ށ އަތޮޅުގައި އާރްޓީއެލް ފެރީގެ ޚިދުމަތް ރަސްމީކޮށް ފަށައިފި

ރާއްޖެ ޓްރާންސްޕޯޓް ލިންކުގެ ދަށުން ށ އަތޮޅުގައި ހައި ސްޕީޑް ފެރީގެ ޚިދުމަތް ރަސްމީކޮށް ފަށައިފިއެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ށ އަތޮޅުގައި މި ޚިދުމަތް ފެށީ އޮގަސްޓް 30ގައެވެ. ނަމަވެސް މި ހަފުތާގެ އަންގާރަ ދުވަހާ ހަމައަށް އެ ޚިދުމަތް ދެމުން އައީ ޓެސްޓް ދަތުރުތަކުގެ ގޮތުގައެވެ. މި ދަތުރުތައް އެ ކުންފުނިން ކޮށްފައިވަނީ ހިލެއެވެ. މިއީ އެ ކުންފުނިން އާރްޓީއެލްގެ ހުރިހާ ޚިދުމަތެއްވެސް ފެށުމުގެގޮތުން، ރޫޓުތަކާއި ޝެޑިއުލްތަކަށް އަހުލުވެރިކުރުމުގެގޮތުން ކުރަމުން އަންނަ ދަތުރުތަކެކެވެ.

Advertisement

ރަސްމީކޮށް މިޚިދުމަތް ފެށުމާއެކު، ދެން ށ އަތޮޅުގައި ކުރާ ދަތުރުތަކަށް އަގު ނަގާނެއެވެ. ނަމަވެސް 65 އަހަރުން މަތީގެ މީހުންނާއި، 3 އަހަރުން ދަށުގެ ކުޑަކުދިންނާއި، ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ ދަފްތަރުގައި ހިމެނޭ، ޚާއްސަ އެހީއަށް ބޭނުންވާ ފަރާތްތަކަށް އަދިވެސް ހިލޭ ދަތުރުކުރެވޭނެއެވެ.

އާރްޓީއެލްއިން ށ އަތޮޅުގެ 7 ރޫޓެއްގައި ފެރީގެ ޚިދުމަތް ދޭނެއެވެ. އެއީ ބިލެތްފަހި-ކުޅުދުއްފުށި ސިޓީ ރޫޓާއި، ބިލެތްފަހި-ފުނަދޫ ރޫޓާއި، ނޫމަރާ-ބިލެތްފަހި ރޫޓާއި، ކަނޑިތީމު-ބިލެތްފަހި ރޫޓާއި، ފީވަށް-ފުނަދޫ ރޫޓާއި، ފުނަދޫ-ކުޅުދުއްފުށި ސިޓީ ރޫޓާއި، މަރޮށި-ފުނަދޫ ރޫޓެވެ. މި ދަތުރުތަކުގައި 4 ފެރީއެއް ބޭނުންކުރާނެއެވެ.

އެމްޓީސީސީން ބުނީ، ރަސްމީކޮށް މި ދަތުރުތައް ފެށުމާއެކު ކައުންސިލް މެދުވެރިކޮށް ޖާގަ ދޫކުރުން ހުއްޓާލާފައިވާކަމަށެވެ. މި ޚިދުމަތް ހޯދަން ބޭނުންވާ ފަރާތްތަކުން ދެން ޓިކެޓް ބުކްކުރަންޖެހޭނީ އެމްޓީސީސީން އެކަމަށް ޚާއްސަކޮށްފައިވާ ވެބްސައިޓް ނުވަތަ އާރްޓީއެލް މޮބައިލް އެޕްލިކޭޝަން މެދުވެރިކޮށެވެ. ކިޔުއާރް ޓިކެޓް ނަގާނެގޮތުގެ މައުލޫމާތު އާރުޓީއެލްގެ ޔޫޓިއުބް ޗެނަލާއި ސޯޝަލް މީޑިއާއިން ލިބޭނެއެވެ.

ށ އަތޮޅުގައި އާރްޓީއެލް ފެރީ ދަތުރުތައް ރަސްމީކޮށް ފެށުމާއެކު "އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯރކް"ގެ ދަށުން، ޒޯން 1ގައި ހިމެނޭ ހުރިހާ ރަށެއްގައި މި ޚިދުމަތް ދޭންފެށުނީއެވެ. މިހާތަނަށް މިޚިދުމަތް ފަށާފައިވަނީ ހއ އާއި ހދ އަތޮޅުގައެވެ.

މި މަޝްރޫއު ހިންގުމަށް ހަމަޖެހިފައިވަނީ 3 ފިޔަވައްސަކަށް ބަހާލައިގެންނެވެ. ފުރަތަމަ ފިޔަވަހީގެ ޚިދުމަތް ފަށާފައިވާއިރު ދެވަނަ ފިޔަވަހީގައި ނ، ރ، ބ، ޅ، ގއ، ގދ، ޏ، އަދި ސ ގުޅާލާނެއެވެ. އަދި ތިންވަނަ ފިޔަވަހީގައި ކ، އއ، އދ، ވ، މ، ފ، ދ، ތ އަދި ލ ގުޅާލުމަށް ވަނީ ނިންމާފައެވެ. މި މަޝްރޫއުގެ ދަށުން ޖުމްލަ 188 ރަށް ގުޅާލުމަށް ވަނީ ހަމަޖެހިފައެވެ.

އަންނަ އަހަރުގެ އޮގަސްޓް މަހު، ފެރީގެ ނިޒާމުން އިތުރު 5 އަތޮޅު ގުޅާލެވޭނެކަމަށް މިނިސްޓަރ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވަނީ ވިދާޅުވެފައެވެ.