ރެއާލް މެޑްރިޑްގެ ރަނގަޅު ފެށުން ކުރިއަށް، ބާސާ ދެވަނައަށް!

ޗެމްޕިއަން ރެއާލް މެޑްރިޑްގެ އާސީޒަންގެ ރަނގަޅު ފެށުން ދަމަހައްޓައިފިއެވެ.

ސްޕެނިޝް ލަލީގާގައި ރެއާލް މެޑްރިޑް ވަނީ ކުޅުނު ހަތަރު ވަނަ މެޗުވެސް ކާމިޔާބުކޮށް އެއްވަނަ މަޤާމް ދަމަހައްޓާފައެވެ. ހަތަރު ވަނަ މެޗުގައި ރެއާލް ބެޓިސް އަތުން މޮޅުވީ 2-1 ނެވެ. މެޗުގައި ފުރަތަމަ ލަނޑު ޖަހާ ރެއާލްއަށް ކުރި ހޯދައިދިނީ ވިނީޝިއުސް ޖޫނިއަރއެވެ. މެޗުގެ ނުވަ ވަނަ މިނެޓުގައި ހޯދި ލީޑް ގެއްލުނީ 17 ވަނަ މިނެޓުގައި ކަނާލެސް ޖެހި ލަނޑުން ބެޓިސްއިން ނަތީޖާ ހަމަހަމަކުރުމުންނެވެ. ރެއާލް މެޗުން މޮޅުކޮށްދިން ލަނޑު ޖެހީ ރޮޑްރީގޯއެވެ. އޭނާ ލަނޑު ޖެހީ 65 ވަނަ މިނެޓުގައެވެ. މިއީ ހަތަރު މެޗުގެ ތެރެއިން ރެއާލް ބެޓިސް ބަލިވި ފުރަތަމަ މެޗެވެ. އެޓީމް އޮތީ ތިންވަނާގައެވެ.

ވާދަވެރި ބާސެލޯނާ ވަނީ 3-0 ން ސެވިއްޔާ ބަލިކޮށް ތާވަލްގެ ދެވަނައަށް ޖެހިލާފައެވެ. ބާސާގެ ފުރަތަމަ ލަނޑު ޖެހީ ބްރެޒިލް ފޯވާޑް ރަފީނިއާއެވެ. ދެވަނަ ލަނޑު ޖެހީ ޕޮލެންޑް ފޯވާޑް ލެވާންޑޯސްކީއެވެ. އަދި ތިންވަނަ ލަނޑު ޖެހީ އެރިކް ގާސިއާއެވެ. ބާސާ ދެވަނާގައި އޮތީ 10 ޕޮއިންޓާއެކުއެވެ. ލީގުގެ ފުރަތަމަ ހަތަރު މެޗުން ބާސާވެސް ބައްޔެއް ނުވެއެވެ.