އިނގިރޭސިވިލާތާއި އަޔަލޭންޑުގައި ޔޫރޯ 2028 ބާއްވަން ނިންމައިފި

2028 ވަނަ އަހަރުގެ ޔޫރޯ ފުޓުބޯޅަ މުބާރާތް އިނގިރޭސިވިލާތާއި، އަޔަލޭންޑުގައި ބާއްވަން ޔޫރަޕުގެ ފުޓުބޯޅައިގެ މައި އިދާރާ (ޔުއެފާ) އިން ނިންމައިފި އެވެ.

ޔުއެފާ އިން މިކަން ރަސްމީކޮށް ހާމަކޮށްފައި ވަނީ އަންގާރަ ދުވަހު އެވެ. ޔުއެފާގެ ރައީސް އެލެކްސެންޑާ ޗެފެރިން މިކަން ހާމަކުރެއްވީ ބިޑު ވަފުދުތަކާއެކު ބޭއްވި ރަސްމިއްޔާތެއްގަ އެވެ. ޗެފެރިން ވިދާޅުވީ، ބީލަން ހުށަހަޅާ ފަރާތްތަކަށާއި، ހޯސްޓް އެސޯސިއޭޝަންތަކަށް އޭނާ މަރުޙަބާ ދަންނަވާ ކަމަަށާއި، އެއެސޯސިއޭޝަންތަކުގެ އިޚްލާޞްތެރިކަމާއި، ބުރަ މަސައްކަތާއި، ޢަޒުމު ވަރަށް ފުރިހަމަ އަށް ބަލައިގަންނަ ކަމަށެވެ. އޭނާ ވިދާޅުވީ އެންމެން އެކުގައި، މި ބޮޑު މުބާރާތުގެ ހަނދާން ނައްތާނުލެވޭ ވަރުގެ އެޑިޝަންތަކެއް އުފައްދައި، އެންމެން އެއްބައިވަންތަކޮށް، ކުޅިވަރުގެ ރޫޙު ފާހަގަކުރާނެ ކަމަށެވެ.

މިއީ އިންގްލެންޑުގައި ޔޫރޯ ފުޓުބޯޅަ މުބާރާތް ބާއްވާނެ ތިން ވަނަ ފަހަރެވެ. އެ ޤައުމުން ވަނީ 1996 ވަނަ އަހަރުގެ މުބާރާތާއި، 2020 ވަނަ އަހަރުގެ މުބާރާތް ހޯސްޓު ކޮށްފަ އެވެ. 2028 ވަނަ އަހަރުގެ ޔޫރޯ ފުޓުބޯޅަ މުބާރާތް ބާއްވާނެ ސްޓޭޑިއަމްތަކަކީ، ލަންޑަންގެ ވެމްބްލީ ސްޓޭޑިއަމް، ކާޑިފްގައި ހުންނަ ވޭލްސްގެ ޤައުމީ ސްޓޭޑިއަމް، ލަންޑަންގައި ހުންނަ ޓޮޓެންހަމްގެ ސްޓޭޑިއަމް، މެންޗެސްޓަރ ސްޓޭޑިއަމް، ލިވަޕޫލްގައި ހުންނަ އެވަޓަން ސްޓޭޑިއަމް، ނިއުކާސަލްގައި ހުންނަ އެސްޓީ ޖޭމްސް ޕާކް ސްޓޭޑިއަމް، ބާމިންހަމްގައި ހުންނަ ވިލާ ޕާކް ސްޓޭޑިއަމް، ގްލަސްގޯ ގައި ހުންނަ ހެމްޕްޑެން ޕާކް ސްޓޭޑިއަމް، ޑުބްލިންގައި ހުންނަ ޑުބްލިން އެރީނާ އަދި ބެލްފާސްޓްގައި ހުންނަ ކޭސްމެންޓް ޕާކް ހިމެނެ އެވެ. މީގެ ތެރެއިން ބައެއް ސްޓޭޑިއަމްތަކަކީ މުބާރާތަށް ޚާއްސަކޮށްގެން އަލަށް ޤާއިމު ކުރާނެ ސްޓޭޑިއަމްތެކެވެ. އަނެއް ބައި ސްޓޭޑިއަމްތައް މަރާމާތު ކުރަން ވެސް ޖެހެ އެވެ.