ދިވެހި ލީގު ކޮލިފިކޭޝަންގައި މިއަދު ކްލަބް ޓީނޭޖް އަތުން ބުރު ސްޕޯރޓްސް ކްލަބް މޮޅުވާން ދަނިކޮށް ހިނގި ހަމަނުޖެހުންތަކާ ގުޅިގެން ހުއްޓާލަން ޖެހުނު މެޗުން ބުރު މޮޅުވީކަމަށް ކޮމިޓީން ނިންމުމުން އަންނަ ސީޒަންގެ ދިވެހި ޕްރިމިއަރ ލީގުގެ ޖާގަ ބުރު ސްޕޯރޓްސް ކްލަބަށް ޔަޤީންވެއްޖެއެވެ.

މެޗު ހުއްޓާލަން ޖެހުނީ 87 ވަނަ މިނިޓްގައި 3-1ން ބުރު ކުރީގައި ވަނިކޮށް ހިނގި ހަމަނުޖެހުންތަކާ ގުޅިގެންނެވެ. އެފްއޭއެމްއިން ޢާއްމުކުރި ބަޔާނުގައި ބުނެފައިވަނީ އެމައްސަލަ ފުޓްބޯލް އެސޯސިއޭޝަން އޮފް މޯލްޑިވްސްގެ އެމަޖެންސީ މުބާރާތުގެ ކޮމިޓީން ބެލުމަށްފަހު މެޗު ހުއްޓާލިއިރު އޮތް ނަތީޖާއަކީ މެޗުގެ ނަތީޖާކަމަށް ނިންމާފައިވާކަމަށެވެ. އެގޮތަށް ނިންމީ 2023 ޕްރިމިއަރ ލީގު ކޮލިފިކޭޝަން މުބާރާތް ކުޅޭ ގޮތުގެ ޤަވާއިދުގެ 10.3 ގައި ބަޔާންކުރާ ކަންކަމަށް ރިއާޔަތްކުރުމަށްފަހުކަމަށް ބަޔާނުގައި ބުނެފައިވެއެވެ.

އަންނަ ސީޒަންގެ ދިވެހި ލީގުގެ ފަހު ޖާގައަށް އަންގާރަ ދުވަހުގެރޭ ވާދަކުރަނީ ނިމިގެން ދިޔަ ސީޒަންގެ ދިވެހި ލީގުގައި ވާދަކުރި ސުޕަރ ޔުނައިޓެޑް ސްޕޯރޓްސް (ސަސް)އާއި ދަ ގްރާންޑޭއެވެ. މެޗު އެއްވަރުކޮށްލައިގެންވެސް ސަސްއަށް ފުރުޞަތު ލިބޭނެއެވެ.