައީސް އިނގިރޭސިވިލާތަށް ކުރައްވާ ދަތުރުފުޅަށް 2 މިލިއަން ރުފިޔާ ޚަރަދުވާކަމަށް ބުނެފައިވާ ވާހަކައަކީ ހަގީގަތެއް ނޫންކަމަށެވެ. ރައީސް އިނގިރޭސިވިލާތަށް ވަޑައިގަންނަވާނީ ހުކުރު ދުވަހުއެވެ.
މިއުވާން އިތުރަށް ވިދާޅުވީ، ރާނީ އެލިޒަބަތުގެ ޖަނާޒާއަށް ދުނިޔޭގެ ގިނަ ގައުމުތަކުގެ އެންމެ އިސް ލީޑަރުންނާއި ކޮމަންވެލްތު ގައުމުތަކުގެ ލީޑަރުން ވަޑައިގަންނަވާނެ ކަމަށެވެ. އަދި ރާއްޖެއަކީ ކޮމަންވެލްތުގެ ގައުމަކަށްވާއިރު, ރާއްޖެއިން ރައީސް ޞާލިޙް ވަޑައިނުގަތުމަކީ އެ ގައުމުތަކަށް ފާހަގަކުރެވޭނެ ކަމެއް ކަަމަށްވެސް މިއުވާން ވަނީ ވިދާޅުވެފައެވެ. މީގެ އިތުރުން ރައީސް ޞާލިޙް އިނގިރޭސިވިލާތަށް ވަޑައިގަންނަވަނީ އެ ގައުމުގެ ސަރުކާރުގެ ދައުވަތަކަށްކަން މިއުވާން ފާހަގަކުރެއްވިއެވެ.
އިނގިރޭސި ވިލާތުގެ ރާނީ އެލިޒަބަތު އަވަހާރަވީ މިދިޔަ ބުރާސްފަތި ދުވަހުއެވެ. ރާނީ އަވަހާރަވިއިރު ޢުމުރުފުޅުން 96 އަހަރެވެ. އެކަމަނާ ވަނީ 70 އަހަރަށްވުރެ ގިނަދުވަސް ވަންދެން އިނގިރޭސިވިލާތުގެ ރަނިކަން ކުރައްވާފައެވެ. ރާނީގެ ޖަނާޒާ ބާއްވަން ހަމަޖެހިފައިވަނީ މި މަހުގެ 19 ވަނަ ދުވަހުއެވެ.
