މިހާރު ކުރަމުންދާ ވިއްސާރާގައި ކުޅުދުއްފުށީގައި ފެންބޮޑުވެއްޖެ
5 ސެޕްޓެމްބަރު 2022 | ހޯމަ 08:35މިހާތަނަށް 5 ވަރަކަށް ގެއަށް ފެންވަދެގެން ކައުންސިލަށް ވަނީ ރިޕޯރޓްކޮށްފައި
މިހާރު ކުރަމުންދާ ވިއްސާރައިގައި ކުޅުދުއްފުށީގެ ބައެއް ސަރަހައްދުތަކުގައި ފެންބޮޑުވެއްޖެ
މިހާރު ރާއްޖެއަށް ކުރަމުންދާ ވިއްސާރާގައި އާދިއްތަ ދުވަހުގެ ރެއިން ފެށިގެން ކުޅުދުއްފުއްޓަށް ބޯކޮށް ވާރޭވެހި ބައެއް ސަރަހައްދުތަކުގައި ފެންބޮޑުވެއްޖެއެވެ.
ކުޅުދުއްފުށީ ސިޓީ ކައުންސިލުން ބުނީ ފެންބޮޑުވެފައިވާ ސަރަހައްދުތަކުން ޕަންޕު ޖަހައިގެން ފެން ހިންދުމުގެ މަސައްކަތް ސިޓީ ކައުންސިލާއި، ޕަބްލިކް ވާކްސް އަދި ފުލުހުން ގުޅިގެން ކުރަމުންދާ ކަމަށެވެ.
ކައުންސިލުން ބުނީ މިހާތަނަށް 5 ވަރަކަށް ގެއަށް ފެންވަދެގެން ރިޕޯޓު ލިބިފައިވާކަމަށެވެ. އަދި ވިއްސާރައިގެ ސަބަބުން ލިބުނު ގެއްލުން ބެލުމަށް އެސެސްމެންޓް ހެދުމަށް ކައުންސިލްގެ ޓީމެއް ހަރަކާތްތެރިވަމުން ދާކަމަށް ކައުންސިލުން ބުނެއެވެ.
މީގެ ކުރިންވެސް ބޯކޮށްވާރޭވެހި ކުޅުދުއްފުށީގެ ބައެއް ސަރަހައްދުތަކުގައި ފެންބޮޑުވެ ބޮޑެތި ގެއްލުންތައް އާންމުންނަށްވަނީ ލިބިފައެވެ.
