ޑޮލަރުގެ ބަދަލުގައި ދިވެހި ރުފިޔާއިން މުސާރަ ދިނުމަށް ނިންމުމާއި ގުޅިގެން މަންޓާ އެއަރގެ މުވައްޒަފުން ވެސް އިހުތިޖާޖަށް ނުކުމެދާނެ ކަމުގެ ބިރު ބޮޑުވެއްޖެއެވެ.

އެނގިފައިވާ ގޮތުގައި މަންޓާ އެއަރގެ މުވައްޒަފުން ވަނީ މިކަމާއި ގުޅޭ ގޮތުން ބައްދަލުވުމެއް ބާއްވާފައެވެ. މި ބައްދަލުވުން ބާއްވާފައި މި ވަނީ ޖުލައި 26 ގައި ޓްރާންސް މޯލްޑިވިއަން އެއަރވޭސް (ޓީއެމްއޭ)ގެ މުވައްޒަފުން އިހުތިޖާޖު ކުރަން ނިންމާފައިވާކަމަށް ބުނުމާއި އެކު އެ މުވައްޒަފުންނަށް އަލުން ޑޮލަރުން ފައިސާ ދޭން ޓީއެމްއޭ އިން ނިންމާފައިވާ ދަނޑިވަޅެއްގައެވެ.

ރާއްޖެއެމްވީ އަށް އިތުބާރު ހުރި ގޮތަކަށް މައުލޫމާތު ލިބިފައިވާ ގޮތުގައި، މި ބައްދަލުވުމުގައި މަންޓާ އެއަރގެ މުވައްޒަފުން ވަނީ މި މައްސަލަ އާއި ގުޅިގެން ވަރަށް ބޮޑަށް ކަންބޮޑުވުން ފާޅުކޮށްފައެވެ. މުވައްޒަފުން ޤަބޫލު ކުރާ ގޮތުން މި ބަދަލަކީ މުވައްޒަފުންނަށް ލިބެމުން އައި މުސާރަ ވެސް ކުޑަ ވާނެ ކަމެކެވެ. އަދި މި ކަމަށް ވަގުތުން ވަގުތަށް ހައްލެއް ހޯދާދިނުމަކީ މުވައްޒަފުންގެ ޑިމާންޑެކެވެ. ޚާއްސަކޮށް ތަކެތީގެ އަގު އުފުލެމުންދާ އިރު މިފަދަ ބަދަލެއް މުސާރަ އަށް ގެނައުން ގިނަ މުވައްޒަފުން ބަލަ އެއް ނުގަނެއެވެ.

ރާއްޖެއެމްވީ އަށް އެނގިފައިވާ ގޮތުގައި މި ބައްދަލުވުން ބާއްވާފައިވާކަން މަންޓާ އެއަރގެ މެނޭޖްމެންޓުގެ ސަމާލުކަމަށް ވަނީ އައިސްފައެވެ. މީގެ ކުރިން މަންޓާ އެއަރ އިން ބުނީ ޑޮލަރުން މުސާރަ ދިނުމުގެ ބަދަލުގައި ރުފިޔާ އިން މުސާރަ ދޭން ނިންމަން ޖެހުނީ އެ ނޫން ގޮތެއް ނެތުމުން ކަމަށެވެ. މިވަގުތުގެ ހާލަތަށް ބަލާ އިރު މި މައްސަލަ ހައްލު ނުކޮށްފި ނަމަ މަންޓާ އެއަރގެ މުވައްޒަފުން ވެސް އިހުތިޖާޖްކުރުމުގެ ފުރުސަތު ބޮޑެވެ.

މަންޓާ އެއަރގެ މުވައްޒަފުންގެ ކަންބޮޑުވުންތައް އިތުރުވެފައިވާއިރު، އެއަރލައިނެއްގެ މުވައްޒަފުން އިހުތިޖާޖު ކުރުމަކީ އެއީ ކަންބޮޑުވާ ކަމެއް ކަމަށް މޯލްޑިވްސް އެސޯސިއޭޝަން އޮފް ޓްރެވަލް އެޖެންޓް އެންޓް ޓުއަ އޮޕަރޭޓާސް (މަޓާޓޯ)އިން ވަނީ ބުނެފައެވެ. އެގޮތުން ޓީއެމްއޭގެ މުވައްޒަފުން އިހުތިޖާޖު ކުރުމަށް ނިންމި ނިންމުމާއި ގުޅިގެން ނެރުނު ބަޔާނެއްގައި، ފަތުރުވެރިން ކުރާ ދަތުރުތަކަށް އަސަރު ކުރުމަކީ ރާއްޖޭގެ މުޅި ޓޫރިޒަމްގެ އަގު ވެއްޓިދާނެ ކަމެއް ކަމަށް އެ ޖަމިއްޔާ އިން ފާހަގަކޮށްފައިވެއެވެ.

މިފަދަ އިހުތިޖާޖެއް ކުރުމަކީ، ފަތުރުވެރިންގެ ފްލައިޓުތައް މަޑުޖެހި، ރިސޯޓުތަކަށާއި އެ އެއަރލައިންތަކަށް ވެސް އޭގެ ގެއްލުން ކުރާނެ ކަމެއް ކަމަށާއި އެއީ ރާއްޖޭގެ ރީތި ނަމަށް ލިބޭ ހުތުރު ނަމެއް ކަމަށް ބުނެފައިވެއެވެ. އެހެންކަމުން ކަމާއި ބެހޭ ފަރާތްތަކުން މިކަމަށް ހައްލު ހޯދާދިނުމަށް އެ ޖަމިއްޔާ އިން ވަނީ ކުރިން ވެސް ގޮވާލާފައެވެ.