ރިޔާސީ އިންތިޚާބަށް އެމްއާރްއެމްއިން ނެރޭނެ ކެންޑިޑޭޓަކާ މެދު އަދި މަޝްވަރާނުކުރޭ: ރައީސް މަޢުމޫން
އެމްއާރްއެމް އިން ނެރޭނެ ކެންޑިޑޭޓަކު ކަނޑައަޅާނީ ބައްދަލުވުމެއް ބޭއްވުމަށްފަހު، ވޯޓަކަށް އަހައިގެން މެމްބަރުން ބޭނުންވާ ގޮތަށް
އެމްއާރްއެމްއިން ބޭއްވި ފުރަތަމަ ޖަލްސާގެ ތެރެއިން
މޯލްޑިވްސް ރިފޯމް މޫވްމަންޓް (އެމްއާރްއެމް) އިން ރިޔާސީ އިންތިޚާބުގައި ނެރޭނެ ކެންޑިޑޭޓަކާމެދު އަދި މަޝްވަރާ ނުކުރައްވާ ކަމަށް ކުރީގެ ރައީސް މަޢުމޫން އަބްދުލް ޤައްޔޫމް ވިދާޅުވެއްޖެއެވެ.
ވީޓީވީން ގެނެސްދިން ޕްރޮގްރާމެއްގައި ވާހަކަފުޅު ދައްކަވަމުން ކުރީގެ ރައީސް މައުމޫން ވިދާޅުވީ ކޮންމެ ސިޔާސީ ޕާޓީއެއް ވެސް އުފެއްދުމުގެ މަޤްސަދަކީ ވެރިކަމަށް އައިސް ރައްޔިތުންނަށް ޚިދުމަތްކޮށްދިނުން ކަމުގައެވެ.
ސިޔާސީ ޕާޓީ ވެރިކަމުގައި ނެތްނަމަ އެޕާޓީއަކުން ބޭނުންވާ ކަންތައްތަކާއި ބަދަލުތައް ނުގެނެވޭނެ ކަމަށާއި ކޮންމެ ޕާޓީއެއްގެ ވެސް ދުރު ރާސްތާ ޕްލޭނަކީ ވެރިކަމަށް އައުން ކަމަށް ރައީސް މައުމޫން ވިދާޅުވިއެވެ. އެމްއާރްއެމްއަށް ވެރިކަން ލިބޭނެ ކަމަށް އުންމީދު ކުރައްވާ ކަމަށް ވެސް ރައީސް މައުމޫން ވިދާޅުވިއެވެ.
ރިޔާސީ އިންތިޚާބަށް އެމްއާރްއެމް އިން ނެރޭނެ ކެންޑިޑޭޓަކު ކަނޑައަޅާނީ ބައްދަލުވުމެއް ބޭއްވުމަށްފަހު، ވޯޓަކަށް އަހައިގެން މެމްބަރުން ބޭނުންވާ ގޮތަށް ކަމަށް އެމަނިކުފާނު ވިދާޅުވިއެވެ.
މި ސަރުކާރު ހިންގަމުން އަންނަ ގޮތާއި ގުޅޭގޮތުން ރައީސް މައުމޫން ވިދާޅުވީ އެއްވެސް ސަރުކާރަކަށް ހުރިހާ ކަމެއް ރަނގަޅަކަށް ނުކުރެވޭނެ ކަމަށާއި އެމަނިކުފާނަށް ފެނިވަޑައިގަންނަވާ ގޮތުގައި ގިނަ ކަންތައްތައް ދަނީ ރަނގަޅަށް ކަމަށެވެ.
އަންނަ ރިޔާސީ އިންތިޚާބުގައި ރައީސް ސާލިހަށް ތާއިދުކުރައްވާނެތޯ ނުވަތަ ނޫންތޯ އެއީ ކުރިއަތް އޮތް ތާނގައި މަޝްވަރާ ކުރަން ހުރި ކަންތައްތައް ކަމަށް ރައީސް މައުމޫން ވިދާޅުވިއެވެ.
2023 ވަނަ އަހަރުގެ ރިޔާސީ އިންތިޚާބަށް ތައްޔާރުވުމުގެ މަސައްކަތް އެކި ޕާޓީތަކުން ފަށާފައިވާއިރު ރިޔާސީ އިންތިޚާބުގައި ޖުމްހޫރީ ޕާޓީން ވާދަ ކުރާނެ ކަމަށާއި ނަމަވެސް ކުރާނެ ވަކި ގޮތެއް އަދި ނިންމާފައި ނުވާ ކަމަށް އެ ޕާޓީން ވެސް ވަނީ ބުނެފައެވެ. އަދި އެމްޑީޕީގެ ރިޔާސީ ކެނޑިޑޭޓަކު ކަނޑައަޅަން ބާއްވާ ރިޔާސީ ޕްރައިމަރީ ބާއްވާނެ ތާރީހެއް އަދި ނިންމާފައި ނުވާ ކަމަށް އެމްޑީޕީ ބުނެފައިވާއިރު ރިޔާސީ އިންތިޚާބުގައި ޕީޕީއެމް-ޕީއެންސީ ކޯލިޝަންގެ ފަރާތުން ވާދަކުރައްވާ ކެންޑިޑޭޓް ކުރީގެ ރައީސް އަބްދުﷲ ޔާމީނަށް ރިޔާސީ ޓިކެޓް ވަނީ އަރުވާފައެވެ.
އަންނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބަށް 120 މިލިއަން ރުފިޔާގެ ބަޖެޓެއް އިލެކްޝަންސް ކޮމިޝަނުން ވަނީ ކަނޑައަޅާފައެވެ. އީސީގެ ރައީސް ފުއާދު ތައުފީގު ވިދާޅުވީ، ބަޖެޓް ކަނޑައަޅާފައިވަނީ ވަރަށް ބޮޑަށް މަޝްވަރާކޮށްގެން ކަމަށެވެ.
އިލެކްޝަނުން ބަޖެޓް ކަނޑައަޅާފައިވަނީ އިންތިޚާބުގައި ދެ ބުރު ބާއްވަންޖެހިއްޖެ ހާލަތުގައި އެކަމަށްވެސް ބެލުމަށްފަހު ކަމަށާއި އިންތިޚާބުގެ ފުރަތަމަ ބުރަށް 95 މިލިއަން ރުފިޔާ، އަދި ދެވަނަ ބުރެއް ބާއްވަން ޖެހިއްޖެނަމަ 25 މިލިއަން ރުފިޔާގެ ބަޖެޓެއް ކަނޑައަޅާފައިވާނެ ކަމަށްވެސް ފުއާދު ވިދާޅުވިއެވެ.
ރިޔާސީ އިންތިޚާބަކީ ރާއްޖޭގައި ބާއްވާ އެންމެ ބޮޑު އިންތިޚާބެވެ. މި އިންތިޚާބުގެ ވޯޓު ފޮށިތައް ރިސޯޓުތަކާއި ރާއްޖޭން ބޭރުގެ ގައުމުތަކާއި އިންޑަސްޓްރިއަލް ރަށްތަކުގައި ވެސް ބަހައްޓަންޖެހޭއިރު، ވޯޓުލާ މަރުކަޒުތަކުގައި ހަރަކާތްތެރިވާ އޮފިޝަލުންވެސް އިތުރުވާނެއެވެ.
