އިނގރިރޭސި ޕްރިމިއަރ ލީގުގައި ލިވަޕޫލްއާއި އެވަޓަން ބައްދަލުކުރި މެޗު އެއްވަރުވެއްޖެއެވެ.
އެވަޓަންގެ ގުޑިސަން ޕާކް ސްޓޭޑިއަމްގައި ކުޅުނު މި މެޗު އެއްވަރުވީ އެއްވެސް ޓީމަކަށް ލަނޑެއް ނުޖެހިއެވެ. ލަނޑު ޖަހާނެ ރަނގަޅު ފުރުސަތު ދެޓީމުންވެސް ތަނަވަސްކުރި ނަމަވެސް ބޭނުން ނުހިފުނެވެ.
މެޗުގައި ލަނޑު ޖަހާނެ ގިނަ ފުރުސަތުތަކެއް ލިބުނީ ލިވަޕޫލްއަށެވެ. ލިވަޕޫލްގެ ޑާވިން ނުނޭޒް ފޮނުވާލި ހަމަލާ އެވަޓަންގެ ކީޕަރު ޖޯޑަން ޕިކްފޯޑް ދިފާއުކުރިއިރު، ބަދަލު ކުޅުންތެރިއެއްގެ ގޮތުގައި ކުޅެން އެރި ރޮބާޓޯ ފިރްމީނޯ އުފެއްދި ތިން ހަމަލާގެ ހުރަހަކަށްވީވެސް ޕިކްފޯޑްއެވެ. މެޗުގެ ފަހު ވަގުތު ލިވަޕޫލްގެ ތަރި މުހައްމަދު ސަލާހް ފޮނުވާލި ހަމަލާ އަމާޒުވީ ގޯލުގެ ދަނޑިއަށެވެ.
މި މެޗުގައި އެވަޓަންގެ ކޯނާ ކޯޑީ ލަނޑެއް ޖެހިއެވެ. ނަމަވެސް ވީއޭއާރު ބެލުމަށްފަހު ރެފްރީ ވަނީ އޮފްސައިޑުކަމަށް ނިންމާ، ލަނޑު ބަލައިނުގަނެފައެވެ.
މި ނަތީޖާއާއެކު ލިވަޕޫލް އޮތީ 9 ޕޮއިންޓާއެކު ތާވަލުގެ ފަސްވަނާގައެވެ. ކުޅުނު ފަސް މެޗުގެ ތެރެއިން އެއް މެޗުން ބަލިވެ، އެހެން ހުރިހާ މެޗެއް އެއްވަރުކޮށްގެން ލިބުނު ހަތަރު ޕޮއިންޓާއެކު އެވަޓަން އޮތީ 17 ވަނާގައެވެ.
