މިލިޔުމުގައި މިބަލާލަނީ އަވަހާރަވި ރާނީ އެލިޒަބަތު ދެވަނައިގެ ހަޔާތްޕުޅުގައި ހިނގާފައިވާ މުހިންމު ކަންކަމަށެވެ. ރާނީ އެލިޒަބަތަކީ އިނގިރޭސި ތަހުތުގައި އެންމެ ގިނަ ދުވަސް ހޭދަކުރެއްވި ބޭފުޅާއެވެ.

ރާނީ އެލިޒަބަތު އުފަންވެވަޑައިގެންނެވީ 1926 ވަނަ އަހަރުގެ އޭޕްރީލް މަހުގެ 21 ވަނަ ދުވަހު ލަންޑަންގައެވެ. އެކަމަނާއަށް ރަސްކަމުގެ ތަހުތު ވާރުތަވީ އުމުރުފުޅުން 10 އަހަރުގައި 1936 ވަނަ އަހަރުގެ ޑިސެމްބަރު މަހުގެ 11 ވަނަ ދުވަހުއެވެ. އެއީ އޭރު ރަސްކަމުގައި ހުންނެވި އެކަމަނާގެ ބޮޑުބޭބޭފުޅު އެޑްވާޑް އަށްވަނަ ތަހުތު ދޫކޮށްލެއްވުމުންނެވެ. ބޮޑުބޭބޭފުޅު ތަހުތު ދޫކޮށްލެއްވުމުން ރަސްކަމަށް ވަޑައިގެންނެވީ އެކަމަނާގެ ބައްޕާފުޅު ޖޯރޖް ހަވަނަ އެވެ.

ރާނީ އެލިޒަބަތު ކައިވެނި ބައްލަވައިގަތީ 1947 ވަނަ އަހަރުގެ ނޮވެމްބަރު މަހުގެ 20 ވަނަ ދުވަހު އެވެ. އެއީ ގްރީސް އަމީރެއް ކަމުގައިވާ ފިލިޕް މައުންޓްބެޓަންއާ އެވެ. އެދެބޭފުޅުންގެ ހަތަރު ބޭފުޅުން ތިއްބަވައެވެ. އެއީ 1948 ވަނަ އަހަރު އުފަންވެ ވަޑައިގެންނެވި ޕްރިންސް ޗާލްސް އާއި 1950 ވަނަ އަހަރު އުފަންވެވަޑައިގެންނެވި ޕްރިންސެސް އޭން އާއި 1960 ވަނަ އަހަރު އުފަންވެ ވަޑައިގެންނެވި ޕްރިންސް އެންޑްރޫ އަދި 1964 ވަނަ އަހަރު އުފަންވެވަޑައިގެންނެވި ޕްރިންސް އެޑްވާޑްއެވެ.

ރާނީގެ ފިރިކަލުން ފިލިޕް ވަނީ 2021 ވަނަ އަހަރުގެ އޭޕްރީލް މަހުގެ ތެރޭގައި އުމުރުފުޅުން 99 އަހަރުގައި އަވަހާރަވެފައެވެ.

ރާނީ ތަހުތަށް ވަޑައިގެންނެވީ 1952 ވަނަ އަހަރުގެ ފެބްރުއަރީ މަހުގެ 6 ވަނަ ދުވަހު ބައްޕާފުޅު އަވަހާރަވުމާއި ގުޅިގެންނެވެ. އޭރު އެކަމަނާއި އުޅުއްވަނީ ޝާހީ ދަތުރުފުޅެއްގައި ކެންޔާގައެވެ. އޭގެފަހުން އިނގިރޭސިވިލާތާއި، އޮސްޓްރޭލިއާ، ކެނެޑާ، ނިއުޒީލޭންޑް، ދެކުނު އެފްރިކާ، ޕާކިސްތާން އަދި ސިލޯންގެ ރާނީކަމަށް ރަސްމީކޮށް ވަޑައިގެންނެވީ ޖޫން 1953 ވަނަ އަހަރުގެ ޖޫން މަހުގެ 2 ވަނަ ދުވަހުއެވެ. މިއީ ރަސްކަމަށް ހަވާލުވެވަޑައިގެންނެވިތަން ޓީވީން ދެއްކި ފުރަތަމަ ފަހަރުވެސްމެއެވެ.

ރާނީ ތަހުތަށް ވަޑައިގެންނެވިއިރު ޖޯސެފް ސްޓާލިން އާއި، މާއޯ ޒެޑޮންގ އަދި ހެރީ ޓްރޫމަން އަކީ ސޯވިއެޓް ޔޫނިއަން އާއި ޗައިނާ އާއި އެމެރިކާގެ ވެރިންނެވެ. އޭރު އިނގިރޭސި ބޮޑުވަޒީރުކަމުގައި ހުންނެވީ ވިންސްޓަން ޗަރޗިލްއެވެ.

ރާނީ ތަހުތުގައި އިންނަވަނިކޮށް އިނގިރޭސިވިލާތުގައި 15 ބޮޑުވަޒީރުން ބޮޑުވަޒީރުކަން ކުރައްވާފައިވެއެވެ. އެކަމަނާގެ ރާނީކަމުގައި އެމެރިކާގައި 14 ރައީސުން ރައީސްކަން ކުރައްވާފައިވެއެވެ.

2015 ވަނަ އަހަރުގެ ސެޕްޓެމްބަރު މަހުގެ 9 ވަނަ ދުވަހަކީ ރާނީ ތަހުތުގައި އިންނަވާތާ 63 އަހަރާއި 7 މަހާއި ދެ ދުވަހާއި ސޯޅަގަޑިއިރާއި 23 މިނެޓް ހިނގި ދުވަހެވެ. އެއީ އެކަމަނާގެ ހޫރު މާމަ ރާނީ ވިކްޓޯރިއާ ތަހުތުގައި އިންނެވި މުއްދަތު ކަޑައްތުކުރެއްވި ދުވަހެވެ. ރާނީ ވިކްޓޯރިއާ އަކީ ރާނީ އެލިޒަބަތުގެ ކުރިން އެންމެ ގިނަ ދުވަހު ތަހުތުގައި އިންނެވި ބޭފުޅާއެވެ.

އެކަމަނާވަނީ ތަހުތުގައި އިންނަވާތާ 70 އަހަރުފުރުން މިއަހަރުގެ ފެބްރުއަރީ މަހުގެ 6 ގައި ކުލަގަދަކޮށް ފާހަގަކުރައްވާފައެވެ.