ކައުންސިލްތަކާއެކު ރައީސް އިށީންނެވުން: ކައުންސިލްތަކަށް ލިބުނު އިތުރު ބާރެއް
12 ސެޕްޓެމްބަރު 2022 | ހޯމަ 10:40އިށީންނެވީ ކެބިނެޓް ވަޒީރުންނާއި ކުންފުނިތަކުގެ ވެރިންނާވެސްއެކު
"ވިއަވަތި ރާއްޖެ” ކޮންފަރެންސް ގެ ތެރެއިން
ކުރިން ތިބެނީ އަތޮޅުވެރީންނެވެ. 70 ގެ އަހަރު ތަކުގައި އެއަތޮޅަކުން އިންތިޚާބު ކުރާ ބަޔަކު ތިބިނަމަވެސް އޭގެ ފަހުން ތިއްބެވީ ރައީސުލް ޖުމްހޫރިއްޔާ އައްޔަން ކުރައްވާ ބައެކެވެ. އެންމެ ފަހުން ބޭއްވި އަތޮޅުވެރިންގެ ބައްދަލުވުމެއް ބޭއްވީ މުހައްމަދު ވަހީދުއްދީންގެ އެޓޮލްސް މިނިސްޓަރ ކަމުގައެވެ. އޭރުވެސް ތިއްބެވީ އައްޔަން ކުރައްވާ އަތޮޅުވެރިން ކަމުން އެވެރިންގެ މައްޗަށް ސަރުކާރުގެ ނުފޫޒާއި ބާރު ފޯރުވެން އޮވެއެވެ.
ލާމަރުކަޒީ ނިޒާމަށް ބަދަލުވެ މިއަދާހަމައަށް އައިއިރު ރަށް ހިންގާނެ ވެރިންނާއި އަތޮޅު ހިންގާނެ ވެރިން އެތަނެއްގެ މީހުންގެ ބާރުގައި ނެގޭގޮތްވިއެވެ. ރަށާއި އަތޮޅު ހިންގުމުގައި ރަށުގެ ރައްޔިތުންގެބަސް ވިކޭނެ މަގެއް ފެނުނެވެ. ނަމަވެސް އެހަޤީގީ ބާރުވެރިކަން މީގެކުރިން އޮތީ ނަމެއްގައެވެ. ނިމިދިޔަ ރައީސް ޔާމީނުގެ ސަރުކާރުގައިވަނީ ކައުންސިލްތަކަށް ލިބިދީފައިވާ ގިނަ ބާރުތައް އަތުލާފައެވެ. އޭރު ބޮޑަށް އަޑުއިވެނީ ސަސްޕެންޑް ކުރުމާއި ފިޔަވަޅު އެޅުމުގެ ވާހަކަތަކެވެ. އޭރު ބާރު ދީފައި އޮތީ ނަމެއްގައެވެ. ހަޤީޤީ ބާރުތައް އޮތީސަރުކާރުގެ މުށުތެރެއަށް ނަގާފައެވެ. ސަރުކާރާ އިދިކީލި އެއްވެސް ކަމެއް ކުރިއަސް އަދި އެފަދަޚިޔާލެއް ފާޅުކުރިއަސް އޭރު އޮންނަނީ ކައުންސިލްތައް ގޭގައި ތިބެން ޖެހިފައެވެ. މިއީކީ ތޯތޯ ވާހަކައެއް ނޫނެވެ. އިއްޔެ މެންދުރުހެން ފެންނަންހުރި ހަޤީގަތެކެވެ.
ރައީސް އިބްރާހީމް މުހައްމަދު ސާލިޙްގެ މިސަރުކާރުން އަނެއްކާވެސް އެވަނީ ތައްމިނަށް އެބާރުތައް ކައުންސިލްތަކަށް ދޫކޮށްލާފައެވެ. އަންހެންނުންގެ ތަރައްޤީއަށް މަސައްކަތް ކުރާ ކޮމެޓީތަކަށް އިނާޔަތެއް ދީ އެމީހުންނަށްވެސް ބާރުތަކެއް މަތިކޮށްދީފައެވެ. އިޤްތިސާދީގޮތުން ރަށާއި އަތޮޅަށް ފުދުންތެރިކަން ހޯދޭނެ މަގު ޤާނޫނަކުން ތަނަވަސްކޮށްދީ އެބާރުވެސް ކައުންސިލްތަކަށް ދޫކޮށްލައްވާފައެވެ.
ރަށު ކައުންސިލްތަކާއި އަތޮޅު ކައުންސިލްތަކަކީ ޕާޓީތަކުން އިންތިޚާބުވި ބައެކެވެ. ޕާޓީތަކުގެ ނަމުގައި އެޕާޓީތަކުގެ ވިސްނުމާއި ސިޔާސަތުތައް ވިއްކައިގެން އިންތިޚާބުވިބައެކެވެ. އެހެންކަމުން ކައުންސިލަރުންނަކީ ނުހަނު ސިޔާސީވެސް ބައެއް މެއެވެ. އެމީހުންގެ ސިޔާސީ ކުރިމަގަށް ވިސްނަވާ އަދި ސިޔާސީ ބާރުވެރިކަމުގައި ދެމިތިބެވޭނޭ ބީދައިން މަސައްކަތްވެސް ކުރެވޭނެ އަދި މަސައްކަތްކުރާ ބައެކެވެ.
ކަން މިހެން އޮތްއިރު އެކައުންސިލަރުންނާއެކު އެއްމޭޒެއްގެ ދޮށުގައި ރާއްޖޭގެ ރައީސުލް ޖުމްހޫރިއްޔާ އިށީނދެވަޑައިގެންނެވުމަކީ އާދައިގެ ކަމެއް ނޫނެވެ. އެއީ ނުހަނު ބޮޑު ބާރަކާއި މިނިވަންކަމެއް ލިބިދިންކަމެކެވެ. ފާއިތުވި ދެދުވަހު ކުރިއަށްދިޔަ "ވިއަވަތި" ބައްދަލުވުމުގައި ބައިވެރިވި 270 އެއްހާ ކައުންސިލަރުންނާއެކު ރައީސުލް ޖުމްހޫރިއްޔާ އިބްރާހީމް މުހައްމަދު ސާލިހް އެވަނީ ވަރަށް ކެރިވަޑައިގެން އިށީންނަވާފައެވެ. މިއީ ރާއްޖޭގެ ރައީސުލް ޖުމްހޫރިއްޔާއަކު މީގެ ކުރިން ކުރައްވާފައިވާ ކަމެއް ނޫނެވެ. އެމަނިކުފާނު އެކައުންސިލަރުންނާއެކު އިށީންނެވީ އެމަނިކުފާނުގެ ކެބިނެޓް ވަޒީރުންނާވެސް އެކުގައެވެ. ސަރުކާރުގެ ކުންފުނިތަކުގެ އެންމެ އިސްބޭފުޅުންނާވެސް އެކުގައެވެ. ނަތީޖާއަކީ ކޮބައިތޯއެވެ. ކައުންސިލަރުންގެ ޝަކުވާތައް ހިފެހެއްޓުމެއްނެތި ސީދާ ރައީސަށް ދެންނެވޭނޭ މަގު ފަހިވުމެވެ. ނުކުރެވި ހުރި ކަންކަމާއި ކަންބޮޑުވުންތަކުގެ ވާހަކަތައް ރައީސަށް އޮއްސަވާލެއްވުމެވެ. ކުންފުނިތަކުގެ މަސައްކަތްތަކުގެ ކަންކަމާއި ސްޕީޑްގެ ވާހަކަ ރަނގަޅަށް ބުނެދެވުމެވެ. މިއީ އާދައިގެ ކުޑަ ފުރުސަތެއް ނޫނެވެ. އަމުދުން އިދިކޮޅު ޕާޓީތަކުގެ މެންބަރުންގެ ގޮތުގައިވެސް ތިއްބެވި ކައުންސިލަރުންނަށްވެސް ހިތުހުރި ވާހަކައެއް ބުނެލެވޭނޭ ގޮތެއްވީއެވެ. އެވާހަކަތަކަށް ބާރުދޭން އެފަދަ އަނެއް ކައުންސިލަރުގެ އެހީތެރިކަމާވެސް އެކުގައެވެ. ބައިވެރިވާން ބޭނުން ނޫން ކައުންސިލަރަކު ބައިވެރިނުވުމުގެ އިޚްތިޔާރާވެސް އޮތީ ލިބިދީފައެވެ. އެމީހުންގެ ސިޔާސީ ވިސްނުން ކުރިއަށް ނެރެގެންނެވެ. މިސާލަކަށް ބައެއް ކައުންސިލަރުން އެބައްދަލުވުން ކުރިއަށްދިޔައިރު އުޅުއްވީ ކުރީގެ ހައުސިންގ މިނިސްޓަރ އަދި މިހާރު މާލެ ސިޓީގެ މޭޔަރ ޑރ މުއިއްޒުއާއެކު ކުޅިވަރު މުބާރާތެއްގެ ކަންތައްތަކެއްގެ ތެރޭގައެވެ. ދަންނަވަން މިއުޅެނީ ކައުންސިލަރުންނަށް އެހާވެސް ބާރާއި އިޚްތިޔާރު އެބައޮތްކަމެވެ. މިނިވަންކަން އެބައޮތްކަމެވެ.
ކޮންމެއަކަސް ކެރިވަޑައިގެން ރައީސް އިށީދެވަޑައިގެންނެވި އިށީދެވަޑައިގަތުމަކީ ކައުންސިލަރުންނަށް ލިބުނު ބޮޑު އަނެއް ބާރެވެ. އެކައުންސިލަރެއްގެ ދާއިރާގެ ކުރިއެރުމަށާއި އެކުރިއެރުން ގެނެސްދީގެން ސިޔާސީ ބާރުވެރިކަން ހޯދުމަށް އެވެރިންނަށް ލިބުނު އިތުރު ބާރެކެވެ. ފަހިވި މަގެކެވެ. ރައީސްގެ އިސްނެންގެވުމުގެ ނަތީޖާ ހަމަ ރަނގަޅެވެ. ހާމަވެގެން ދިޔައީ ބާރުތައް ދޫކޮށްލައްވާނެކަމަށް ވިދާޅުވި ވިދާޅުވުމުގެ ތެދުކަމާއި މިނިވަން ބައެއްގެ ގޮތުގައި ކައުންސިލަރުންނަށް ތިއްބެވޭނެ މަގު ފަހިކޮށްދެއްވާނޭކަމަށް ރައީސް ވިދާޅުވިވިދާޅުވުމަކީ ހަޤީގަތެއްކަމެވެ. ރަނުން ރަނަށް އެވައުދު ފުއްދަވައިފިކަމެވެ.
