ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން, މަގާމުގެ ނުފޫޒު ބޭނުންކުރައްވައިގެން ކުރީގެ ރައީސް އަބްދުﷲ ޔާމީން ރިޝްވަތު ނެންގެވިކަމަށް ތުހުމަތުކުރެވޭ މައްސަލައިގެ ދިފާއީ ހެކިންގެ ހެކިބަސް ނެގުމުގެ އަޑުއެހުމެއް ހޮނިހިރު ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި އަޑުއެހުމަށް ދިފާއީ ހެއްކެއްގެ ގޮތުގައި ހާޒިރުކުރީ ރައްޔިތުންގެ މަޖިލީހުގެ ހުޅުދޫ ދާއިރާގެ ކުރީގެ މެމްބަރު މުހައްމަދު ޝާހިދު (ޝާޑު) އެވެ.

އޭނާ ވިދާޅުވީ، 2007ން ފެށިގެންވެސް ރައީސް ޔާމީނަކީ އޭނާގެ ގާތް ރައްޓެއްސެއް ކަމަށެވެ. ޔޫސުފް ނައީމަކީވެސް އޭނާ ދަންނަ ރައްޓެއްސެއް ކަމަށް ޝާޑު ވިދާޅުވިއެވެ.

ޝާޑު ވިދާޅުވީ، ރައީސް ޔާމީނު ފައިސާއާ ގުޅުންހުރި ކަންކަމުގައި ހޯރަފުށީ ދާއިރާގެ ކުރީގެ މެމްބަރު މުޙައްމަދު އިސްމާއިލްއަށް ގުޅުއްވާ ކަމަށެވެ. އެގޮތުން ބޭންކް ރޭޓުން 1 މިލިއަން ޑޮލަރު ހޯދުމަށް އެދި ރައީސް ޔާމީނު މެމްބަރު މުޙައްމަދު އިސްމާއިލްއަށް ގުޅުއްވިއިރު، ޝާޑުވެސް މުޙައްމަދު އިސްމާއިލް ހުރި ތަނުގައި ހާޒިރުވެ އިންކަމަށް އޭނާ ވިދާޅުވިއެވެ.

ޝާޑު ވިދާޅުވީ، މުޙައްމަދު އިސްމާއިލް ޔޫސުފް ނައީމަށްވެސް ގުޅުއްވި ކަމަށެވެ. އަދި އެ މުއާމަލާތް ހިންގައި ނިމި، ޔޫސުފް ނައީމަށް ލިބެންޖެހޭ ފައިސާވެސް ލިބިފައިވާކަން ފަހުން މުޙައްމަދު އިސްމާއިލްއާ ދިމާވެގެން ދެކެވުނު ވާހަކައިން އެނގުނުކަމަށްވެސް ޝާޑު ވިދާޅުވިއެވެ.

ދެން ކުރިއަށްދިޔައީ ދައުލަތުން ސުވާލު ކުރުމެވެ.

ހޮނިހިރު ދުވަހު މުޙައްމަދު އިސްމާއިލްގެ ހެކިބަސްވެސް ނަގާފައިވާއިރު، ހެކިބަސް ދެއްވަމުން އޭނާ ވިދާޅުވީ، އެއް ދުވަހު ރައީސް ޔާމީނު ގުޅުއްވައި ބޭންކް ރޭޓުން 1 މިލިއަން ޑޮލަރު ވިއްކާނެ މީހަކު ހޯދައިދިނުމަށް އެދިވަޑައިގެންނެވި ކަމަށެވެ. އެއީ 2015 ވަނަ އަހަރުގެ ފަހުކޮޅު ކަމަށާއި، އެގޮތަށް ރައީސް ޔާމީނު އެދިވަޑައިގަތުމުން ގުޅި މީހުންގެ ތެރޭގައި ޔޫސުފް ނައީމް ހިމެނޭކަމަށް އޭނާ ވިދާޅުވިއެވެ.

އެ ކޯލުތައް ކުރެއްވިއިރު އެތަނުގައި މެމްބަރު ޝާޑުވެސް ހުންނެވިކަމަށް އޭނާ ވިދާޅުވިއެވެ.