ވެއިޓިން ލިސްޓެއްގައި އޮތް ސިއްހީ ޚިދުމަތް

މަޑުމަޑުން ތަރައްގީވަމުންދާ މި ކުޑަ ކުޑަ ރާއްޖޭގައި އެއް ތަނެއްގައި ތިބެ ހޯދަން ބޭނުންވާ ހުރިހާ ޚިދުމަތެއް ހޯދަމަކީ އަދިވެސް ދަތި ކަމެކެވެ. ވަކިން ޚާއްސަކޮށް ބޭނުންވާ ހުރިހާ ޚިދުމަތެއް އަތޮޅުތެރެއިން ހޯދުން ދައްޗެވެ. ނުލިބޭ ޚިދުމަތެއް ހޯދުމަށް އަންނަންޖެހެނީ މާލެއަށެވެ. އެތައް ޚަރަދަކާއި، އެތައް ދަތުރެއް ކޮށް މާލެ އަންނަ ބައެއް މީހުންނަކީ ސިއްހީ ޚިދުމަތްތައް ހޯދުމަށް މާލެ އަންނަ މީހުންނެވެ. އެ ބައްޔަކަށް ޚާއްސަ ޑޮކްޓަރަކަށް ދައްކާނަމަ އަންނަންޖެހެނީ މާލެއަށެވެ. އަތޮޅުތެރެއިން ހެދެން ނެތް ޓެސްޓެއް ހަދަންޖެހިއްޖެނަމަ އަންނަންޖެހެނީ މާލެއަށެވެ.

އެހެންނަމަވެސް މިފަދަ ޚިދުމަތްތައް ހޯދުމަށް މާލެ އަންނަ މީހުންގެ ވަރަށް ބޮޑު ޝަކުވާއެއް އޮވެއެވެ. އެއީ ރަނގަޅު ޚިދުމަތެއް ހޯދަން މާލެ އައިސްވެސް އެތައް ދުވަހެއް ވަންދެން ޚިދުމަތް ލިބުން ލަސްވެފައި ތިިބެންޖެހުމުގެ ޝަކުވާއެވެ. ޑޮކްޓަރަކަށް އެޕޮއިންޓްމެންޓެއް ނުލިބި މީހާގެ ބަލި ހާލަތު އިތުރަށް ގޯސްވެގެންދާއިރު، ފަރުވާއެއް ނުލިބިފައި ތިބެންޖެހުމުގެ ޝަކުވާއެވެ. މިއީ މިއަދު ނޫނީ އިއްޔެއަކު ރައްޔިތުން ކުރަން ފެށި ޝަކުވާއެއް ނޫނެވެ. ހައްލެއް ނުލިބި ޒަމާންތަކަކަށް ދިގުދެމިގެންގޮސްފައިވާ ޝަކުވާއެކެވެ.

މާލެ ސަރަހައްދުގައި ގިނަ ކްލިނިކްތަކަކާއި، ހޮސްޕިޓާތައް ހުރިއިރުވެސް އެ ހުރިހާ ތަނެއްވެސް ފެނިގެންދަނީ ބާރުބޮޑު ތަންތަނުގެ ގޮތުގައެވެ. ސްޕެޝަލިސްޓަކަށް އެޕޮއިންޓްމެންޓެއް ހައްދަން ބޭނުންނަމަ ދިގު ވެއިޓިން ލިސްޓެއްގައި ޖެހެން ޖެހިދާނެކަމުގެ ބިރު އިންތިހާއަށް ބޮޑެވެ. ކްލިނިކަކުން ނުވަތަ ހޮސްޕިޓަލަކުން އެޕޮއިންޓްމެންޓެއް ހައްދަން މަސައްކަތްކުރިކަމުގައިވިޔަސް އެތައް ހަފްތާއެއް ވަންދެން މި ކިޔޫގައި މަޑުކުރަންޖެހެއެވެ.

ތަރައްގީ އަންނަމުންދާ މިންވަރަކުން ހޮސްޕިޓާތަކުގެ ޖާގަ އިތުރުކުރުމާއި، އިތުރު ވަސީލަތްތައް ގާއިމްކުރެވިގެންދާއިރު، ރާއްޖޭގެ މި ކުޑަ އާބާދީއަށް ފަސޭހައިން އަދި އަވަސް ސިއްހީ ޚިދުމަތެއް ލިބޭނެ ގޮތެއް ފަހިވެގެން ނުދަނީ ކީއްވެގެން ކަމާއިމެދު ރައްޔިތުން ސުވާލު އުފައްދައެވެ. އެފަދަ ޖާގަތަކަކީ މިފަދަ ކަންކަމަށް ހައްލު ހޯދުމަށް ބޭނުންކުރަންޖެހޭނެ ޖާގަތައް ކަމުގައި ރައްޔިތުން ގަބޫލުކުރެއެވެ.

ދެން އޮތީ ޑޮކްޓަރަށް ދައްކަން ގޮސް އެތައް ގަޑިއިރެއް ވަންދެން އެތަނުގައި ތިބެން ޖެހުމުން ރައްޔިތުން ކުރާ ޝަކުވާއެވެ. ބަލި މީހުން ބަލަން އިންނަ ޑޮކްޓަރު ކުއްލި ގޮތަކަށް އޮޕަރޭޝަންއަކަށް ވަންނަންޖެހުމުން ނުވަތަ އެނޫންވެސް ކަމެއް ދިމާވުމުން އެ ދިމާލަކަށް ދެއެވެ. އެއަށްފަހު އެ ޑޮކްޓަރަށް އެޕޮއިންޓްމެންޓް ހައްދައިގެން ހޮސްޕިތަލް އަށް ގޮސް ތިބި ބަލި މީހުން މުޅި ދުވަހު ހޮސްޕިޓަލުގައި ހޭދަކުރަންޖެހޭ ފަހަރުވެސް މަދެއް ނޫނެވެ. އެދުވަހުގެ ބާކީ އެޕޮއިންތްމަންޓް ތައް ކެންސަލް ކުރާ ފަހަރުތައްވެސް މަދެއްނޫނެވެ. މިހެން ދިމާވުމުން އަތޮޅުތެރެއިންނާއި، އެކި ތަންތަނުން ޚިދުމަތް ހޯދުމަށް އައިސް ތިބޭ މީހުންނަށް އޭގެ ގެއްލުން ވަރަށް ބޮޑަށް ދައްކައެވެ. ސިއްހީ ގޮތުން އޭނާގެ ހާލަތު އިތުރަށް ގޯސްވުމާއި، ޚަރަދުގެ ގޮތުން ބެލިޔަސް ލިބޭ ގެއްލުން ބޮޑެވެ.

މިއިން ކޮންމެ ކަމަކީވެސް އެއިރެއްގައި އޮތް ސަރުކާރަކުން ހައްލުކޮށްދޭންޖެހޭނެ ކަންކަން ކަމުގައި ރައްޔިތުން ގަބޫލުކުރެއެވެ. އަދި ކަމެއް ގޯސްކޮށް ދާނަމަ ރައްޔިތުން އިނގިލި ދިއްކުރާނީވެސް ސަރުކާރަށެވެ. މިފަދަ ކަންކަން ހިނގަނީ ރާއްޖޭގައި އުޅޭ ސްޕެޝަލިސްޓް ޑޮކްޓަރުން މަދުވުމުންބާއެވެ؟ ނޫނީ ވަސީލަތްތައް މަދުވުމުންބާއެވެ؟ ކޮންމެ ސަބަބަކާހުރެ މިކަންކަން ދިމާވިޔަސް ރައްޔިތުން އެދެނީ މިކަމަށް އަަވަސް ހައްލެކެވެ.