އދ. އަތޮޅުން ފެށިގެން އައްޑޫ ސިޓީ އަށް ވައިޓް އެލަރޓް ނެރެފިއެވެ.

މޫސުމާއި ބެހޭ ގައުމީ އިދާރާއިން ބުނީ މި ސަރަހައްދަށް ވައިޓް އެލަރޓް ނެރެފައިވަނި ހޮނިހިރު ދުވަހުގެ ރޭ ދަންވަރު 2:30ން ފެށިގެން އާދީއްތަ ދުވަހުގެ ހެނދުނު 8:30 ކަމަށެވެ.

އެ އިދާރާއިން ބުނީ މި ސަރަހައްދަށް ބޯކޮށް ވާރޭވެހުމާއެކު ގުގުރުން އެކަށީގެންވާ ކަމަށެވެ. އަދި ވިލާގަނޑުގައި ގަޑިއަކު 40 މޭލަށް ވައިގަދަވާނެކަމަށް ލަފާކުރެވޭ ކަމަށެވެ.

އާދީއްދަ ދުވަހު މުޅި ރާއްޖެއަށް ވެސް ވިއްސާރާކުރާނެ ކަމަށް މޫސުމާއި ބެހޭ ގައުމީ އިދާރާއިން ވަނީ ލަފާކޮށްފައެވެ. އެގޮތުން ހއ. އަތޮޅުން ފެށިގެން މެދު ރާއްޖެތެރޭގެ އަތޮޅުތަކަށް ގަދަ ވަޔާއެކު ވިއްސާރަކުރާނެ ކަމަށް ލަފާކޮށްފައިވެއެވެ. އަދި ލ އަތޮޅުން ފެށިގެން ގދ އަތޮޅާ ހަމައަށް ގުގުރުމާއެކު ވިއްސާރަކުރާނެ ކަަމަށް ލަފާކޮށްފައިވާ އިރު، އެންމެ ދެކުނުން އައްޑޫ ސިޓީއަށް ކެރީގެ އަސަރުކުރާނެކަމަށް ވަނީ ލަފާކޮށްފައެވެ.

މޫސުން ގޯސްވެ ވިއްސާރަވާނެތީ ނެޝަނަލް ޑިޒާސްޓަރ މެނޭޖްމަންޓް އޮތޯރިތީން ވެސް ވަނީ ބައެއް ކަންކަމަށް ސަލާމުވުމަށް އިލްތިމާސްކޮށްފައެވެ. އެގޮތުން ވިއްސާރައިގެ ސަބަބުން އާންމުކޮށް ފެންބޮޑުވާ ރަށްރަށުން ފެންބޮޑުވެގެން ލިބިދާނޭ ގެއްލުން ކުޑަކުރުމަށް ދުރާލާ ފިޔަވަޅުއެޅުމަށާއި، ގަދަވައިގެ ސަބަބުން ލިބިދާނޭ ގެއްލުން ކުޑަ ކުރުމަށް ދުރާލާ ފިޔަވަޅުއެޅުމަށް ވަނީ އިލްތިމާސްކޮށްފައެވެ.

މީގެ އިތުރުން ކަނޑު ދަތުރުކުރުމުގައި މޫސުމަށް ޚާއްޞަ ސަމާލުކަމެއް ދިނުމަށާއި، ކަނޑުމައްޗަށް ނުުކުންނަނަމަ، ސަލާމަތީ އާލާތްތައް ހަމައަށް ހުރިތޯއާއި މުވާސަލާތީ ނިޒާމް ރަނގަޅަށް މަސައްކަތް ކުރާކަން ކަށަވަރު ކުރުމަށް ވެސް ވަނީ އިލްތިމާސްކޮށްފައެވެ.