ގޭގެ ވެރިފަރާތުގެ ނަމުގައި ސައްޙަ ނޫން އެއްބަސްވުމެއް ހެދި މީހަކަށް ބައިލައްކަ ރުފިޔާއާ ގާތްކުރާ އަދަދެއްގެ ޖޫރިމަނާއެއް ދެއްކުމަށް ކްރިމިނަލް ކޯޓުން ޙުކުމް ކޮށްފިއެވެ.

މި މައްސަލައިގައި ހުށައަޅާފައިވަނީ އެނގިހުރެ ސައްޙަ ނޫން ލިއުމެއް އުފެއްދުމުގެ ކުށުގެ ދައުވާއެވެ. އެގޮތުން މި މައްސަލައިގައި ކަން ހިނގާފައިވާ ގޮތަށް ބަލާއިރު، ދައުވާލިބޭ ފަރާތުން ވަނީ ހެންވޭރު ގެއެއްގެ 3 ކޮޓަރީގެ އެޕާޓްމަންޓެއް އޭނާއަށް 12 އަހަރަށް ކުއްޔަށް ދީފައިވާކަން ދެއްކުމުގެ ގޮތުން އެޕާޓްމަންޓުގެ ވެރިފަރާތުގެ ނަމުގައި ސައްޙަނޫން އެއްބަސްވުމެއް އެކުލަވާލާފައެވެ.

އެކަމަށްޓަކައި ދެ ހެކިވެރިއެއްގެ ނަން އެއްބަސްވުމުގައި ހިމަނައި، އެމީހުންގެ ނަމުގައި އޭނާ ވަނީ އެއްބަސްވުމުގައި ސޮއިވެސް ކޮށްފައެވެ.

މި މައްސަލައިގެ އިބްތިދާއީ އަޑުއެހުމަށް އޭނާ ހާޒިރުވެފައި ނުވާތީ ޝަރީއަތުގެ މަރުޙަލާ ފެށުނުކަން އިއުލާނުކޮށް، އިފްތިތާޙީ ބަޔާން އިއްވުމަށް ދެފަރާތަށް ވަނީ ފުރުސަތު ދީފައެވެ.

މި މައްސަލައިގެ އިފްތިތާޙީީ ބަޔާން އިއްވުމަށް ފުރުސަތު ދިނުމުން އޭނާ ވަނީ ދައުވާއަށް އިއުތިރާފުވާން ބޭނުންވާކަން ފާހަގަކޮށްފައެވެ. އެގޮތުން ދައުވާއަށް އިއުތިރާފުވަނީ އެއްވެސް މީހެއްގެ ނުފޫޒެއް އަދި މަޖުބޫރު ކުރުވުމެއް ނެތިކަމަށް އޭނާ ބުނެފައިވެއެވެ.

އޭނާ ދައުވާއަށް އިއުތިރާފުވެ، ކަން ހިނގާފައިވާ ގޮތް ޝަރީއަތުގައި ކިޔާދީފައިވާނީ އޭނާގެ އިއުތިރާފަކީ ސައްޙަ އިއުތިރާފެއްކަމަށް ގާޒީ ވަނީ ނިންމަވާފައެވެ. ވުމާއެކު، ދައުލަތުން ހުށައަޅާފައިވާ ހެކިން އިތުރަށް ހާޒިރުކޮށްފައެއް ނުވެއެވެ.

މި މައްސަލައިގެ ޝަރީއަތުގެ މަރުޙަލާގައި އޭނާ އިއުތިރާފުވެފައިވާތީ މައްސަލަ ބައްލަވާ ގާޒީ ވަނީ އޭނާގެ މައްޗަށް ކުށް ސާބިތުވާކަމަށް ނިންމަވާފައެވެ.

އޭނާގެ މައްޗަށް ކަނޑައެޅުނު ޖަލު އަދަބުގެ ތެރެއިން 6 މަސް ދުވަހުގެ ޖަލު އަދަބު ވަނީ ޖޫރިމަނާގެ އަދަބަކަށް ބަދަލުކޮށްފައެވެ. އެގޮތުން ޖޫރިމަނާގެ ގޮތުގައި 48،108 ރުފިޔާ 13 ސެެޕްޓެމްބަރުން ފެށިގެން 6 މަސް ދުވަހުގެ ތެރޭގައި ދެއްކުމަށް ގާޒީ ވަނީ ޙުކުމް ކުރައްވާފައެވެ.

ކްރިމިނަލް ކޯޓުގައި މި މައްސަލަ ނިންމެވީ ގާޒީ އަލީ ނަދީމެވެ.