އެހެން ޤައުމުތަކުން ބާއްވާ މުބާރާތްތަކަށްވުރެ ފެންވަރު ރަނގަޅު މުބާރާތް އިނގިރޭސިވިލާތަށް ބޭއްވޭނެ ކަމަށް އެ ޤައުމުގެ ބޮޑު ވަޒީރު ރިޝީ ސުނާކް ވިދާޅުވެއްޖެ އެވެ.
ސުނާކް މިހެން ވިދާޅުވީ 2028 ވަނަ އަހަރުގެ ޔޫރޯ ފުޓުބޯޅަ މުބާރާތް ބޭއްވުމުގެ ފުރުސަތު އިނގިރޭސިވިލާތް އަދި އަޔަލޭންޑަށް ދިނުމަށް ޔުއެފާ އިން ނިންމުމާ ގުޅިގެންނެވެ. އެކަން ޔުއެފާ އިން އިއުލާން ކުރުމާއެކު އިންގްލެންޑުގެ ޤައުމީ ޓީމުގެ ކުޅުންތެރިންނާ އަންގާރަ ދުވަހު ސުނާކް ވަނީ ބައްދަލު ކުރައްވާފަ އެވެ. އެއަށްފަހު އޭނާ ވިދާޅުވީ، އިންގްލެންޑުގައި މުބާރާތް ބޭއްވުމުގެ ފުރުސަތު ލިބިގެން ދިޔުމަކީ ނުހަނު ފަޚުރުވެރިވާ ކަމެއް ކަމަށެވެ. އޭނާ ވިދާޅުވީ މީގެ ކުރިން އިންގެލެންޑުގައި 1996 ވަނަ އަހަރު ބޭއްވި މުބާރާތުގެ ހަނދާންތައް ވަރަށް ރަންގަޅަށް ހުންނަ ކަމަށާއި، އެއީ އެންމެ އުފާވެރި އެއް ހަނދާންތައް ކަމަަށެވެ.
އޭނާ ވިދާޅުވީ މީގެ ކުރިން ވެސް އިންގްލެންޑުން މުބާރާތް ބާއްވާފައި ވާނީ ފުރިހަމަ އަށް ކަމަށާއި، އެހެން ޤައުމުތަކަށްވުރެ ފުރިހަމަ އަށް އިންގްލެންޑަށް އެކަން ކުރެވޭނެ ކަމަށެވެ. އެ މުބާރާތާއެކު ދުނިޔޭގެ އެކި ކަންކޮޅުތަކުން އެތައް ބަޔަކު އެ ޤައުމަށް ޒިޔާރާތް ކުރާނެ ކަމަށާއި، އެއީ އަނެއްކާ ވެސް ލިބިގެންދާނެ އިތުރު ހިތްހަމަ ޖެހުމެއް ކަމަށް އޭނާ ވިދާޅުވި އެވެ.
މުބާރާތަށް ތައްޔާރުވުމުގެ ގޮތުން އެ ޤައުމުން ކުރަން ޖެހޭ ކަންކަން އެންމެ ފުރިހަމަ އަށް ކުރައްވާނެ ކަމަށް ވެސް ސުނާކް ވަނީ ވިދާޅުވެފަ އެވެ. އޭނާ ވިދާޅުވީ އަބަދު ވެސް ކުޅިވަރަށް، ޚާއްސަކޮށް ފުޓުބޯޅަ އަށް ބޮޑު ލޯތްބެއް އޮންނަ ކަަމަށެވެ. އިންގްލެންޑުގެ ޤައުމީ ޓީމާމެެދު އަބަދު ވެސް ފަޚުރުވެރިވާކަން ފާހަގަކުރައްވާ ސުނާކް ވަނީ ޤައުމީ ޓީމަށް ހިތްވަރު ދެއްވާފަ އެވެ.
