ސްރީލަންކާއަށް 2.9 ބިލިއަން ޑޮލަރުގެ ލޯނު އެހީ ފޯރުކޮށްދިނުމަށް އިންޓަރނޭޝަނަލް މަނިޓަރީ ފަންޑް (އައިއެމްއެފް)ން އެގައުމާއެކު ޕްރެލިމިނަރީ އެއްބަސްވުމަކަށް އަތުވެއްޖެއެވެ.
ލަންކާއަށް މިހާރު ދިމާވެފައިވާ އިގުތިސާދީ ކާރިސާއިން އަރައިގަތުމަށް އެގައުމަށް އެހީތެރިވުމުގެ ގޮތުން އައިއެމްއެފްއިން އެގައުމަށް ލޯނު އެހީ ފޯރުކޮށްދޭން ޕްރެލިމިނިރީ އެއްބަސްވުމަކަށް ގޮސްފައިވާކަން އެއިދާރާއިން ހާމަކޮށްފައިވަނީ ބުރާސްފަތި ދުވަހުއެވެ.
އެގައުމަށް މިހާރު ދިމާވެފައިވާ އިގުތިސާދީ ކާރިސާއަކީ ފަހުގެ ތާރީޚެއްގައި އެގައުމުން ކުރިމަތިލަމުންދާ އެންމެ ބޮޑު އިގުތިސާދީ ކާރިސާއެވެ. ގައުމުގެ ދަރަނިތައް އަދާނުކުރެވި ލަންކާ ވަނީ އޭޝިއާ ޕެސިފިކުން އެންމެ ފުރަތަމަ ބަނގުރޫޓުވި ގައުމަށްވެސް ވެފައެވެ.
އައިއެމްއެފްގެ އެހީ ހޯދުމަށް ލަންކާއިން ގިނަމަސައްކަތްތަކެއް ކުރަމުން ދަނިކޮށް، އެއިދާރާއިން ލަންކާއަށް ލޯނުގެ އެހީ ފޯރުކޮށްދިނުމަށް ޕްރެލިމިނަރީ އެއްބަސްވުމަކަށް އައިސްފައިވާއިރު، މިހާރު މި ލޯނު އެޕްރޫވްކުރުމަށް އައިއެމްއެފްގެ މެނޭޖްމަންޓާއި އެކްޒެކިއުޓިވް ބޯޑަށް ވަނީ ހުށަހަޅާފައެވެ. މި ލޯނު ކަށަވަރުކުރުމަށް އައިއެމްއެފްއިން ލަންކާއަށް ހުށަހަޅާފައިވާ ޝަރުތުތައް އެގައުމުން ފުރިހަމަކުރަންޖެހޭނެއެވެ.
އައިއެމްއެފްގެ އިސް އޮފިޝަލެއްކަމަށްވާ ޕީޓަރ ބްރުއަރ ވަނީ، މިނިމުނު ސްޓާފް ލެވެލް އެއްބަސްވުމަކީ ލަންކާއަށް މިހާރު ދިމާވެފައިވާ ކާރިސާއިން އަރައިގަތުމަށް ކަޑައްތުކުރަންޖެހޭ ދިގު މަގުގެ ފެށުންކަމަށް ވިދާޅުވެފައެވެ. މިހާރު ލަންކާގެ ސަރުކާރުގެ ސިޔާސަތުތައް ރިފޯމްކުރުމުގެ މަސައްކަތް ފަށާފައިވާކަމަށާއި، މިގޮތަށް މިކަންތައް ދެމެހެއްޓުމަކީ ކާރިސާއިން އަރައިގަތުމަށް މުހިންމު ކަމެއްކަމަށް ބްރުއަރ ވަނީ ފާހަގަކުރައްވާފައެވެ.
އައިއެމްއެފްއިން ލަންކާއަށް ފޯރުކޮށްދިނުމަށް މަޝްވަރާކުރަމުންދާ ޕްރޮގްރާމަކީ ހަތަރު އަހަރަށް ބަހާލައިގެން ފޯރުކޮށްދެވޭ އެހީއެކެވެ. މިއެހީގެ ދަށުން ސަރުކާރުގެ އާމްދަނީ އިތުރުކޮށް ފިސްކަލް ކޮންސޮލިޑޭޝަނަށް ބާރުއެޅުމަށް ވަނީ އަމާޒުހިފާފައެވެ. އަދި ތެލާއި ކަރަންޓަށް އައު އަގުތައް ކަނޑައެޅުމަކީ މި އެހީގެ ދަށުން އަމާޒުހިފާފައިވާ ކަމެކެވެ.
މީގެ އިތުރުން މިހާރު ހުސްވެފައިވާ ފޮރިން ރިޒަރވް އަލުން އިތުރުކުރުމަކީވެސް އަމާޒެކެވެ.
އައިއެމްއެފްގެ އެހީ ހޯދުމަށްޓަކައި، ލަންކާއިން މިހާރު ދަރަނިތައް އަދާކުރަން ޖެހިފައިވާ ފަރާތްތަކާއެކު އެދަރަނިތައް އަދާކުރެވޭނެ ދެމެހެއްޓެނިވި ގޮތަކާމެދު މަޝްވަރާކޮށް، އެއްބަސްވުމަކަށް ދާންޖެހޭނެއެވެ.
