12 އަހަރު ކުރީގެ މަައްސަލައެއްގައި ޖަލު ޙުކުމުގެ ބަދަލުގައި ޖޫރިމަނާއެއް ދައްކަން ޙުކުމްކޮށްފި

މީގެ 12 އަހަރު ކުރީގެ މަައްސަލައެއްގައި ޖަލު ޙުކުމުގެ ބަދަލުގައި ޖޫރިމަނާއެއް ދައްކަން ކްރިމިނަލް ކޯޓުން ޙުކުމްކޮށްފިއެވެ.

މިއީ 2010 ވަނަ އަހަރުގެ ނޮވެމްބަރު މަހު ހިނގި ޙާދިސާއަކާއި ގުޅޭ މައްސަލައެކެވެ. އެގޮތުން މި މައްސަލައިގައި ދައުލަތުން ބުނެފައިވަނީ ދައުވާލިބޭ 2 މީހުންނާއި އިތުރު ބަޔަކުވެގެން ހދ. މަކުނުދޫއިން ފުރައިގެން ހދ. ކުޅުދުއްފުއްޓަށް ދަތުރުކުރަމުން ދިޔަ ލޯންޗުގެ ކެޕްޓަންއާއި ފަޅުވެރިންނަށް ބިރު ދައްކައިގެން އެ ލޯންޗު ހދ. ވައިކަރަމުރައިދުއަށް ގެންގޮސްފައިވާ ކަމަށެވެ.

Advertisement

އޭރު މި ދައުވާ ކޮށްފައިވަނީ އޭރު އަމަލުކުރަމުން ދިޔަ ދިވެހިރާއްޖޭގައި ޓެރަރިޒަމް މަނާ ކުރުމުގެ ޤާނޫނުގެ ދަށުންނެވެ. އެމީހުންގެ މައްޗަށް ކޮށްފައިވަނީ ޓެރަރިޒަމްގެ ދައުވާއެވެ.

އެ ޤާނޫނު އުވި 2015 ވަނަ އަހަރު ތަސްދީޤުކޮށް އަމަލުކުރަން ފަށާފައިވާ ޓެރަރިޒަމް މަނާ ކުރުމުގެ ޤާނޫނުގައި މި ދައުވާގައި ހިމެނޭ ކުށް ބަޔާންކޮށްފައެއް ނުވެއެވެ. އެހެންނަމަވެސް، ދިވެހިރާއްޖޭގެ ޤާނޫނުލްއުޤޫބާތުގެ 140 ވަނަ މާއްދާގައި އެ ކުށް ބަޔާންކޮށްފައިވާކަން ދައުލަތުން ފާހަގަ ކުރެއެވެ. އެއީ ހުއްދަ ނޫން ގޮތުގައި މީހުން ހިފެހެއްޓުމުގެ ކުށުގެ ދައުވާއެވެ. ވުމާއެކު، މި މައްސަލައިގައި އަދަބު ކަނޑައެޅޭނީވެސް އެ މާއްދާގެ ދަށުންކަން ދައުލަތުން ފާހަގަ ކުރެއެވެ.

މި މައްސަލައިގެ ދައުވާއަށް އެމީހުން ވަނީ އިއުތިރާފުވެފައެވެ. އެގޮތުން ދައުވާ ސާފުވެފައިވާ ކަމަށާއި، އެއްވެސް ފަރާތެއްގެ މަޖުބޫރުކަމެއް ނެތި އަމިއްލަ އިޙްތިޔާރުގައި ދައުވާއަށް އިއުތިރާފުވާކަން އެ ފަރާތްތަކުން ވަނީ ފާހަގަކޮށްފައެވެ. ވުމާއެކު، މި މައްސަލައިގައި ކުރިއަށް ގެންގޮސްފައިވަނީ އަވަސްނިޔާގެ ޝަރީއަތުގެ އަޑުއެހުމެކެވެ.

އަވަސްނިޔާގެ އަޑުއެހުމުގައިވެސް ދައުވާލިބޭ ފަރާތްތަކުން ވަނީ އިއުތިރާފު ދަމަހައްޓާފައެވެ. ވުމާއެކު، މައްސަލަ ބެއްލެވި ގާޒީ ވަނީ އެއީ ސައްޙަ އިއުތިރާފެއްކަމަށް ނިންމަވާފައެވެ.

އެމީހުންގެ މައްޗަށް ދައުވާކޮށްފައިވާ ކުށުގެ އަސާސީ އަދަބަކީ 4 މަހާއި 24 ދުވަހުގެ މުއްދަތަކަށް ޖަލަށްލުމެވެ. ޝަރީއަތުން ފާހަގަކުރާ ގޮތުގައި ކުށުގެ ރެކޯޑަށް ބަލާއިރު އެމީހުންގެ މައްޗަށް އަދަބު ބޮޑުވާނެ ޙާލަތެއް ނެތެވެ.

ދިވެހިރާއްޖޭގެ ޤާނޫނުލްއުޤޫބާތުގައި ބަޔާންކުރާ އަދަބު ބޮޑުވާ ޙާލަތްތަކާއި، އަދަބު ދަށްވާ ޙާލަތްތަކަށް ރިއާޔަތްކުރާއިރު، ދައުވާލިބޭ އެކެއްގެ މައްޗަށް އަންނަނީ 2 މަހާއި 3 ދުވަހުގެ ޖަލު ޙުކުމެކެވެ. ދެވަނަ މީހާއަށް އަންނަނީ 1 މަހާއި 18 ދުވަހުގެ ޖަލު ޙުކުމެކެވެ.

އެދެމީހުންގެ ފަރާތުން ވަނީ އަދަބު ވީހާވެސް ލުއިކޮށްދިނުމަށް އެދިފައެވެ.

މައްސަލަ ބައްލަވާ ގާޒީ ވިދާޅުވާ ގޮތުގައި އެފަދަ ކުށްތަކުގައި ޖަލަށް ލުމުގެ އަދަބު ކަނޑައެޅުމުން ދައުލަތުގެ މައްޗަށް އޮންނާނެ މާލީ އަދި އިދާރީ ބުރައަށާއި، ދައުވާލިބޭ ފަރާތްތައް ކުށުގެ ވެށިން ދުރުވުމަށް ބާރުއެޅޭ މިންވަރަށް ބަލާއިރު ޖަލު އަދަބު ކަނޑައެޅުމަށްވުރެ އެ ނޫން އަދަބެއް ކަނޑައެޅުމުގެ މަސްލަޙަތު ބޮޑެވެ.

އަދަބު ކަނޑައަޅާއިރު ކުށްވެރިޔާ ޖަލަށް ލުމުގެ ބަދަލުގައި އެހެން އަދަބެއް ކަނޑައެޅުމުގެ އިޙްތިޔާރު ޤާނޫނުލްއުޤޫބާތުގެ 1004 ވަނަ މާއްދާއާއި، 1002 ވަނަ މާއްދާއިން ފަނޑިޔާރަށް ލިއްބައިދީފައިވެއެވެ. ވުމާއެކު، މައްސަލަ ބައްލަވާ ގާޒީ ވަނީ އެ އިޙްތިޔާރުގެ ބޭނުން ހިއްޕަވައި، އެ މީހުންގެ ޖަލު ޙުކުމް ޖޫރިމަނާއަށް ބަދަލުކޮށްދެއްވާފައެވެ. އެގޮތުގެ މަތިން ޖޫރިމަނާގެ ގޮތުގައި އެކަކު ދައްކަން ޖެހުނީ 12،600ރ. އެވެ. ދެވަނަ މީހާއަށް ޖެހުނީ 9،600ރ އެވެ.

ކްރިމިނަލް ކޯޓުގައި މި މައްސަލަ ބެއްލެވީ ގާޒީ އިސްމާއިލް ޝަފީއުއެވެ.