ކޮވިޑް-19 އަށް ފަރުވާހޯއްދަވަމުންގެންދެވި މެލޭޝިއާގެ ކުރީގެ ބޮޑުވަޒީރު މަހާތިރް މުހައްމަދު ހޮސްޕިޓަލުން ދޫކޮށްލައިފިއެވެ.

މަހާތިރްގެ އޮފީހުން ނެރުނު ބަޔާނެއްގައި ބުނެގައި ވަނީ އޭނާ ހޮސްޕިޓަލުން ދޫކޮށްލާފައި ވަނީ އާދިއްތަ ދުވަހުކަމަށެވެ. ބަޔާނުގައި ބުނެފައިވާ ގޮތުން ކޮވިޑް-19 އަށް ޕޮޒިޓިވް ވުމުން މަހާތިރް މެލޭޝިއާގެ ނެޝަނަލް ހަރޓް އިންސްޓިޓިއުޓްގައި އެޑްމިޓްކޮށްފައި ވަނީ ބުދަ ދުވަހުއެވެ.

އެނާ ހޮސްޕިޓަލުން ދޫކޮށްލި ނަމަވެސް ކަރަންޓީނުން ނުކުމެވަޑައިގަންނަވާނީ އަންގާރަ ދުވަހު ކަމަށް މަހާތިރްގެ އޮފީހުން ބުނެއެވެ.

ކޮވިޑް-19 ވެކްސިންގެ ތިން ޑޯޒް މަހާތިރް ޖައްސަވާފައިވާ ކަމަށް ރިޕޯޓުތައް ބުނެއެވެ. އެގޮތުން އެންމެ ފަހުން ވެކްސިން ޖައްސަވާފައި ވަނީ މިދިޔަ އަހަރުގެ ނޮވެމްބަރު މަހުކަމަށް ރިޕޯޓުތައް ބުނެއެވެ.

އުމުރުން 97 އަހަރުގެ މަހާތިރް ވަނީ 20 އަހަރަށްވުރެ ގިނަ ދުވަހު މެލޭޝިއާގެ ބޮޑުވަޒީރުކަން ކުރައްވާފައެވެ. މަހާތިރް އަކީ މިހާރުވެސް މެލޭޝިއާގެ ސިޔާސީ ކަންކަމުގައި ހަރަކާތްތެރިވެ ވަދައިގަންނަވާ ބޭފުޅެކެވެ. އެގޮތުން 2003 ވަނަ އަހަރާ ހަމައަށް 22 އަހަރު މެލޭޝިއާގެ ބޮޑުވަޒީރުކަން މަހާތިރް ކުރެއްވިއެވެ. އަދި އޭގެ ފަހުން އުމުރުން 92 އަހަރުފުޅުގައި 2018 ވަނަ އަހަރު އަނެއްކާވެސް މަހާތިރް ވަނީ ގައުމުގެ ބޮޑުވަޒީރުކަމުގެ މަގާމާ ހަވާލުވެވަޑައިންނަވާފައެވެ. އެހެންމަވެސް ދެ އަހަރު ދުވަހަށް ވުރެ މަދު ދުވަސްކޮޅެއްގެ ތެރޭގައި މަހާތިރްގެ ވެރިކަމަށް ވަނީ ނިމުން އައިސްފައެވެ.

މީގެ ކުރިން މަހާތިރް ވަނީ ހަރޓް އެޓޭކްއެއް ޖެހިވަޑައިގެން އަދި ބައިޕާސް ސަރޖަރީ ވެސް ހައްދަވާފައެވެ.