ހިންނަވަރު ފުޓްބޯލް ޗެލެންޖްގެ ލީގު ބުރުގެ އެއްވަނަ ނައިފަރު ޗެލްސީއަށް، އަދި ދެވަނަ ކްލަބް އޭދަފުއްޓަށް ލިބިއްޖެއެވެ.
ނައިފަރު ޗެލްސީ އެއްވަނަ ހޯދީ ހަތަރު މެޗުން ނުވަ ޕޮއިންޓް ހޯދައިގެންނެވެ. ނައިފަރު ޗެލްސީން ތިން މެޗު ކާމިޔާބުކުރިއެވެ. ދެވަނަ ކްލަބް އޭދަފުށި ހޯދީ ހަތް ޕޮއިންޓާއެކުއެވެ. މޮޅުވީ ދެ މެޗުންނެވެ. އެއް މެޗު އެއްވަރުވިއެވެ. އަދި އެއް މެޗުން ބަލިވިއެވެ. މުބާރާތުގެ ފައިނަލުގެ ފުރަތަމަ ޖާގައަށް ވާދަކުރާނީ މިދެޓީމެވެ. އާދިއްތަ ދުވަހު ހަވީރު މިދެޓީމް ވާދަކޮށް މޮޅުވާ ޓީމަކަށް ފައިނަލްގެ ފުރަތަމަ ޖާގަ ލިބޭނެއެވެ. ބަލިވާ ޓީމަށްވެސް ފައިނަލަށް ދިއުމުގެ އިތުރު ފުރުސަތެއް އޮންނާނެއެވެ.
ލީގުބުރުގެ ތިންވަނަ ހޯދި ހިންނަވަރު ސްޕޯރޓްސް ކްލަބާއި, ހަތަރުވަނަ ހޯދި ވެލިދޫ ސްޕޯރޓްސް ކްލަބް ހޯމަ ދުވަހު ހަވީރު ވާދަކުރާނެއެވެ. މި މެޗުން ބަލިވާ ޓީމެއް ކަޓާނެއެވެ. މޮޅުވާ ޓީމެއް ފައިނަލްގެ ދެވަނަ ޖާގަ ހޯދަން ވާދަކުރަން ޖެހޭނީ، އޭދަފުއްޓާއި ނައިފަރު ޗެލްސީ ވާދަކުރާ މެޗުން ބަލިވާ ޓީމާއެވެ. މުބާރާތުގެ ފައިނަލް މެޗު ކުޅޭނީ މިމަހުގެ 9 ވަނަ ދުވަހުއެވެ. މުބާރާތުގައި ވާދަކުރަނީ ފަސް ޓީމެވެ.
