ދިރިއުޅުމުގެ ވައްޓަފާޅި އަށް ބަދަލު ގެނައުމަށް އިންވެސްޓްކުރުން މުހިންމު - ފައިސަލް
ސިއްހީ ދާއިރާ ކުރިއަރުވަން ވަރަށް ގިނަ މަސައްކަތްތައް ކުރިއަށް ގެންދަން ޖެހޭ ކަމަށް ފައިސަލް ވަނީ ވިދާޅުވެފަ
ނައިބު ރައީސް ފައިސަލް ނަސީމް
ދިރިއުޅުމުގެ ވައްޓަފާޅި އަށް ބަދަލު ގެނައުމަށް ކުރާ މަސައްކަތް ފުޅާކޮށް އެ ދާއިރާ އަށް އިންވެސްޓްކުރުން މުހިންމު ކަމަށް ނައިބު ރައީސް ފައިސަލް ނަސީމް ވިދާޅުވެއްޖެއެވެ.
ކާމިޔާބުކަމާއި އެކު ކާޑިއެކް ސަރޖަރީކުރުމަށް 5 އަހަރު ފާހަގަކުރުމަށް ބޭއްވި ރަސްމިއްޔާތުގައެވެ. ޤައުމަށް މިއަދާއި މާދަމާ ވެސް އެންމެ ފުޅާ ދާއިރާއެއްގައި ޚިދުމަތް ދިނުމަށް ރައްޔިތުން އެދިގެން ތިބި ދާއިރާ އަކީ ސިއްހީ ދާއިރާކަމަށް ފައިސަލް ވިދާޅުވިއެވެ. އެ ދާއިރާ އިން ދިމާވެދާނެ ކަންކަމަށް ތައްޔާރުވާން ޖެހޭ ކަމަށް ވެސް ފައިސަލް ވިދާޅުވިއެވެ. ހަމައެއާއި އެކު ދިރިއުޅުމުގެ ވައްޓަފާޅި އަށް ބަދަލު ގެނެސް އެކަމަށް ހޭލުންތެރިކަން އިތުރުކުރަން ޖެހޭ ކަމަށް ފައިސަލް ވަނީ ވިދާޅުވެފައެވެ.
ފައިސަލް ވަނީ ޚިދުމަތެއް އަލަށް ފެށުމަކީ އަބަދުވެސް ކުރިއެރުމެއް ކަމަށް ވިދާޅުވެފައެވެ. ސިއްހީ ދާއިރާ އަށް ވިސްނާއިރު މިހާތަނަށް ވެސް ގިނަ ކަންތައްތަކެއް ކުރެވިފައިވާ ކަމަށާއި އެކަންކަން ޝުކުރުވެރި ހިތަކާއި އެކު ބަލައިގަންނަން ޖެހޭ ކަމަށް ފައިސަލް ވިދާޅުވިއެވެ. އަދި ސިއްހީ ދާއިރާ މި ހިސާބަށް ގެނައުމުގައި ޕްރައިވެޓް ސެކްޓަރގެ ދައުރު ވަރަށް މުހިންމު ކަމަށް ފައިސަލް ވިދާޅުވިއެވެ.
ފައިސަލް ވިދާޅުވީ މި ސަރުކާރުން ވެސް އެއް ދާއިރާ އަކަށް އެންމެ ގިނަ ކަންކަން ކޮށްދެވިފައިވާނީ ސިއްހީ ދައިރާއަށް ކަމަށެވެ. އުތުރާއި ދެކުނުގައި، ރާއްޖޭގެ އަތޮޅުތަކުގެ ސިއްހީ ދާއިރާ ކުރިއަރުވަން މަސައްކަތް ކުރައްވާފައިވާނެކަމަށް ފައިސަލް ވިދާޅުވިއެވެ. އެގޮތުން ވަސީލަތްތައް އިތުރުކުރުމަށާއި، މީހުން ބިނާކުރުމަށް މަސައްކަތް ކޮށްފައިވާނެ ކަަމަށް ފައިސަލް ވިދާޅުވިއެވެ. އަދި އިޖުތިމާއީ ދާއިރާގެ ކަންކަން ބައްލަވަމުންދާ އިރު އެންމެ ހިތްދަތި ކަންކަން ތަޖުރިބާ ކުރެވެނީ ސިއްހީ ދާއިރާއިން ކަމަށް ފައިސަލް ވަނީ ވިދާޅުވެފައެވެ. އަދިވެސް ސިއްހީ ދާއިރާ ކުރިއަރުވަން ވަރަށް ގިނަ މަސައްކަތްތައް ކުރިއަށް ގެންދަން ޖެހޭ ކަމަށް ފައިސަލް ވަނީ ވިދާޅުވެފައެވެ.
