އަވަހާރަވެފައިވާ އިނގިރޭސިވިލާތުގެ ރާނީ އެލިޒަބަތު ދެ ވަނައަށް އެންމެފަހުގެ އިޙުތިރާމު އަދާކުރުމަށް އެތައް ލައްކަ ބަޔަކު ލަންޑަންގެ މަގުތައް މަތީގައި ކިޔުތައް ދަމާލައިފިއެވެ.

އެއްވެސް ޝަކުވާއެއްނެތި އެމީހުން ކިޔުތަކުގައި މަޑުކޮށްގެންތިބީ ރާނީއަށް އެންމެފަހުގެ އިޙުތިރާމު އަދާކުރުމުގެ ގޮތުންނެވެ. ރޮއިޓަރސް އިން ރިޕޯޓްކޮށްފައިވާ ގޮތުގައި ބައެއް މީހުން ކިޔުގައި އެމީހުން ތިބި ހިސާބު ގެއްލިދާނެތީ ނިދީވެސް ޕޭމަންޓް މަތީގައެވެ. ރާނީގެ ހަށިކޮޅު ބާއްވާފައިވާ ވެސްޓްމިންސްޓަރ އަށް ވަނުމަށްޓަކައި 10 މޭލަށް ކިޔުތަށް ދަމާލާފައިވެއެވެ. ރާނީގެ ޖަނާޒާގެ ކަންކަން އަންނަ ހަފުތާގެ ހޯމަ ދުވަހު ބާއްވަންދެން ހަށިކޮޅު އޮންނާނީ ވެސްޓްމިންސްޓަރގައެވެ.

ގިނަ ބަޔަކު ރާނީގެ ސަންދޯއް ކައިރިއަށް ދިޔުމަށްފަހު ކުޑަވަގުތު ކޮޅަކު އެތަނުގައި މަޑުކުރުމަށްފަހު އިޙުތިރާމު އަދާކުރުމުގެ ގޮތުން ބޯތިރިކޮށްލައެވެ. ބައެއް މީހުން އެއަށްފަހު ލޮލުން ކަރުނަ ފޮހެލައެވެ.

ސަރުކާރުގެ އޮފިޝަލުން ވިދާޅުވާ ގޮތުގައި ރާނީއަށް އިޙުތިރާމު އަދާކުރުމަށް ބޭނުންވަނީ ކިހާ އަދަދެއްގެ ބަޔެއްކަމެއް ނޭންގެއެވެ. ނަމަވެސް ލަފާކުރެވޭ ގޮތުގައި 750،000 މީހުން ރާނީއަށް އެންމެ ފަހުގެ އިޙުތިރާމު އަދާކުރާނެއެވެ.

ރާނީއަށް އިޙުތިރާމު އަދާކުރުމަށް ކިޔުތަކުގައި ތިބި ބައެއް މީހުންނަކީ އެމީހުންގެ މުސްކުޅި މައިންބަފައިންގެ ފަރާތުން އެތަަނަށް ގޮސްފައިވާ މީހުންނެވެ. އަނެއްބަޔަކީ ތާރީޚީ އެ ވަގުތު ލޮލުން ދެކި ތަޖުރިބާކޮށްލުމަށް ތިބި މީހުންނެވެ. އަދި އަނެއްބަޔަކީ 1952 ވަނަ އަހަރުން ފެށިގެން އިނގިރޭސި ތަހުތުގައި އަވަހާރަވުމުގެ ދެ ދުވަސް ކުރިޔާ ހަމައަށްވެސް ރަސްމީ ބައްދަލުވުންތައް ބޭއްވެވި ރާނީ އެލިޒަބަތަށް ޝުކުރުވެރިވުމަށް ތިބި މީހުންނެވެ.

ކިޔުތައް ބެލެހެއްޓެމުގެ ކަންކަމުގައި 1000 ށް ވުރެ ގިނަ މީހުން އަންނަނީ ހަރަކާތްތެރިވަމުންނެވެ.