ނުކުޅެ ޗެމްޕިއަންކަން ބޭނުމެއްނޫން، މިއީ ވަރަށްބޮޑު ގެއްލުމެއް- ކްލަބް އޭދަފުށި

މުބާރާތުގައި ނުކުޅެ, ވާދަނުކޮށް, އަނެއްބުރަށް ދާންވެސް އަދި ޗެމްޕިއަންކަންވެސް ބޭނުންނުވާކަމަށް ކްލަބް އޭދަފުށިން ބުނެފިއެވެ.

ކްލަބް އޭދަފުށިން މިހެން ބުނެފައިމިވަނީ ސެންޓްރަލް ލީގުގެ ގްރޫޕް އޭގައި ބައިވެރިވި ތިން ޓީމްގެ ތެރެއިން ދެ ޓީމް ފަހު ވަގުތު މުބާރާތުން ވަކިވުމުން, މެޗެއް ނުކުޅެ ސެންޓްރަލް ލީގުގެ ފުރަތަމަ ޑިވިޝަންގެ ޖާގަ ލިބިފައިވަނިކޮށެވެ. އެ ގްރޫޕްގައި ވާދަކުރަން އޮތް ހިންނަވަރާއި ނައިފަރު މުބާރާތުން ވަކިވީ މުބާރާތުގެ އެ ގްރޫޕްގެ މެޗުތައް ފަށަން ގާތްވެފައިވަނިކޮށެވެ. މިމަހުގެ ފުރަތަމަ ހަފުތާގައި ފަށަން އޮތް އެ ގްރޫޕްގެ މެޗުތައް ކުޅޭގޮތަށް އޮތީވެސް އޭދަފުށި ފުޓްބޯޅަ ސްޓޭޑިއަމްގައެވެ.

ކްލަބް އޭދަފުށީގެ ބޯޑް މެންބަރު އަދި ކުރިން މޮޅަށް ކުޅުނު އަބްދުލްމަޖީދު ހަސަން ބުނީ، ނުކުޅެ ޗެމްޕިއަންކަން ހޯދަން ކްލަބް އޭދަފުށިން ބޭނުންނުވާކަމަށެވެ. ބޭނުންވަނީ ވާދަކޮށްގެން މޮޅުވެގެން ޗެމްޕިއަންކަން ހޯދަން ކަމަށާއި, ތައްޔާރުވީވެސް އެވިސްނުމުގައިމަމަށެވެ.

ކްލަބް އޭދަފުށިން މުބާރާތަށް ތައްޔާރުވަމުން އައީ އޭ ލައިސަންސް ކޯޗު މުހައްމަދު އާތިފްގެ ބެލުމުގެ ދަށުންނެވެ. އަދި ބިދޭސީ ތިން ކުޅުންތެރިން ގެނެސް ޓީމް ވަރުގަދަކުރިއެވެ. އެކަމަކު މިހާރު ކޯޗާއި ބިދޭސީ ތިން ކުޅުންތެރިންވެސް ވަނީ ފޮނުވާލާފައެވެ. އެކަމަށް ބޮޑު ޚަރަދުތަކެއް ހިނގާފައިވުމުން، އެއީ ކްލަބް އޭދަފުއްޓަށް ލިބުނު ވަރަށް ބޮޑު ގެއްލުމެއްކަމަށް އެކްލަބުން ބުނެއެވެ. އަދި އެކްލަބްގެ ކުޅުންތެރިންނަށް ކުޅުމުގެ ފުރުސަތު ހޯދައިނުދެވުމަކީ މާބޮޑު ގެއްލުމެއްގެގޮތުގައި ކްލަބުން ގަބޫލުކުރެއެވެ.

މީގެއިތުރުން މުބާރާތް ހޯސްޓްކުރަން އޭދަފުށި ސްޓޭޑިއަމް ރަނގަޅު ހާލަތަށް ގެނައުމަށްޓަކައި، އެސްޓޭޑިއަމް އަޅައިދެއްވި އަހުމަދު ނަޒީރު ބޮޑު ހޭދައެއްކުރެއްވި ކަމަށާއި, މަސައްކަތް ނިންމުމަށް 24 ގަޑިއިރު މަސައްކަތްކުރި ކަމަށް ކްލަބުން ބުނެއެވެ. ނަމަވެސް ފަހުވަގުތު މުބާރާތް ނުކުޅެވޭކަން އެނގުން އެއީ ވަރަށް ބޮޑު ދެރައަކާއި ހިތްދަތިކަމެއްކަމަށް އަބުދުލްމަޖީދު ބުންޏެވެ.

ކްލަބް އޭދަފުށި ސެންޓްރަލް ލީގުގެ ދެވަނަ ޑިވިޝަނުން ޖާގަ ހޯދީ އޯޕަން ރައުންޑްގައި ވާދަކޮށް ކުރިހޯދައިގެންނެވެ.