ޕެނަލްޓީގައި ކްލަބް އޭދަފުށި ބަލިކޮށް, ހިންނަވަރު ފުޓްބޯލް ޗެމްޕިއަންޝިޕްގެ ފައިނަލުގެ ދެވަނަ ޖާގަ ހިންނަވަރުން ހޯދައިފިއެވެ.

ހިންނަވަރުގައި ކުރިއަށްދާ މުބާރާތުގެ ފައިނަލްގެ ދެވަނަ ޖާގަ ހިންނަވަރުން ހޯދީ ތިންވަނަ ސެމީފައިނަލް މެޗުގެ ފުރިހަމަވަގުތު ދެޓީމް 2-2 ން އެއްވަރުވުމުން ނަތީޖާ ނެރުމަށް ޖެހި ޕެނަލްޓީގައި ކުރި ހޯދައިގެންނެވެ. މެޗުގެ ފުރިހަމަ ވަގުތުގައި ހިންނަވަރުގެ ދެ ލަނޑު ޖެހީ އަހުމަދު ޒިޔާންއާއި ވިޖާހު އީސާއެވެ. ކްލަބް އޭދަފުށީގެ ދެ ލަނޑު ޖެހީ ހުސެއިން ޝަރީފްއާއި, އަހުމަދު ސުހެއިލްއެވެ. މެޗުގެ މޮޅު ކުޅުންތެރިއަކީ ޤައުމީ ޓީމްގެ ކުރީގެ ޑިފެންޑަރ އަހުމަދު އަބުދުالله (ލިލީ) އެވެ. އޭނާއަކީ ހިންނަވަރަށް އުފަން ކުޅުންތެރިއެކެވެ. ޕެނަލްޓީގައި ހިންނަވަރު ކުރި ހޯދީ 7-6 ނެވެ. މުބާރާތުގެ ލީގު ބުރުގައި ހިންނަވަރު އަތުން އޭދަފުށި ބޮޑު މޮޅެއް ހޯދިއެވެ.

މުބާރާތުގައި ވާދަކުރާ ހިންނަވަރު ޓީމްގެ ކޯޗަކީ ކުރީގެ އެއްވަނަ މިޑްފީލްޑަރ އަދި އޭ ލައިސަންސް ކޯޗު މުޙައްމަދު ނަޒީހެވެ. ކްލަބް އޭދަފުށްޓަށް އިރުޝާދު ދިނީ މިދިޔަ ސީޒަންގައި ކްލަބް އީގަލްސްގެ ކޯޗަކަށް ހުރި މުޙައްމަދު އާތިފްއެވެ.

ހުކުރު ދުވަހު ހަވީރު ކުޅޭ މުބާރާތުގެ ފައިނަލް މެޗުގައި ހިންނަވަރު ނިކުންނާނީ ނައިފަރު ޗެލްސީއާ ދެކޮޅަށެވެ.