އިންޑިއާގައި އުފެއްދި ފުރަތަމަ މަތިންދާ ބޯޓު އުފުލާ މަނަވަރު އިފްތިތާހުކުރުން ކުލަ ގަދަކޮށް ފާހަގަކޮށްފިއެވެ.

"އައިއެންއެސް ވިކްރާންތު"ގެ ނަމުން ނަންދީފައިވާ އެ އުޅަނދު އިފްތިތާހުކުރުމަށް ބޭއްވި ރަސްމިއްޔާތަށް އިންޑިއާގެ ބޮޑުވަޒީރު ނަރެންދްރަ މޯދީ ވަޑައިގަތުމުން އިންޑިއާގެ އަސްކަރިއްޔާއިން ވަނީ އެމަނިކުފާނަށް ރިޔާސީ ކުރުނީހެއް އަރުވާފައެވެ. ހުކުރު ދުވަހު ބޭއްވި އެ ރަސްމިއްޔާތުގައި އިންޑިއާގެ އަސްކަރިއްޔާ އާއި އެ ޤައުމުގެ ސަރުކާރުގެ އިސް ފަރާތްތަކުން ވަނީ ބައިވެރިވެވަޑައިގަންނަވާފައެވެ.

މި އުޅަނދާއެކު އިްނޑިއާ މިހާރު ހިމެނެނީ އަމިއްލަ ގައުމުގައި އަސްކަރީ ބޮޑެތި އުޅަނދުތައް އުފެއްދުމުގެ ޤާބިލްކަން ލިބިގެންވާ މަދު ޤައުމުތަކުގެ ތެރޭގައެވެ. 20،000 ކަރޯޑް ރުޕީޒް ޚަރަދުކޮށްގެން ބިނާކުރި މި އުޅަނދަކީ ޒަމާނަށް ފެތޭ، އަސްކަރީ ބޭނުމަށް ބޭނުންކުރެވޭ ފަދަ މަނަވަރެކެވެ. އިންޑިއާގެ އަސްކަރިއްޔާ އިން ވަނީ މިއީ އެ ގައުމުގެ އަސްކަރިއްޔާ އަށް ލިބުނު ވަރަށް ބޮޑު ކުރިއެރުމެއްކަން ފާހަގަކޮށްފައެވެ. ޚާއްސަކޮށް އިންޑިއާގެ ކަނޑުތަކުގެ ރައުސުލްމާލަށް ބަލާއިރު މި އުޅަނދަކީ މުހިންމު އުޅަނދެއް ކަމަށް އެ ގައުމުން ފާހަގަކުރެއެވެ.

262 މީޓަރު ދިގު މިނުގައި ހުންނަ އުޅަނދުގައި ސިނާއީ މަސައްކަތް ކުރާ ތަންތަން ވެސް ހިމެނެއެވެ. އަދި އެ އުޅަނދުގައި ގާތްގަނޑަކަށް 30 މަތިންދާ ބޯޓާއި، އެކި ކަހަލަ ހަތިޔާރު އުފުލޭ އިރު، އެ އުޅަނދުގައި 45،000 ޓަނު އުފުލޭ ކަމަށް މީޑިއާ ރިޕޯޓްތައް ބުނެއެވެ. މި އުޅަނދަށް ނަން ދީފައި ވަނީ އެ ގައުމުގައި 1971 ވަނަ އަހަރު ބޭނުން ކުރި މަތިންދާ ބޯޓު އުފުލާ މަނަވަރަކަށް ނިސްބަތްކޮށެވެ. އެ އުޅަނދަކީ އިންޑިއާ އަށް އޭރު ކުރިއަށް ދިޔަ ހަނގުރާމައިގައި މުހިންމު ދައުރެއް އަދާކޮށްދިން އުޅަނދެކެވެ.