މަންތާ އެއަރގެ ދަތުރުތަކާއެކު ހޯރަފުށީގެ ފަތުރުވެރިކަމަށް އައު އުންމީދެއް

މަންތާ އެއަރއިން ހއ. ހޯރަފުއްޓަށް ޗާޓަރޑް ޝެޑިއުލް ދަތުރުކުރަން ފެށުމަކީ ހޯރަފުއްޓާއި އެ ސަރަހައްދުގެ ފަތުރުވެރިކަމަށް އިތުރު އުންމީދެއް ގެނެސްދިންކަމެއް ކަަމަށް ހޯރަފުށީ ކައުންސިލުން ބުނެފިއެވެ.

ހޯރަފުށީ ކައުންސިލްގެ ރައީސް މުޙައްމަދު ވަޙީދު "ރާއްޖެއެމްވީ"އަަށް މައުލޫމާތުދެއްވަމުން ވިދާޅުވީ، މަންތާ އެއަރގެ ދަތުރުތައް އެރަށަށް ފެށުމަކީ، އެ ސަރަހައްދުގެ ރިސޯޓްތަކާއި، ހޯމްސްޓޭ ވިޔަފާރިއާއި ގެސްޓް ހައުސް ވިޔަފާރިތަކަށް ލިބޭ ވަރަށް ބޮޑު ހިތްހަމަޖެހުމަކަށް ވާނެކަމަށް ގަބޫލުފުޅުކުރައްވާ ކަމަށެވެ. އަދި ހޯރަފުއްޓަށް ދަތުރުތައް ފެށުމަކީ އެ ރަށަށް ދަތުރުކުރާ ފްލައިޓްތައް މަދުވުމުން ދިމާވާ މައްސަލަތަކަށް ހައްލު ހޯދުމަށް ލިބޭ ފުރުސަތެއް ކަމަށްވެސް އޭނާ ވިދާޅުވިއެވެ.

ހޯމަ ދުވަހު މަންތާ އެއަރއިން ހޯރަފުއްޓަށް ދަތުރުތައް ފަށާފައިވަނީ ޖޭއޭ މަނަފަރާއި، ރީޖަނަލް އެއަރޕޯޓްސް ކޮމްޕެނީ ލިމިޓެޑް (އާރްއޭސީއެލް) އަދި މަންތާ އެއަރއިން ވެފައިވާ އެއްބަސްވުމެއްގެ ދަށުންނެވެ. މި ކަމާގުޅޭގޮތުން "ރާއްޖެ އެމްވީ"އަށް މައުލޫމާތުދެއްވަމުން އާރްއޭސީއެލްގެ ޖެނެރަލް މެނޭޖަރ ކޮމަރޝަލް މުޙައްމަދު މަޢުރޫފް ވަނީ، މަންތާއިން ހޯރަފުއްޓަށް ދުވާލަކު 2 ދަތުރުކުރުމަށް ހަމަޖެހިފައިވާކަން ފާހަގަކުރައްވާފައެވެ. މިއީ އެއަރޕޯޓުން ޚިދުމަތް ހޯދަމުންދާ ފަސިންޖަރުންނަށް އުފާވެރި ޚަބަރެއްކަމަށް އޭނާ ވިދާޅުވިއެވެ.

މިކަމާގުޅޭގޮތުން މަންތާ އެއަރގެ ސީއީއޯ މުޙައްމަދު ޚަލީލް "ރާއްޖެ އެމްވީ"އަށް ވިދާޅުވީ، މިވަގުތު މަންތާއިން ހޯރަފުއްޓަށް ދުވާލަކު ދެ ދަތުރު ކުރިނަމަވެސް، ޑިމާންޑް އޮންނަ ވަރަކަށް ބެލުމަށްފަހު އެ އަދަދަށް ބަދަލުގެންނަވާނެކަމަށެވެ. އަދި ހޯރަފުއްޓަށް އެ އެއަރލައިންގެ ދަތުރުތައް ފަށާފައިވަނީ ކަމާބެހޭ ފަރާތްތަކާއެކު މަހެއްހާދުވަސް ވަންދެން ކުރި މަޝްވަރާތަކަށް ފަހުގައި ކަމަށްވެސް އޭނާ ވިދާޅުވިއެވެ.

މަންތާ އެއަރއިން ވަނީ ހޯރަފުށީގައި އެ އެއާލައިންގެ ޚިދުމަތްތައް ވީ އެންމެ ފުރިހަމައަަށް ދިނުމަށް މަސައްކަތްކުރާނެކަން ފާހަގަކޮށްފައެވެ. އަދި މިއީ ރާއްޖެއަށް އެ އެއަރލައިންގެ ޚިދުމަތް ފުޅާކުރުމަށް ކުރާ މަސައްކަތަށް ލިބުނު ރަނގަޅު ކުރިއެރުމެއްކަމަށްވެސް އެ އެއަރލައިނުން ވަނީ ފާހަގަކޮށްފައެވެ. ޖޭއޭ މަނަފަރުން ވަނީ މަންތާ އެއަރއާއެކު ހޯރަފުއްޓަށް ދަތުރުކުރުމަށްޓަކައި، އެ ކުންފުންޏާއި މަންތާއާ ދެމެދު ވަރަށް ރަނގަޅު ގުޅުމެއް ގާއިމުވެފައިވާކަން ފާހަގަކޮށްފައެވެ.

މަންތާ އެއަރއިން ހޯރަފުއްޓަށް ދަތުރުތައް ފަށާފައިވަނީ ޖޭއޭ މަނަފަރާއި ރީޖަނަލް އެއަރޕޯޓްސް ކޮމްޕެނީ ލިމިޓެޑް (އާރްއޭސީއެލް)، އަދި މަންތާ އެއަރއިން ވެފައިވާ އެއްބަސްވުމެއްގެ ދަށުންނެވެ. އެ ޚިދުމަތް ފަށާފައި ވަނީ ހޯރަފުށީ ދާއިރާގެ މެމްބަރު އަހުމަދު ސަލީމާއި، ޖޭއޭ މަނަފަރާއި، އާރްއޭސީއެލް އަދި މަންތާ އެއަރއާއެކު މަހެއްހާ ދުވަސް ވަންދެން ކުރި މަޝްވަރާތަކަކަށް ފަހުގައެވެ.