ޓުޗެލް ވަކިކުރުމަށްފަހު ޗެލްސީގެ ކޯޗަކަށް ގްރަހަމް ޕޮޓާ ގެންނަން މަސައްކަތް ކުރަނީ

ހުސްވެފައިވާ ޗެލްސީގެ ކޯޗުކަމުގެ މަގާމަށް އިންގްލެންޑުގެ ގްރަހަމް ޕޮޓާ ގެންނަން މަސައްކަތް ކުރާ ކަމަށް މީޑިއާ ރިޕޯޓުތައް ބުނެފިއެވެ.

ޗެލްސީގެ ކޯޗުކަމުގެ މަގާމު ހުސްވެފައިވަނީ އެ މަގާމުގައި ހުރި ތޯމަސް ޓުޗެލް ވަކިކުރުމުންނެވެ. ޓުޗެލް ވަކިކޮށްފައިވަނީ މި ސީޒަންގެ ޗެމްޕިއަންސް ލީގުގެ ފުރަތަމަ މެޗުގައި ޗެލްސީއަށް ލިބުނު ލަދުވެތި ބައްޔަށްފަހުއެވެ. އުމުރުން 47 އަހަރުގެ ޕޮޓާ މި ވަގުތު ހުރީ ބްރައިޓަންގެ ކޯޗުކަމުގެ މަގާމުގައެވެ.

މީޑިއާ ރިޕޯޓުތައް ބުނާ ގޮތުގައި ޗެލްސީން ކޯޗުކަށް ގެންނަން ބޭނުންވާ މީހުންގެ ލިސްޓުގައި ހަތަރު މީހެއްގެ ނަން އޮތް ކަމަށް ބޭރުގެ މީޑިއާތަކުގައި ވެއެވެ. އޭގެ ތެރޭގައި ޕޮޓާގެ އިތުރުން ކުރިން ޕެރިސް ސެއިންޓް ޖާމަން (ޕީއެސްޖީ)އަށް ކޯޗުކަން ކޮށްދިން މައިރީސިއޯ ޕޮޗެޓީނޯ އާއި ރެއާލް މެޑްރިޑަށް ކޯޗުކަން ކޯށްދިން ޒިނެދީން ޒިދާން ހިމެނޭ ކަމަށް ރިޕޯޓުތައް ބުނެއެވެ. މީގެ އިތުރުން ރިޕޯޓުތައް ބުނާ ގޮތުގައި ޗެލްސީން އިސްކަމެއް ދެނީ ޕޮޓާ އަށެވެ. އަދި ޗެލްސީއާއި ބްރައިޓަންއާ ދެމެދު އެކަމުގެ މަޝްވަރާތައް ކުރެވެމުންދާއިރު، ޕޮޗެޓީނޯގެ ނަން ވެސް ވަނީ ޗެލްސީގެ އޯނަރު ޓޮޑް ބޮއެލީއާ ހަމައަށް ގޮސްފައި ކަމަށް ރިޕޯޓުތައް ބުނެއެވެ.

ނަމަވެެސް ރިޕޯޓުތަކުގައިވާ ގޮތުން ޗެލްސީން ހަމައެކަނި އިސްކަމެއް ދޭ ކެންޑިޑޭޓަކީ ޕޮޓާއެވެ. މީގެ އިތުރުން ޗެލްސީން އަންނަނީ ޕޮޓާ އަށް ދިގު މުއްދަތުގެ އެއްބަސްވުމެއް ހުށަހެޅުމަށް ތައްޔާރުވަމުން ކަމަށް ވެސް ރިޕޯޓުތަކުގައިވެއެވެ. ޗެލްސީ އާއި ބްރައިޓަންއާ ދެމެދު ކުރިއަށް ދާ މަޝްވަރާތަކުގެ ނަތީޖާ ޕޮސިޓިވްކަމާއި، ޗެލްސީގެ ކޯޗުކަމަށް ޕޮޓާ ވަރަށް އަވަހަށް ހަމަޖައްސާނެ ކަމަށް ވެސް ރިޕޯޓުތައް ބުނެއެވެ.

ޓުޗެލް ވަކިކުރިކަން ހާމަކޮށް ޗެލްސީން ނެރުނު ބަޔާނެއްގައި ބުނީ ކުލަބުގެ އައު އޯނަރޝިޕުން ކުލަބާ ހަވާލުވިތާ 100 ދުވަސް ވެގެންދާއިރު، ކުލަބުގެ ކުރިމަގަށް މިއީ މި ނިންމުން ނިންމަން ޖެހުނު އެންމެ ރަނގަޅު ވަގުތު ކަމަށެވެ.