ބޭންކު ރޭޓުން 1 މިލިއަން ޑޮލަރު ހޯދަން ޔާމީނު ގުޅުއްވި: މުޙައްމަދު އިސްމާއިލް
ޑޮލަރު ހޯދަން ޔާމީނު ގުޅުއްވީ 2015 ވަނަ އަހަރުގެ ފަހުކޮޅު
ވ އާރަށު ހިޔާނާތުގެ މައްސަލައިގައި ދިފާއީ ހެއްކެއްގެ ހެކިބަސް ނެގުން
ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން, މަގާމުގެ ނުފޫޒު ބޭނުންކުރައްވައިގެން ކުރީގެ ރައީސް އަބްދުﷲ ޔާމީން ރިޝްވަތު ނެންގެވިކަމަށް ތުހުމަތުކުރެވޭ މައްސަލައިގެ އަޑުއެހުމެއް ހޮނިހިރު ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި އަޑުއެހުމުގައި ހެއްކެއްގެ ގޮތުގައި ހާޒިރު ކޮށްފައިވަނީ ހޯރަފުށީ ދާއިރާގެ ކުރީގެ މެމްބަރު މުޙައްމަދު އިސްމާއިލްއެވެ.
އޭނާ ވިދާޅުވީ، ރައީސް ޔާމީނު ދަންނަތާ 15 ވަރަކަށް އަހަރުވާނެ ކަމަށެވެ. ޔާމީނަކީ އޭނާއަށް ވަރަށް އިތުބާރު ކުރައްވާ ގާތް ބޭފުޅެއް ކަމަށާއި، ފައިސާގެ މުއާމަލާތްތަކުގައި އެހީތެރިވެވަޑައިގަންނަވާ ބޭފުޅެއްކަމަށް ވެސް ވިދާޅުވިއެވެ.
މުޙައްމަދު އިސްމާއިލް ވިދާޅުވީ، އެއް ދުވަހު ރައީސް ޔާމީނު ގުޅުއްވައި ބޭންކް ރޭޓުން 1 މިލިއަން ޑޮލަރު ވިއްކާނެ މީހަކު ހޯދައިދިނުމަށް އެދިވަޑައިގެންނެވި ކަމަށެވެ. އެއީ 2015 ވަނަ އަހަރުގެ ފަހުކޮޅު ކަމަށާއި، އެގޮތަށް ރައީސް ޔާމީނު އެދިވަޑައިގަތުމުން ގުޅި މީހުންގެ ތެރޭގައި ޔޫސުފް ނައީމް ހިމެނޭކަމަށް އޭނާ ވިދާޅުވިއެވެ.
ޔޫސުފް ނައީމަކީ އޭނާ ކުޑައިރުއްސުރެ ދަންނަ، އަދި ޓޫރިޒަމް ދާއިރާގެ ފަރާތްތަކާ ގުޅުން އޮންނަ މީހެއްކަމަށް އޭނާ ވިދާޅުވިއެވެ.
މުހައްމަދު އިސްމާއިލް ވިދާޅުވީ، ރައީސް ޔާމީނަށްނަމަ އެ ރޭޓުގައި ޑޮލަރު ވިއްކަފާނެކަމަށް ޔޫސުފް ނައީމް އޭނާއަށް ގުޅާފައި ބުނި ކަމަށެވެ. ފަހުން އޭނާއާ ދިމާވެގެން އެ ފައިސާ ރައީސް ޔާމީނަށް ދެއްވިކަމަށް ޔޫސުފް ނައީމް އޭނާ ގާތުގައި ބުނިކަަމަށް ވެސް މުޙައްމަދު އިސްމާއިލް ހެކިބަސް ދެއްވިއެވެ.
ދެން ސުވާލުކުރީ ދައުލަތުންނެވެ. ދައުލަތުގެ ސުވާލުތަކަށް ޖަވާބު ދެއްވަމުން އޭނާ ވިދާޅުވީ، ޔޫސުފް ނައީމް ރައީސް ޔާމީނާ ޑޮލަރު ޙަވާލު ކުރެއްވީ ކިހިނެއްކަން އެނގިވަޑައިނުގަންނަވާ ކަމަށެވެ.
އެމްއެމްޕީއާރްސީ ޚިޔާނާތުގެ މައްސަލައެއްގައި ދިފާއީ ހެެއްކެއްގެ ގޮތުގައި މުޙައްމަދު އިސްމާއިލް ހެކިބަސް ދެއްވާފައިވާއިރު، "ފައިސާ ގޯނި" ހިއްޕަވައިގެން މެންބަރުންގެ އަރިހަށް ވަޑައިގެން އެ ފައިސާ ބެއްސެވި ކަމަށް 2016 ވަނަ އަހަރުގެ މާޗް މަހުގެ 9 ވަނަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި އޭނާ ވިދާޅުވެފައިވެއެވެ. އޭގެ ފަހުން އޭނާ ވަނީ ބައެއް ޓީވީ ޗެނަލްތަކުގައި ވެސް އެ ވާހަކަ ހަމައެގޮތަށް ދައްކަވާފަ އެވެ.
