ފަލަސްތީނުގެ ރައްޔިތުންނަށްވެސް ހިނިތުންވާން އެނގޭކަން އަންގައިދިނުމުގެ އެންމެ ކުރީގައި ޒަހްރު!

ފަލަސްތީނުގެ އެމެރިކާ ދަރިކޮޅަށް ނިސްބަތްވާ އާމިރް ޒަހްރުގެ އަމާޒު، ފިސާރި ވަރުގަދައެވެ. އޭނާ އަމާޒު ހިފާފައި ހުރީ ހިނިތުންވުމާއި އުފާވެރިކަމުގެ ތެރެއިން ތަސައްލީ ހޯދާދިނުމުގެ މިޝަން ކާމިޔާބު ކުރުމަށެވެ.

އެއީ 2015 ވަނަ އަހަރެވެ. އެމެރިކާގައި ދިރިއުޅޭ އަރަބި ދަރިކޮޅުގެ ކޮމީޑިއަނުން، ނާބުލުސްއާއި ރާމައްލާ ފަދަ ފަލަސްތީނުގެ ސިޓީތަކަށް ގެނެސް، ފަލަސްތީނުގެ ރައްޔިތުންނަށް އުފާވެރި ވަގުތުކޮޅެއް ހޯދާދެވޭ ތޯ ޒަހްރު މަސައްކަތް ފެށިއެވެ.

7 އަހަރު ދުވަސް ފަހެވެ. ޒަހްރު، 45، ތަޢާރަފު ކުރި "ޕަލަސްޓައިން ކޮމެޑީ ފެސްޓިވަލް" އަދިވެސް ދަނީ ވަރުގަދަ ރޫހެއްގައި ކުރިއަށެވެ. އެފަދަ ދެވަނައެއް ނެތް، އަހަރީ ހަރަކާތެއްގެ ގޮތުގައެވެ.

ޤުދުސްގައި ކުރިއަށް ދިޔަ އިވެންޓްގައި ޒަހްރާއެކު އިތުރު 7 ކޮމީޑިއަންއަކު މިފަހަރު ހުށަހެޅުންތައް ހުށަހަޅައިދިނެވެ. 350 ޓިކެޓްގެ އިވެންޓްގެ ހުރިހާ ޓިކެއްޓެއް ވިކި ހުސްވިއެވެ. މާލަމުގައި ކޮމީޑިއަނުން ވަނީ ބޯޑަރުގައި ޔަހޫދީ އިޒްރޭލުގެ ގާޑުންގެ އަމަލުތަކަށް ހަޖޫ ޖަހާ، އޯޑިއަންސް ހެއްވާފައެވެ. ޝޯގެ ތެރެއިން މުޅިންވެސް އަޑު އިވިގެން ދިޔައީ އެފަދަ ޖޯކުތަކެވެ. އާންމު ދިރިއުޅުމުގައި ކުރިމަތިލާން ޖެހޭ ޙަޤީޤީ ނުތަނަވަސްކަމުން އުފާވެރިކަން ގެނެސްދެނިވި ވާހަކަތަކެއްގެ ގޮތުގައެވެ. އެފަދަ އެއް ޖޯކަކަށް ވީ، ޢަރަބި މައިން ދަރިން ކިޔަމަން ކުރުމުގައި ފައިވާން ކިބައިގެ ހަތިޔާރު ނަގާ ނެގުމުގެ ވާހަކައެވެ. ޝޯ ބަލަން ދިޔަ ކުޑަކުދިންނަށްވެސް އެންމެ ކަމުދިޔަ އެއް ޖޯކަށް، އެ ޖޯކު ވިއެވެ.

އުމުރުން ދުވަސްވީ މީހުންގެ މެދުގައިވެސް ކޮމީޑިއަނުންގެ ޝޯ ވަރަށް މަޤުބޫލެވެ. އެއީ ދިރިއުޅެން ޖެހިފައިވާ ހާސް ކަމާއި ނުތަނަވަސްކަމުގެ ތެރެއިން، ހީނ ސަމާސާކޮށްލާނެ ވަގުތުކޮޅެއް ހޯދާދިން ޝޯއަކަށް ވީތީއެވެ.

މި އަހަރުގެ ޝޯތައް ދެމުންދާ ހުރިހާ ކޮމީޑިއަނުންނަކީވެސް ފަލަސްތީނުގެ ރައްޔިތުންނެވެ. ޒަހްރު، އޭނާގެ ހުރިހާ ހުށަހެޅުމެއްވެސް ހުށަހަޅާ ދިނީ، ކަޅުކުލައިގެ ޓީ-ޝަރޓެއްގައި "ޕްރެސް" ޖަހައިގެން ހުރެއެވެ. އެއީ، އިޒްރޭލުގެ އުދުވާންތަކުގައި މަރާލި ފަލަސްތީނުގެ އެމެރިކާ ދަރިކޮޅުގެ ތަޖުރިބާކާރު ނޫސްވެރިޔާ ޝީރީން އަބޫ އަޤުލީގެ ހަނދާނުގައެވެ.