ބުރާއި ޓީނޭޖްގެ މެޗު ފުރިހަމައެއް ނުކުރެވުނު، ގޮތް ނިންމުން ކޮމިޓީއަށް!

ދެވަނަ ޑިވިޝަނުން އައި ދެޓީމްގެ ތެރެއިން ފުރަތަމަ ޑިވިޝަންގެ ޖާގައެއް ލިބެން އޮތް ޓީމް ކަށަވަރުވާން އޮތް މެޗު ނިމެން ދަނިކޮށް ހަމަނުޖެހުން ހިނގާ, މެޗު ފުރިހަމަ ނުކުރެވި ކޮމިޓީއަށް ގޮތް ނިންމަން ޖެހިއްޖެއެވެ.

މެޗުގެ ފުރިހަމަވަގުތު ހަމަވާން ހަތަރު މިނިޓަށް ވެފައިވަނިކޮށް ކުޅުން މެދުކަނޑާލީ ރެފްރީގެ ނިންމުންތަކާ ޓީނޭޖުން ހިތްހަމަނުޖެހި ހިނގި ހަމަނުޖެހުންތަކުގެ ސަބަބުންނެވެ. ހަމަނުޖެހުންތަކުގެ ތެރޭގައި ރެފްރީ ފަހަތުން ބައެއް އޮފިޝަލުން ދުވި މަންޒަރު ފެނުނެވެ. އެހަމަނުޖެހުންތަކުގެ ސަބަބުން މެޗު އިތުރަށް ފުރިހަމަނުކުރެވި މެޗު ހުއްޓާލީއެވެ. ޤަވާއިދުގައިވާ ގޮތުން މެޗުގެ ފުރިހަމަ ވަގުތު ހަމަނުވަނީސް މެޗު މިގޮތަށް ހުއްޓާލަން ޖެހި ކުރިއަށް ނުގެންދެވިއްޖެނަމަ ގޮތް ނިންމާނީ ކޮމިޓީންނެވެ. ކޮމިޓީން ގޮތް ނިންމާނެކަން އެންގުމުން ބުރުން ވަނީ އުފާފާޅުކޮށްފައެވެ. ބުރުގެ ސޯޝަލް މީޑިޔާ އެކައުންޓްތަކުންވެސް ވަނީ ފުރަތަމަ ޑިވިޝަންގެ ޖާގަ ލިބުނުކަން އިއުލާންކޮށް އުފާފާޅުކޮށްފައެވެ.

މެޗު ހުއްޓާލިއިރު 3-1 ން ކުރީގައި އޮތީ ބުރު ސްޕޯރޓްސް ކްލަބެވެ. މެޗުގެ ފަސްވަނަ މިނިޓްގައި ފުރަތަމަ ލަނޑު ޖަހާ ކުރި ހޯދީވެސް ބުރުންނެވެ. އެޓީމަށް ކުރި ހޯދައިދިނީ އަހުމަދު މުޙައްމަދު ގަބާލާއެވެ. އެކަމަކު 19 ވަނަ މިނިޓްގައި ބައިގޯލަކުން ނަތީޖާ ހަމަހަމަވިއެވެ. ބުރުން ދެވަނަ ފަހަރަށް ކުރި ހޯދީ ދެވަނަ ހާފްގައި, މެޗުގެ 73 ވަނަ މިނިޓްގައި އަހުމަދު ރަޝީދު ޖެހި ލަނޑުންނެވެ. އޭގެ ތިން މިނިޓް ފަހުން ބުރުގެ ތިންވަނަ ލަނޑުވެސް ޖެހީ އަހުމަދު ރަޝީދެވެ.

ކޮމިޓީން ބުރު މޮޅުވީކަމަށް ނިންމައިފިނަމަ ކުރިއަށް އޮތް ސީޒަންގެ ދިވެހި ޕްރިމިއަރ ލީގުން ބުރަށް ޖާގަ ޔަޤީންވާނެއެވެ. ބުރު ވަނީ ސައްތައިން ސައްތަ ރެކޯޑަކާއެކު ދެވަނަ ޑިވިޝަންގެ ޗެމްޕިއަންކަން ހޯދާފައެވެ. ކޮލިފައިންގައި ކުޅުނު ފުރަތަމަ މެޗުގައި ސަސް އަތުން ބަލިވިއެވެ. އެކަމަކު ދަ ގްރާންޑޭ އަތުން މޮޅުވިއެވެ.

ކޮލިފިކޭޝަން ފަހު މެޗުގައި އަންގާރަ ދުވަހުގެރޭ ވާދަކުރާނީ ސަސްއާއި ދަ ގްރާންޑޭއެވެ. މެޗު އެއްވަރުކޮށްލައިގެންވެސް ސަސްއަށް ފުރަތަމަ ޑިވިޝަންގައި ދެމިއޮވެވޭނެއެވެ.