އާރަށު މައްސަލައިގެ އަޑުއެހުމެއް ހޮނިހިރު ދުވަހަށް ތާވަލުކޮށްފި
ކްރިމިނަލް ކޯޓުން ވަނީ މިމައްސަލައިގެ އަޑުއެހުމެއް ހޮނިހިރު ދުވަހުގެ ހެނދުނު 10 ޖަހާއިރަށް ތާވަލުކޮށްފައި
ކުރީގެ ރައީސް އަބްދުﷲ ޔާމީން
ފެލިދެއަތޮޅު އާރަށް ތަރައްގީކުރުމަށް ހިންގި މުއާމަލާތުގެ ތެރެއިން, މަގާމުގެ ނުފޫޒު ބޭނުންކުރައްވައިގެން ކުރީގެ ރައީސް އަބްދުﷲ ޔާމީން ރިޝްވަތު ނެންގެވިކަމަށް ތުހުމަތުކުރެވޭ މައްސަލައިގެ އަޑުއެހުމެއް ހޮނިހިރު ދުވަހު ބޭއްވުމަށް ތާވަލުކޮށްފިއެވެ.
އެމައްސަލައިގެ އަޑުއެހުމެއް ބުރާސްފަތި ދުވަހުގެ ހެނދުނު 10:00ށް ތާވަލުކުރިއެވެ. އެހެންނަމަވެސް އަޑުއެހުން ކެންސަލްވިކަން 09:21 ގައި ކްރިމިނަލް ކޯޓުން ވަނީ މީޑިއާތަކަށް އަންގާފައެވެ.
ކްރިމިނަލް ކޯޓުން ބުނީ، ޢަބްދު ﷲ ޔާމީން ޢަބްދުލްޤައްޔޫމްގެ ބަލި ހާލަތު ހުރި ގޮތުން މި އަޑުއެހުން ކެންސަލް ކޮށްދިނުމަށް އެދި ސިޓީއެއް ހުށައަޅުއްވާފައިވާތީ ބުރާސްފަތި ދުވަހު ތާވަލުކުރެވިފައިވާ އަޑުއެހުން ކެންސަލް ކުރެވިފައިވާ ކަމަށެވެ.
އޭގެފަހުން ކްރިމިނަލް ކޯޓުން ވަނީ މިމައްސަލައިގެ އަޑުއެހުމެއް ހޮނިހިރު ދުވަހުގެ ހެނދުނު 10 ޖަހާއިރަށް ތާވަލުކޮށްފައިވާކަން ހާމަކޮށްފައެވެ. އާރަށު މައްސަލާގައި ޔާމީންގެ މައްޗަށް މަނީ ލޯންޑަރިންގެ ދައުވާއާއި ރިޝްވަތުގެ ދައުވާކުރާއިރު ރައްޔިތުންގެ މަޖިލީހުގެ ކުރީގެ މެންބަރު ޔޫސުފް ނައީމަށް ރިޝްވަތުގެ ދައުވާ ކުރެއެވެ.
މި މައްސަލައިގައި މިހާރު ކުރިއަށްދަނީ ދިފާއީ ހެކިންގެ ހެކިބަސް ނެގުމުގެ މަރުޙަލާއެވެ. އެގޮތުން ބުރާސްފަތި ދުވަހުގެ އަޑުއެހުމަކީވެސް މި މައްސަލައިގެ ދިފާއީ ހެކިންގެ ހެކިބަސް ނެގުމަށް ތާވަލުކުރި އަޑުއެހުމެކެވެ. ޔާމީންގެ ފަރާތުން ހަތް ހެއްކެއް ދިފާއީ ހެކިންގެ ގޮތުގައި ހުށަހަޅާފައިވެއެވެ.
މިހަފްތާގެ ބުދަ ދުވަހުވެސް މި މައްސަލައިގެއަޑުއެހުމެއްބޭއްވިއެވެ. މި އަޑުއެހުމުގައި ހެއްކެއްގެ ގޮތުގައި ހާޒިރުކޮށްފައިވަނީ ޕީޕީއެމްގެ ކައުންސިލް މެމްބަރު އަދި މިހާރުގެ މާލެ ސިޓީ ކައުންސިލްގެ ޑެޕިއުޓީ މޭޔަރު އަހުމަދު ނަރީޝްއެވެ.
އަޑުއެހުމުގައި ނަރީޝް ވިދާޅުވީ، ބޮޑު ކަމެއް ކޮށްދެއްވަން އެބަޖެހޭ ކަމަށް ވިދާޅުވެ ރައީސް ޔާމީނު އޭނާ ގ. ދޫވެއްސަށް ގެންދިޔަ ކަމަށެވެ. އަދި ގެންދިއުމަށްފަހު، ޔޫސުފް ނައީމް އަތުން ޑޮލަރުތަކެއް ބައްލަވައިގެންފައިވާ ކަމަށާއި، އެއަށްވާ ދިވެހި ފައިސާ ޔޫސުފް ނައީމާ ޙަވާލުކުރަން އެބަޖެހޭ ކަމަށް ރައީސް ޔާމީނު ވިދާޅުވިކަމަށް ނަރީޝްގެ ހެކިބަހުގައި ފާހަގަ ކުރެއްވިއެވެ. ނަރީޝް ވިދާޅުވި ގޮތުގައި އެއީ 1 މިލިއަން ޑޮލަރަށްވާ ފައިސާއެވެ.
އެ ދުވަހު އެ ފައިސާ ޙަވާލު ކުރެއްވުމަށްފަހު އެކަމާ ގުޅޭ ލިއުމުގައި އޭނާގެ ކުރިމަތީގައި ރައީސް ޔާމީނު ސޮއިވެސް ކުރެއްވި ކަމަށާއި، އޭނާ ޔޫސުފް ނައީމްއާ ބައްދަލު ކުރައްވަން ޖެހުނީ އެކަމުގައި ކަމަށް ނަރީޝް ވިދާޅުވިއެވެ. ނަރީޝް ވިދާޅުވި ގޮތުގައި އެ ފައިސާ ދުވަހުން ދުވަހަށް އޭނާ ވާނީ ޔޫސުފް ނައީމާ ޙަވާލު ކުރައްވާފައެވެ. އެއީ 500 ރުފިޔާގެ ބޮނޑިތަކެއްކަމަށް ނަރީޝް ވިދާޅުވިއެވެ.
ގ. ދޫވެހިން އެ ފައިސާ ގެންދިއުމުގެ ކުރިން ރައީސް ޔާމީނުގެ ހާޒިރުގައި އެ ފައިސާ ގުނާފައިވާނެ ކަމަށް އޭނާ ވިދާޅުވިއެވެ.
