ހއ. ތުރާކުނުގައި ގާއިމްކުރާ ފެރީ ހަޓްގެ މަސައްކަތްތައް ނިންމާލައިފިއެވެ.

ދަތުރުފަތުރުގެ ނިޒާމު ހަރުދަނާކޮށް މުޅި ރާއްޖެ ގުޅާލުމަށް ސަރުކާރުން ފަށާގައިވާ ރާއްޖެ ޓްރާންސްޕޯޓް ލިންކް (އާރްޓީއެލް) ފެރީގެ ޚިދުމަތުގެ ދަށުން ޒޯން އެކެއްގައި ހިމެނޭ ރަށްތަކަށް މި ޚިދުމަތް ދިނުމަށް ކުރަމުންދާ މަސައްކަތްތަކުގެ ތެރެއިން ކޮންމެ ރަށެއްގައި ފެރީ ހަޓެއް ގާއިމްކުރުމުގެ މަސައްކަތް އެމްޓީސީސީން ކުރަމުންދެއެވެ.

މިގޮތުން ތުރާކުނުގައި ގާއިމްކޮށްފައިވާ ފެރީ ސްޓޮޕް އަކީ ޒޯން 1 ގައި ޤާއިމުކުރެވޭ ފެރީ ސްޓޮޕެކެވެ.

ހއ. ތުރާކުނު ފެރީ ސްޓޮޕްގެ މަސައްކަތްތަކުގެ ތެރޭގައި، ކިއޮސްކަކާއި، ޔުނިވަރސަލް ޓޮއިލެޓަކާއި ވެއިޓިންގް އޭރިއާއެއް ގާއިމްކޮށްފައިވާކަމަށް އެމްޓީސީސީން ބުނެފައިވެއެވެ.

ހައި ސްޕީޑު ފެރީގެ ނިޒާމުން ރާއްޖޭގެ ހުރިހާ ރަށެެއް ގުޅާލުމަށް ކުރިއަށްގެންދާ މަސައްކަތުގެ ދަށުން ށ. އަތޮޅުގައި އެ ޚިދުމަތް ފެށުމަށް ނުރަސްމީ ދަތުރުތައް މިހާރު ވަނީ ފަށާފައެވެ. އެމްޓީސީސީ އިން މިހާތަނަށް އާރުޓީއެލްގެ ޚިދުމަތް ފަށާފައިވަނީ ހއ. އަދި ހދ. އަތޮޅުގައެވެ.