ކޮންޓޭގެ ތައުރީފު ރިޗާލިސަންއަށް

ޓޮޓެންހަމްގެ ފޯވާޑް ރިޗާލިސަން އަށް އެ ޓީމުގެ ކޯޗު އެންޓޯނިއޯ ކޮންޓޭ ވަރަށް ބޮޑަށް ތައުރީފުކޮށްފިއެވެ.

ޔުއެފާ ޗެމްޕިއަންސް ލީގުގެ ގްރޫޕް ސްޓޭޖުގެ ފުރަތަމަ ފުޓުބޯޅަ މެޗުގައި މާސޭއާ ބައްދަލުކުރި މެޗުން ޓޮޓެންހަމް މޮޅުވޯ ރިޗާލިސަން ޖެހި ދެ ލަނޑުންނެވެ. މެޗަށްފަހު ކޮންޓޭ ބުނީ ރިޗާލިސަންއާ މެދު އޭނާ ނުހަނު އުފާވާ ކަމަށާއި، ރެޔަކީ ރިޗާލިސަން އަށް ހައްގު ރެޔެއް ކަމަށެވެ.

މީގެ އިތުރުން ކޮންޓޭ ބުނީ ޓޮޓެންހަމުން ރިޗާލިސަންގެ ސޮއި ހޯދި ދުވަހު އޭނާ ދެއްކި ވާހަކަ އަދިވެސް ހަނދާނުގައި ހުންނަ ކަމަށެވެ. ޗެމްޕިއަންސް ލީގުގައި ކުޅުމާއި، މުބާރާތުގެ މިއުސިކް އަޑު އެހުމަށް ކެތްމަދުވެފައި ހުރި ކަމަށް އެދުވަހު ރިޗާލިސަން ބުނު ކަމަށް ކޮންޓޭ ބުންޏެވެ. އޭނާ ބުނީ އެއީ މާ ބޮޑު ވާހަކައަކަށް ނުވި ނަމަވެސް، އެއީ އޭނާ އަށް މުހިންމު ބަސްތަކެއް ކަމަށެވެ.

ކޮންޓޭ ބުނީ މެޗުގެ ކުރިން ރިޗާލިސަންއާ އޭނާ ވާހަކަ ދެއްކި ކަމަށެވެ. އެވަގުތު ރިޗާލިސަން ކުރި ބުނި ވާހަކަ ހަނދާން ކޮށްދިން ކަމަށް ކޮންޓޭ ބުންޏެވެ. އަދި މާސޭއާ ދެކޮޅަށް ކުޅޭ މެޗަކީ ރިޗާލިސަންއަށް އޮތް ވަަރަށް ރަނގަޅު ފުރުސަތެއް ކަމުގައި ބުނި ކަމަށެވެ. މެޗުގައި އެންމެ މޮޅު ކުޅުން ދައްކައިދިނުމަށް ރިޗާލިސަން ކިބައިން އެދުނު ކަން ފާހަގަކުރަމުން ކޮންޓޭ ބުނީ، އުނދަގޫ މެޗެއްގައި ރިޗާލިސަން ބޮޑު އެހީއެއް ވެދީފިކަމަށެވެ.

މީގެ އިތުރުން ކޮންޓޭ ބުނީ ރިޗާލިސަންގެ ސޮއި ހޯދި އެންމެ ބޮޑު ސަބަބަކީ ތަފާތު ތިން މަގާމަކަށް ކުޅެވޭ ކުޅުންތެރިޔަކު ޓީމަށް ބޭނުންވުމުން ކަމަށެވެ. ކޮންޓޭ ބުނީ އެކަމާ ހުރެ ނިންމުނީ ރަނގަޅު ނިންމުމެއް ކަމަށާއި، ރިޗާލިސަން އަކީ ލިބުނު ރަނގަޅު ކުޅުންތެރިޔެއް ކަމަށެވެ.

އެވަޓަން ދޫކޮށް ރިޗާލިސަން ޓޮޓެންހަމަށް ބަދަލުވީ މިއަހަރުއެވެ. އޭނާ ވަނީ މިހާތަނަށް އެ ޓީމަށް ކުޅެދިން ހަ މެޗުގައި ދެ ލަނޑު ޖަހާފައެވެ.