ޔޫއެސްއެއިޑުން ލަންކާއަށް 60 މިލިއަން ޑޮލަރުގެ އެހީއެއް ދެނީ
40 މިލިއަން ޑޮލަރު ފޯރުކޮށްދެނީ ގަސްކާނާ އިމްޕޯޓް ކުރުމަށް
ޔޫއެސްއެއިޑްގެ ޗީފް އާއި ސްރީލަންކާގެ ރައީސް ބައްދަލުކުރައްވަނީ
ޔޫއެސް އެޖެންސީ ފޯ އިންޓަރނޭޝަނަލް ޑެވެލޮޕްމަންޓް (ޔޫއެސްއެއިޑް) އިން ސްރީލަންކާއަށް 60 މިލިއަން ޑޮލަރުގެ އެހީއެއް ދޭން ނިންމައިފިއެވެ.
ޔޫއެސްއެއިޑުގެ ޗީފް ސަމާންތާ ޕަވަރ މިކަން އިއުލާން ކުރައްވާފައިވަނީ އާދީއްތަ ދުވަހުއެވެ. އޭނާ ވިދާޅުވި ގޮތުގައި މި އެހީގެ ތެރެއިން 40 މިލިއަން ޑޮލަރު ފޯރުކޮށްދެނީ ގަސް ކާނާ އިމްޕޯޓް ކުރުމަށެވެ. އަދި ބާކީ 20 މިލިއަން ޑޮލަރު ދެނީ އެ ޤައުމަށް ދިމާވެފައިވާ އިގްތިސާދީ ކާރިސާގެ ސަބަބުން ހާލުގައި ޖެހިފައިވާ މީހުންނަށް އެހީވުމަށެވެ.
ސަމާންތާ ޕަވަރ މިހާރު ހުންނެވި ލަންކާގައެވެ. އޭނާ ގެންދަވަނީ އެ ޤައުމަށް ޒިޔާރަތް ކުރައްވައި ޤައުމުގެ ހާލަތު މޮނީޓަރު ކުރައްވަމުންނެވެ.
މި ދަތި ވަގުތުގައި އެމެރިކާ އޮތީ ލަންކާއާއެކުގައި ކަމަށް ވެސް ސަމާންތާ ވަނީ ވިދާޅުވެފައެވެ.
ލަންކާގެ އިގްތިސާދީ ހާލަތު ދަށްވެ ބޭރު ފައިސާ މަދުވުމުގެ ސަބަބުން އެ ޤައުމުގެ އިމްޕޯޓު ވަނީ ހުއްޓިފައެވެ. މީގެ ސަބަބުން ކާބޯތަކެއްޗާއި ތެލާއި ބޭސް ފަދަ ތަކެތި އެ ޤައުމަށް އެތެރެ ކުރުން ވަނީ މަދުވެފައެވެ.
