ފަލަސްތީނުގައި ހަރަކާތްތެރިވާ އދ .ގެ މުވައްޒަފުންގެ ވިސާ އިސްރާއިލުން އައު ކޮށްނުދިން
އިސްރާއިލުން އެމީހުންގެ ލާއިންސާނީ އަމަލުތައް ފޮރުވަން އުޅޭ ކަމާއިމެދު ސުވާލު އުފެދޭ
މިޝޭލް ބަޗެލޭޓް
ފަލަސްތީނުގައި ދިރިއުޅެމުންދާ ރައްޔިތުންގެ އިންސާނީ ހައްގުތަކުގެ ކަންކަން ބަލަން އދ. އިން އެ ގައުމުގައި ހަރަކާތްތެރިވާ މުވައްޒަފުންގެ ވިސާ، އިސްރާއިލުން އައުކޮށްދީފައިނުވާކަމަށް އދ. ގެ ހައި ކޮމިޝަނަރ ފޮރ ހިއުމަން ރައިޓްސް މިޝޭލް ބަޗެލޭޓް ހާމަކުރައްވައިފިއެވެ.
މިކަމާއި ގުޅިގެން ދެއްވި ސްޓޭޓްމަންޓް އެއްގައި މިޝޭލް ވިދާޅުވީ އިސްރާއިލުގެ މި އަމަލުތަކުގެ ސަބަބުން ފަލަސްތީނުގެ އިންސާނީ ހައްގުތައް ކަށަވަރުކުރުމާއިމެދު ކަންބޮޑުވެލައްވާ ކަމަށެވެ. އަދި އިސްރާއިލުން އެމީހުންގެ ލާއިންސާނީ އަމަލުތައް ފޮރުވަން އުޅޭ ކަމާއިމެދު ސުވާލު އުފެދޭ ކަމަށްވެސް އޭނާ ވިދާޅުވިއެވެ.
މިޝޭލް ވިދާޅުވީ މެންޑޭޓުގެ ތެރެއިން ގާޒާގެ ހާލަތު ބަލަން މަސައްކަތް ކުރައްވާނެ ކަމަށެވެ. އަދި އިސްރާއިލުގެ އަތްދަށުގައިވާ ފަލަސްތީނުގެ ސަރަހައްދުތަކަށް ވަނުމުގެ ހުއްދައަށް އެދެމުންދާނެ ކަމަށް އޭނާ ވިދާޅުވިއެވެ.
އިންސާނީ ހައްގުތަކާ ޚިލާފް އެތައް ކަމެއް އިސްރާއިލުން ފަލަސްތީނުގައި ހިންގަމުންދާއިރު، އިސްރާއިލުން ގެންދަނީ އެގައުމުން ފަލަސްތީނުގެ ރައްޔިތުންނަށް ދޭ ހަމަލާތަކުގައި އެމީހުންނަށް ލިބޭ ޒަޚަމްތަކަށް ފަރުވާ ހޯދުމަށް ހުރަސް އަޅަމުންނެވެ. މިފަދަ ކަންކަމުގެ ސަބަބުން އެތައް ބަޔަކު ޝަހީދުވަމުންދާއިރު، އިސްރާއިލުން މަސައްކަތްކުރަނީ އެމީހުންގެ އެފަދަ ލާއިންސާނީ އަމަލުތައް ރިޕޯޓުކުރުމަށްވެސް ހުރަސް އަޅަމުންނެވެ.
