ފަހަތުން އަރައި ސައުތެމްޓަންއިން ޗެލްސީ އަތްދަށުލައިފި

އިނގިރޭސި ޕްރިމިއަރ ލީގުގައި ސައުތެމްޓަނާ ދެކޮޅަށް ކުޅުނު ފުޓުބޯޅަ މެޗުން ޗެލްސީ ބަލިވެއްޖެއެވެ.

ސައުތެމްޓަންގެ ދަނޑުގައި ކުޅުނު މެޗު އެ ޓީމުން ކާމިޔާބުކުރީ ޗެލްސީން ލަނޑެއް ޖަހާފައި ވަނިކޮށް، ފަހަތުން އަރައި ދެ ލަނޑު ޖަހައިގެންނެވެ. މިއީ މިފަހަރުގެ ސީޒަންގައި ޗެލްސީގެ ދެ ވަނަ ބައްޔެވެ.

މެޗު ފަށައިގެން 23 ވަނަ މިނެޓުގައި ޗެލްސީން ވަނީ ލީޑު ނަގާފައެވެ. އެ ޓީމަށް ލީޑު ނަގައިދިނީ ރަހީމް ސްޓާލިންއެވެ. ލަނޑަށްފަހު އިތުރު ލަނޑެއް ޖެހުމަށް ޗެލްސީން މަސައްކަތް ކުރަމުން ދަނިކޮށް ސައުތެމްޓަން އިން ވަނީ ނަތީޖާ ހަމަހަމަކޮށްފައެވެ. މި ލަނޑު އެ ޓީމަށް ޖަހައިދިނީ ރޮމެއޫ ލަވިއާއެވެ.

މެޗުން ސައުތެމްޓަން މޮޅުކޮށްދިން ލަނޑު ޖެހީ އާދަމް އާމްސްޓްރޯންގްއެވެ. އޭނާ މި ލަނޑު ޖަހާފައިވަނީ ފުރަތަމަ ހާފުގެ ފުރިހަމަ ވަގުތު ހަމަވެ، އިތުރަށް ދެއްކި އެއް މިނެޓުގެ ތެރޭގައެވެ.

ލީގުގައި މިހާތަނަށް ކުޅުނު ފަސް މެޗުގެ ތެރެއިން ޗެލްސީން މޮޅުވެފައިވަނީ ދެ މެޗުންނެވެ. އެއް މެޗުން އެއްވަރުވެފައިވާއިރު، ދެ މެޗުން ވަނީ ބަލިވެފައެވެ. ރަނގަޅު ފޯމެއްގައި ސީޒަން ފެށި ޗެލްސީ މިހާރު އޮތީ ފަސް މެޗުން ހަތް ޕޮއިންޓް ހޯދައިގެން ތާވަލްގެ އަށް ވަނަ މަގާމުގައެވެ. ސައުތެމްޓަން އަށް ވެސް ފަސް މެޗުން ހަތް ޕޮއިންޓް ލިބޭއިރު، އެ ޓީމަށް ކުރި ލިބެނީ ފައިދާ ގޯލުންނެވެ. ސައުތެމްޓަން އޮތީ ހަތް ވަނަ މަގާމުގައެވެ.

ލީގުގައި ދެން ކުޅުނު އެހެން މެޗުތަަކަށް ބަލާއިރު، ކްރިސްޓަލް ޕެލެސް އާއި ބްރެންޓްފޯޑު ބައްދަލުކުރި މެޗުން ނިމުނީ 1-1 އިން އެއްވަރުގެންނެވެ. ފުލްހަމާއި ބްރައިޓަން ބައްދަލުކުރި މެޗު 2-1 އިން ފުލްހަމް ކާމިޔާބުކުރިއިރު، ލީޑްސް ޔުނައިޓެޑާ އެވަޓަންގެ ކުރިމަތިލުން ނިމުނީ 1-1 އިން އެއްވަރުވެގެންނެވެ.