ހިންނަވަރުގައި މިއަދު ހަވީރު ކުޅޭ ފުޓްބޯޅަ މެޗަށް ޗަމްޕާ ބްރަދާސްގެ ފަރާތުން ފައިސާގެ ބޮޑު އެހީއެއް ދީފިއެވެ.

ހިންވަރުގައި ކުރިއަށްދާ ހިންނަވަރު ފުޓްބޯލް ޗެމްޕިއަންޝިޕްގައި މިއަދު ކުޅޭނީ ފައިނަލް މެޗެވެ. މި މެޗުގައި ބައްދަލު ކުރަނީ ހިންނަވަރު ސްޕޯޓްސް ކްލަބާއި ނައިފަރު ޗެލްސީއެވެ. ހިންނަވަރު ސްޕޯޓްސް ކްލަބުގައި ރާއްޖޭގެ މަގުބޫލު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) ހިމެނެއެވެ.

މި ދެޓީމު ކުޅޭ މެޗު ބެއްލެވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވަޑައިގަންނަވާގޮތަށް ހަމަޖެހިފައިވާ ކަމަށާއި ރައީސް މިހާރުވެސް ހުންނެވީ އެ ރަށުގައި ކަމަށް މުބާރާތް އިންތިޒާމް ކުރާ ފަރާތުން މައުލޫމާތު ދެއެވެ.

މި މުބާރާތަކީ ހިންނަވަރު އިނޮވޭޓިވް ޔޫތު އެސޯސިއޭޝަން (ހިރިޔާ) ގެ ފަރާތުން އިންތިޒާމުކޮށްގެން ކުރިއަށްގެންދާ މުބާރާތެކެވެ. މި މުބާރާތުގައި ޖުމްލަ 5 ޓީމަކުން ވަނީ ބައިވެރިވެފައެވެ.

މި މުބާރާތުގެ ފައިނަލް މިއަދު ހަވީރު ކުޅޭއިރު ފައިނަލުގައި ޗެމްޕިއަން ޓީމަށް 50،000 ރުފިޔާގެ ފައިސާގެ އިނާމު ވަނީ ހުށަހަޅައިފައެވެ. ރަނަރަޕް ޓީމަށް ހުށަހަޅާފައިވަނީ 15،000 ރުފިޔާއެވެ.

މި އިނާމުގެ އިތުރުން ވިޔަފާރިވެރިޔާ މުޙައްމަދު މޫސާ (އުއްޗު) ވަނީ އޭނާގެ ވިޔަފާރި، ޗަމްޕާ ބްރަދާސްގެ ނަމުގައި ޗެމްޕިއަން ޓީމަށް 75،000 ރުފިޔާ ހުށަހަޅާފައެވެ.

މުބާރާތް އިންތިޒާމް ކުރުމުގައި ހަރަކާތްތެރިވާ އިސް ބޭފުޅަކު "ރާއްޖެ އެމްވީ" އަށް މައުލޫމާތު ދެއްވި ގޮތުގައި އުއްޗު އަކީ އެކި ކަންކަމުގައި އެ ފަރާތްތަކަަށް އެހީތެރިކަން ފޯރުކޮށްދެއްވަމުން އަންނަ ބޭފުޅެކެވެ. އެގޮތުން، ތަފާތު ކުޅިވަރުތަކުގެ އިތުރުން އިޖުތިމާއީ ކަންކަމުގައްޔާއި ރަށުގެ އިދާރާތަކަށް ވެސް އޭނާގެ އެހީތެރިކަން ލިބޭކަން ފާހަގަކުރެއްވިއެވެ.

މިއަދުގެ މެޗު އޮންނާނީ ހަވީރު 4:00ގައެވެ.