މި ޒަމާނުގައި ކޮންމެ މީހަކީ ވެސް ވަރަށް ހޭހަން ގައުމުގެ ކަންކަމަށް ލޯހުޅުވިފައިވާ މީހެކެވެ. ޝަރީއަތަކަސް ސިޔާސީ ކަމަކަސް ކޮންމެ ކަމެއްގައި ވެސް އާއްމުންގެ ތެރެއިން ކޮންމެ މީހަކީވެސް ގައުމުގައި އޭރު ހިނގާ ކަމަކަށް ބަސް ބުނާ، ފާޑުކިޔަން ފަރިތަ ބައެކެވެ. ޚާއްސަކޮށް ދިވެހިންނަކީ ޚިޔާލު ފާޅުކުރުމާއި ރައްޓެހި ކަންކަން ހައްލުކުރަން ވާހަކަދައްކާ ބައެކެވެ. އޭގެ އެންމެ ރަނގަޅު މިސާލެއް ފެންނަނީ ކްލަބް ހައުސް ފަދަ އެކި ސޯޝަލް މީޑިއާގައި ހިނގާ ރައްޔިތުންގެ ސައްލާތަކުންނެވެ.

މިހެން ފާޑުކިޔާ، ބަސްބުނެ އުޅޭ މައުޟޫޢުތަކުގެ ތެރޭގައި އެންމެ އާއްމު މައުޟޫއަކަށް ހަމަގައިމުވެސް "އަދުލު އިންސާފު"ގެ ވާހަކަ ހިމެނޭނެއެވެ. ޚާއްސަކޮށް އަދުލު އިންސާފުގެ ނުކިއްސަރުކަމުގެ ވާހަކަދައްކަން އާއްމުކޮށް މިހާރު ދައްކާ މިސާލެއް އޮވެއެވެ. އެއީ ރިހާކުރު ފުޅިއެއް ވަގަށް ނެގި މީހަކު 6 އަހަރަށް ޖަލަށްލީ ކަމުގެ ވާހަކައެވެ. މިއީ އެންމެ ގިނައިން ނުސީދާކޮށް ހިނގާ އަދުލު އިންސާފުގެ މިސާލު ޖެހުމަށް، ނޫނީ އަދުލު އިންސާފު ކިރާލުމަށް ދައްކާ އުޅޭ އެއް މިސާލެވެ.

މި ވާހަކަދެއްކުމުގެ ކުރިން މި މިސާލުގެ ފަހަތުގައިވާ ހަގީގަތަށް ވެސް ބަލާލާނަމެވެ. ކަން ހިނގައި ދިޔަ ގޮތަކީ 2016 ވަނަ އަހަރު ލޯކަލް މާރުކޭޓުގެ ގޮޅިއަކުން ރިހާކުރު ފުޅި ވަގަށް ނެގި މީހަކު ހަ އަހަރަށް ޖަލަށް ލުމަށް ކްރިމިނަލް ކޯޓުން ހުކުމް ކުރީއެވެ. އާއްމުން ކެނޑިނޭޅި ކުރާ ސުވާލަކީ ރިހާކުރު ފުޅިއެއް ނެގި މީހާ ޖަލަށް ލެވޭ އިރު ދީނަށް ހަޖޫޖަހާ މީހުން އިންސާފުގެ ކުރިމައްޗަށް ނުގެނެވެނީ ކީއްވެތޯ ކުރާ ސުވާލެވެ. އަދި ދީނުގައި ކަނޑައަޅާފައިވާ ހުކުމްތައް ނުކުރަނީ ކީއްވެތޯ ކުރާ ސުވާލެވެ. އޭރުން ފެށިގެން މިހާ ހިސާބަށް އައި އިރު ވެސް "ރިހާކުރު" ފުޅިއެއް ވަގަށް ނެގި މީހާ ޖަލަށް ލާފައި މީހުން މެރުމާއި، ގޭން މާރާމާރީ އާއި ބޮޑެތި ކޮރަޕްޝަނާއި މި ނޫނަސް ބޮޑެތި ޖިނާއީ ކުށްތައް ކުރާ މީހުންގެ ފަސްބައިގައި ނުހިފެނީ ކީއްވެތޯ އެތައް ބަޔަކު ސުވާލު އުފައްދައެވެ. މިއީ އިންސާފުތޯ އެތައް ބަޔަކު ސުވާލު އުފައްދައެވެ. އެއް ބަޔަކު ސިފަކުރާ ގޮތުން މިއީ އަދުލު އިންސާފުގެ ނިޒާމަށް ކުރާ މަލާމާތެކެވެ.

ކޮންމެ އަކަސް މި ސުވާލު އާއްމުންގެ ދޫމަތިން ގޮސް ރައްޔިތުންގެ މަޖިލީހާއި ހަމައަށް ފޯރާ، އެ ސުވާލު ޕްރޮސެކިއުޓަރ ޖެނެރަލް ހުސެއިން ޝަމީމް އާއި ވެސް ކުރެވުނެވެ. ޕީޖީގެ ޖަވާބު ނިކަން ކުރުވެފައި ފޮންޏެވެ.

ރިހާކުރު ފުޅި ވަގަށް ނެގި މީހާ ޖަލަށްލީ އެއް ދުވަހު ރިހާކުރު ފުޅިއެއް ވަގަށް ނަގައިގެން ނޫންކަމެވެ. އަދި އެކަހަލަ އެހެން މައްސަލަތަކުގައި ވެސް ކަންހިނގަނީ ހަމަ މި މޭރުމުންނެވެ. ދަންނަވަން މި އުޅޭ ވާހަކަ އަކީ މިފަދަ ކޮންމެ ވާހަކައެއްގެ ފަހަތުގައި ވާ ހަގީގަތް ހޯދާ ބަލާ ބަޔަކަށް، ފެންނާނެ ކިތަންމެ އެހެން މަންޒަރެއް ހުރިކަމުގެ ވާހަކައެވެ. ޕީޖީ ވިދާޅުވާ ގޮތުން އެފަދަ މައްސަލަތަކުގައި ގިނަ ދުވަހަށް ޖަލަށް ލަނީ އެކަންކަން ތަކުރާރުވުމުގެ ސަބަބުންނެވެ.

ތެދެކެވެ. ރިހާކުރު ފުޅި ވަގަށް ނެގި މީހާ ޖަލަށް ލެވެންޏާ ދައުލަތުން ވައްކަން ކުރާ މީހުން އަމުދުން ތިބެންވާނީ ޖަލުގައެވެ. އަދި އަމުދުން ޖިނާއީ ބޮޑެތި ކުށް ކުރާ މީހުން ހިފެހެއްޓުމެއް ނެތި ދޫވެފައި ތިބެގެން ވެސް ނުވާނެއެވެ. އެކަމަކު އަދުލު އިންސާފަކީ ގާނޫނެއްގެ ތަރަހައިގެ ތެރޭގައި ހިނގާ ކަންކަމެވެ. އެއީ ޕީޖީ ނުވަތަ ބަންޑާރަ ނައިބު ނުވަތަ ފަނޑިޔާރުންގެ ހިތަށް އަރާހާ ގޮތަކަށް ހިނގާ ކަމެއް ނޫނެވެ. އަދި އެ ބޭފުޅުން ރުހޭހާ ގޮތަކަށް ވެސް ކުރެވޭ ކަމެއް ނޫނެވެ.

އެހެންވީމަ ރިހާކުރު ފުޅި ވަގަށް ނެގި މީހާއަށް ހުކުމް ކުރެވިފައި ބޮޑެތި ކުށްތައް ކުރި މީހުންނަށް ހުކުން ނުކުރެވުމަކީ ހަމައެކަނި ޕީޖީ އާއި ފަނޑިޔާރުން އަދި އޭޖީއަށް ފާޑުކިޔާފައި ނިންމާލެވެން އޮތް ކަމެއް ނޫނެވެ. އަދި ފުލުހުންނަށް ފާޑުކިޔާފައި ފަރުޖައްސާލެވެން އޮތް ކަމެއް ވެސް ނޫނެވެ. ކަން މިހާރު ހިނގާ ގޮތަށް ބަލާނަމަ، ބޮޑެތި މައްސަލަތަކުގައި އިސްލާމީ ޝަރީއަތުގައި އޮތް އަދަބު ދިނުން ކަމުގައި ވީނަމަވެސް އެހެން މައްސަލަތައް ހައްލު ކުރުން ކަމުގައި ވީނަމަވެސް ކުށެއްގެ އަދަބު ދެވޭނީ ޤާނޫނުގައި ކަނޑައަޅާފައިވާ ގޮތަށެވެ. މިއީ ތަކުރާރުކޮށް ކަމާއި ބެހޭ އިދާރާތަކުން ދައްކާ ވާހަކައެވެ. އަދި މިފަދަ ކަންކަމަކީ ފުށްޓަކިއެއް ޖަހާލާހާ ފަސޭހައިން ހައްލުކުރެވޭ ވަރަށް ވުރެ ފަންނީ، ހައްސާސް މަސައްކަތަކަށް ވަނީ ވެފައެވެ. އެހެންކަމުން އެންމެ ފުރަތަމަ ކުރަންވީ ކަމަކީ އިސްލާމީ ޝަރީއަތަށް ޤާނޫނުތައް އެއްގޮތްކުރުމެވެ. އަދަބު ނުދެވުމުގެ ވާހަކަ ދެއްކެން އޮތީ އެއަށް ފަހުގައި ނޫންތޯއެވެ؟