ޗެލްސީގެ އައު ކޯޗަކަށް ގްރަހަމް ޕޮޓަރ ހަމަޖައްސައިފި
ޕޮޓާ އައީ 2019 ވަނަ އަހަރުން ފެށިގެން ބްރައިޓަންއަށް ކޯޗުކޮށްދެމުން
ޗެލްސީއާ އަލަށް ހަވާލުވި ގްރަހަމް ޕޮޓަރ
ޗެލްސީގެ އައު ކޯޗަކަށް ގްރަހަމް ޕޮޓަރ ހަމަޖައްސައިފިއެވެ.
ޕްރިމިއަރ ލީގުގައި ކުޅެމުން އަންނަ ބްރައިޓަންގެ ކޯޗުކަން ދޫކޮށްލުމަށްފަހު ޗެލްސީއާއި ޕޮޓަރ ހަވާލުވީ ބުރާސްފަތި ދުވަހުއެވެ. އުމުރުން 47 އަހަރުގެ ޕޮޓަރ އައީ 2019 ވަނަ އަހަރުން ފެށިގެން ބްރައިޓަންއަށް ކޯޗުކޮށްދެމުންނެވެ.
ޗެލްސީގެ ކޯޗުކަމުގައި ހުރި ތޯމަސް ޓުޗޭލް މަގާމުން ވަކިކުރީ ޗެމްޕިއަންސް ލީގުގެ ފުރަތަމަ މެޗުގައި ލަދުވެތި ގޮތަކަށް ޑައިނަމޯ ޒަގްރެބް އަތުން ބަލިވިފަހުންނެވެ.
ޕޮޓަރ ޗެލްސީއާ ހަވާލުވީ ފަސް އަހަރުގެ އެއްބަސްވުމެއްގައެވެ. ޗެލްސީއާ ގުޅުމަށްފަހު ޕޮޓަރ ވަނީ ޗެލްސީއަށް ކޯޗުކޮށްދިނުމަކީ ލިބޭ ވަރަށް ބޮޑު އުފަލަކާއި ފަޚުރެއްގެގޮތުގައި ފާހަގަކޮށްފައެވެ.
ޕޮޓަރއާ ގުޅޭގޮތުން ޗެލްސީގެ އޯނަރު ޓޮޑް ބޯލީ ބުނީ، ޕޮޓަރ ޓީމާ ގުޅުމަކީ ލިބޭ ވަރަށް ބޮޑު ހިތްހަމަޖެހުމެއް ކަމަށެވެ. އަދި އޭނާގެ ތަޖުރިބާއާއި ހުނަރާއެކު ޓީމު އިތުރު ހަރުފަތަކަށް ގެންދެވޭނެކަމުގެ އުންމީދު އެބައޮތް ކަމަށްވެސް ބޯލީ ބުންޏެވެ. މީގެ އިތުރުން، ކްލަބުގެ މެނޭޖުމެންޓުގެ ފަރާތުން ޕޮޓަރއަށް ފުރިހަމަ އެއްބާރުލުން ލިބޭނެކަން ބޯލީ ފާހަގަކުރިއެވެ.
ޗެލްސީގެ ކޯޗުކަމުގައި ޕޮޓަރއަށް ފުރަތަމަ ވާދަކުރަން ޖެހޭނީ ފުލަމްއާއެވެ. ޕްރިމިއަރ ލީގުގެ މި މެޗު އޮންނާނީ ހޮނިހިރު ދުވަހު ފުލަމްގެ ދަނޑުގައެވެ.
