މަޒިޔާ ފުރަތަމަ ފަހަރަށް ފައިނަލަށް

ރަމަޟާން ވެޓެރެންސް ކަޕް ފުޓުބޯޅަ މުބާރާތުގައި އެންމެ ފަހުގެ ޗެމްޕިއަން ނިއުރޭޑިއަންޓް ބަލިކޮށް މާޒިޔާއިން ފައިނަލުގެ ފުރަތަމަ ޖާގަ ހޯދައިފިއެވެ.

ސެމީފައިނަލްގެ ފުރަތަމަ މެޗުގައި މަޒިޔާއިން ނިއުރޭޑިއަންޓްގެ މައްޗަށް ކުރިހޯދީ 3-0 ގެ ނަތީޖާއަކުންނެވެ. މާޒިޔާއަށް މެޗުގައި ލަނޑުތައް ކާމިޔާބުކޮށްދިނީ މުހަންމަދު ނާޝިދް، އަހްމަދު ޝާޒްލީ، އަދި މެޗުގެ މޮޅު ކުޅުންތެރިޔާގެ މަގާމުހޯދި އާފިއު މުހަންމަދެވެ. މެޗުގެ 45 އަހަރުން މަތީގެ މޮޅު ކުޅުންތެރިއަކަށް ހޮވުނީ މާޒިޔާގެ އަހުމަދު ނާޝިދެވެ.

މާޒިޔާއިން ފައިނަލުގެ ފުރަތަމަ ޖާގަ ކަށަވަރު ކޮށްފައި ވާއިރު މިއީ މި މުބާރާތުގެ ފައިނަލުން މާޒިޔާ ޖާގަހޯދި ފުރަތަމަ ފަހަރުކަންވެސް ފާހަގަ ކޮށްލެވެއެވެ. މި މުބާރާތުގައި މާޒިޔާ މިހާތަނަށް ކުޅުނު 6 މެޗުގެ ތެރެއިން އެޓީމު ބަލިވެފައިވަނީ އެންމެ މެޗަކުންނެވެ.

ފުރަތަމަ ސެމީގައި މާޒިޔާއަތުން ބަލިވި އެންމެ ފަހުގެ ޗެމްޕިއަން ނިއުއަށް ދެން ޖެހޭނީ 3 ވަނަ ސެމީގައި ވާދަކުރާށެވެ. އެހެންކަމުން އެޓީމަށް އަދި ފައިނަލަށް ދަތުރުކުރުމުގެ ފުރުސަތު އެބަ އޮތެވެ. ތިން ވަނަ ސެމީގައި ނިއުއާއި ދެކޮޅަށް ނިކުންނާނީ ދެވަނަ ސެމީގައި ބައްދަލުކުރާ ދެޓީމުގެ ތެރެއިން މޮޅުވާ ޓީމެކެވެ.

މޯލްޑިވްސް ސޮކާ މޭޓްސް އިން އިންތިޒާމުކޮށްގެން ކޮންމެ އަހަރަކު ރަމަޟާންމަހު ބާއްވަމުން އަންނަ ވެޓެރެންސް ކަޕްގައި ކުޅެނީ 35 އަހަރުން މަތީގެ ކުޅުންތެރިންނެވެ. މި މުބާރާތުގެ އެންމެ ކާމިޔާބު ޓީމަކީ ވެލެންސިއާއެވެ. އެޓީމުން ވަނީ ޖުމްލަ 4 ފަހަރު މުބާރާތް ކާމިޔާބުކޮށްފައެވެ.