މެޗަށް ނުކުތްއިރު ރެލިގޭޒަޝަން ޒޯންގައި އޮތް އެސްޓަން ވިލާއިން ޗެމްޕިއަން މެންޗެސްޓަރ ސިޓީ ހިފަހައްޓައިފިއެވެ.

މެޗުން މޮޅުވެގެން ތާވަލްގެ އެއްވަނައަށް ޖެހިލެވެން އޮތް ސިޓީން 1-0 ން މޮޅުވާން ދަނިކޮށް, އެސްޓަން ވިލާއިން ވަނީ ނަތީޖާ ހަމަހަމަކޮށްފައެވެ. މެޗު އެއްވަރުވީ 1-1 ނެވެ. މެޗުގައި ސިޓީގެ ލަނޑު ދެވަނަ ހާފް ފަށައިގެން ފަސްވަނަ މިނިޓްގައި ޖެހީ ހާލާންޑެވެ. މިއީ ހަ މެޗުން އޭނާ ޖެހި 10 ވަނަ ލަނޑެވެ. ލަނޑަށްފަހުވެސް އޭނާ ފޮނުވާލި ދެ ބޯޅައެއް ވިލާގެ ކީޕަރު އެމިލިއާނޯ މާޓިނޭޒް ދިފާއުކުރިއެވެ. އެސްޓަން ވިލާއިން ނަތީޖާ ހަމަހަމަކުރީ 74 ވަނަ މިނިޓްގައި ބެއިލޭ ޖެހި ލަނޑުންނެވެ. ދެވަނަ ލަނޑެއްވެސް އެސްޓަން ވިލާއިން ޖެހިއެވެ. އެކަމަކު ކުޓީނިއޯ ޖެހި ލަނޑު ބަލައިނުގަތީ އެޓޭކް ފެށިއިރު އޭނާ އޮފްސައިޑްކަމަށް ބަލާފައެވެ.

މިނަތީޖާގެ ސަބަބުން ތާވަލްގެ އެއްވަނައަށް ޖެހިނުލެވި ސިޓީ އޮތީ ދެވަނާގައެވެ. އެއީ އެއްވަނާގައި އޮތް އާސެނަލްއަށްވުރެ މެޗެއް އިތުރަށް ކުޅެ, ޕޮއިންޓެއްގެ ފަރަޤަކާއެކުއެވެ. އާސެނަލް މިރޭ ނިކުންނާނީ މެންޗެސްޓަރ ޔުނައިޓެޑާ ދެކޮޅަށެވެ.