ހިންނަވަރު ކައުންސިލުގެ ރައީސް ވިދާޅުވެދެއްވީ ރަށު ރައީސް ދެކެ ލޯބިވާ ސަބަބުތައް

ހިންނަވަރު ރައްޔިތުން ތިބީ ރަށު ރައީސް އިބްރާހީމް މުހައްމަދު ޞާލިހު އާއެކު ކަމަށާއި ރަށު ރައީސް ދެކެ ހިންނަވަރު ރައްޔިތުންވާ ލޯބި އެރަށު ކައުންސިލުގެ ރައީސް ހަސަން ޝާފިއު ވިދާޅުވެދެއްވައިފިއެވެ.

ރައީސް ޞާލިހުގެ އުފަންރަށް ހިންނަވަރުގައި ބުރާސްފަތި ދުވަހުގެ ރޭ ބޭއްވި "އުފާވެރި އަމާން ރާއްޖެ" ކެމްޕެއިން ޖަލްސާގައި ވާހަކަފުޅު ދައްކަވަމުން ޝާފިއު ވަނީ ރައީސް ޞާލިހުގެ ފަސް އަހަރު ތެރޭގައި ހިންނަވަރަށް ކޮށްދެއްވާފައިވާކަންކަން ވިދާޅުވެދެއްވާފައެވެ. ވާހަކަފައްޓަވަމުން ޝާފިއު ވިދާޅުވީ ހިންނަވަރު ރައްޔިތުން ތިބީ ރައީސް ޞާލިހު އާއެކުކަމަށެވެ. ހިންނަވަރުގައި އެހެން ފިކުރަކަށް ޖާގައެއް ނެތްކަމަށާއި އެހެން ބޭފުޅަކަށް ވޯޓު ދެވެން ނެތްކަމަށް ޝާފިއު ވިދާޅުވިއެވެ.

ޝާފިއު ވިދާޅުވީ އޮޅިގެންވެސް ހިންނަވަރުގެ ރައްޔިތުންނަށް ކެންޑިޑޭޓް ނަންބަރު 3 ގައި ނޫނީ ފާހަގަނުޖެހޭނެކަމަށެވެ.

ޝާފިއު ވިދާޅުވީ ހިންނަވަރުގެ ބަނދަރު އެއްކޮށް ހަލާކުވެގެންދިޔުމާއެކު ބަނދަރު ބޭނުންކުރަން ރައްޔިތުންނަށް ގިނަ ދަތިތަކާ ކުރިމަތިވަމުންދިޔަކަމަށެވެ. އެގޮތުން ފަޅުތެރެ ގަދަވެއްޖިއްޔާ ދޯންޏަކަށް ފަޅުގައި ނޯވެވޭ ކަމަށާއި ވާރޭވެހޭނަމަވެސް އުޅެން ޖެހެނީ އެފަދަ ހާލެއްގައި ކަމަށް ޝާފިއު ވިދާޅުވިއެވެ.

އެހެންކަމުން ރައްޔިތުން ރައީސް އަރިހުގައި އެދުނީ ބަނދަރެއް ހެދުމަށްކަމަށާއި ނަމަވެސް ރައީސްގެ ދުރުވިސްނުންފުޅާއެކު ހިންނަވަރުގައި ހަމައެކަނި ހައްދަވައިދެއްވީ ބަނދަރެއް ނޫންކަމަށާއި ޕޯޓެއްވެސް ހައްދަވައިދެއްވިކަމަށް ޝާފިއު ވިދާޅުވިއެވެ.

ޝާފިއު ދެން ވިދާޅުވީ ވާރޭކޮޅެއް ވެހިލާއިރު ރަށުގެ މަގުތަކުގައި ފެންބޮޑުވެ ރައްޔިތުން އުޅެންޖެހޭ ހާލުގެ ވާހަކައެވެ. އެކަން ހައްލުކުރުމަށް މިސަރުކާރުން ހިންނަވަރުގެ މަގުތައް ހައްދަވާ ސްޓޯމް ވޯޓަރ އެޅުމުގެ ކަންކަން ކުރަމުންދާކަމަށް ޝާފިއު ވިދާޅުވިއެވެ.

ޝާފިއު ވިދާޅުވީ މިސަރުކާރުގެ ފުރަތަމަ އަހަރު ހިންނަވަރުގައި ޒުވާނުންނަށް ބޭނުންވާނެ ފުޓް ބޯޅަ ދަނޑެއް ހެދުމުގެ މަސައްކަތް ފެށިކަމަށާއި މިހާރު ޒުވާނުން ކުޅެމުންދަނީ އެދަނޑުގައި ކަމަށެވެ. މީގެއިތުރުން ހޮސްޕިޓަލު އެޅުމަށް މިހާރު ސައިޓް ހަމަޖެހިފައިވާކަމަށާއި ކުރިޔަށް އޮތްތަނުގައި ރަށުގައި ތިބެގެން ސިއްހީ ޚިދުމަތްތައް ލިބެމުންދާނެކަމަށެވެ.

މީގެއިތުރުން ހިންނަވަރުން ގޯތި ނުދީ އޮންނަތާ 20 އަހަރު ފަހުން މިސަރުކާރުގައި ގޯތި ދޭން ފަށާފައިވާކަމަށް ޝާފިއު ވިދާޅުވިއެވެ. މިހާރުވެސް 229 ގޯތި ދޫކުރެވިފައިވާކަމަށާއި އިތުރު 180 ގޯތި ދޫކުރުމަށް އިއުލާންކޮށްފައިވާކަމަށް ޝާފިއު ވިދާޅުވިއެވެ.

ޝާފިއު ވިދާޅުވީ އިރާދަފުޅުން އެއްބުރުން ރައީސް ޞާލިހު އިންތިޚާބު ކާމިޔާބުކުރައްވާނެކަމަށާއި ދެވަނަ ދައުރަށް ހޮވޭ ފުރަތަމަ ރައީސަކަށް ވެގެންދާނީ ހިންނަވަރަށް އުފަން ރައީސް ޞާލިހުކަމަށެވެ.