އދ. ގެ އާއްމު މަޖިލީހުގެ ރައީސްގެ ހައިސިއްޔަތުން ޝާހިދުގެ ފަހު ދަތުރުފުޅު ގަޔާނާއަށް
ޝާހިދު މަގާމުގެ ހުވާ ކުރެއްވީ 15 ސެޕްޓެމްބަރު 2022 ގައި
ޝާހިދު ގަޔާނާގެ ރައިސް އާ ބައްދަލު ކުރައްވަނީ
އދ. ގެ ޢާއްމު މަޖިލީހުގެ ރައީސްގެ ހައިސިއްޔަތުން އަބްދުﷲ ޝާހިދު ކުރައްވާ އެންމެ ފަހުގެ ދަތުރުފުޅުގައި ގަޔާނާއަށް ވަޑައިގަންނަވައިފިއެވެ.
ޝާހިދު ގަޔާނާއަށް ކުރައްވާ ރަސްމީ ދަތުރުފުޅުގައި އެޤައުމުގެ ރައީސް ޑރ. މުޙައްމަދު އިރުފާން ޢަލީއާ ވަނީ ބައްދަލުކުރައްވާފައެވެ. މިބައްދަލުކުރެއްވުމުގައި އދ. އިން ކުރަމުންދާ މަސައްކަތުގައި ގަޔާނާއިން އިސްކަންދޭ ދާއިރާތަކާއި ގުޅޭގޮތުން މަޝްވަރާކުރައްވާފައިވެއެވެ. އެގޮތުން މޫސުމީ ބަދަލުތަކާއި ދެމެހެއްޓެނިވި ތަރައްޤީއާއި ކާބޯތަކެތީގެ ރައްކާތެރިކަމާއި ޒުވާނުންނަށް ކުރިމަތިވެފައިވާ ދަތިތަކާއި ކުރިއަށްދާންހުރި ފުރުސަތުތަކާ ގުޅޭގޮތުން ދެބޭފުޅުން މަޝްވަރާކުރެއްވިއެވެ.
މިދަތުރުފުޅުގައި ޝާހިދުވަނީ ގަޔާނާގެ މިނިސްޓަރ އޮފް ފޮރިން އެފެއާޒް ހިއުގް ޓޮޑްއާވެސް ބައްދަލުކުރައްވާފައެވެ. މިބައްދަލުކުރެއްވުމުގައި ކުދި ޖަޒީރާ ޤައުމުތަކުގެ ލީޑަރޝިޕާއި އެފަދަ ޤައުމުތަކަށް ކުރިމަތިވާ ގޮންޖެހުންތަކާއި މޫސުމީ ބަދަލުތަކާއި ޒުވާނުންނާއި ގުޅޭދާއިރާތަކުގެ އިތުރުން އިންސާނީ ޙައްގުތަކާއި ގުޅޭގޮތުން ވަނީ މަޝްވަރާކުރައްވާފައެވެ.
އދ.ގެ އާއްމު މަޖިލީހުގެ ރައީސްގެ ޙައިސިއްޔަތުން ކުރައްވާ އެންމެ ފަހުގެ ދަތުރުފުޅުގައި ޝާހިދު ވަނީ ގަޔާނާގައި ހަރަކާތްތެރިވާ އދ. ގެ އޮފީހުގެ ޓީމާވެސް ބައްދަލުކުރައްވާފައެވެ.
އަބްދުﷲ ޝާހިދު އދ. ގެ އާއްމު މަޖިލީހުގެ 76 ވަނަ ސެޝަންގެ ރައީސް ކަމަށް ވަޑައިގެންނެވީ މިދިޔަ އަހަރުގެ ޖޫން މަހު ބޭއްވި އިންތިޚާބުގައި 191 މެމްބަރު ޤައުމުގެ ތެރެއިން 143 ޤައުމުގެ ވޯޓާއެކުގައެވެ. އެމަނިކުފާނު މަގާމުގެ ހުވާކުރެއްވީ މިދިޔަ އަހަރުގެ ސެޕްޓެމްބަރު މަހުގެ 15 ވަނަ ދުވަހުގައެވެ.
