އިރާގުގެ ބާރުގަދަ ޝީއީ އިމާމް މުޤްޠަދާ އައްޞަދްރު ބަނޑުހައިހޫނުކަމުގެ ހަޅުތާލެއް ކުރަނީ

އިރާގުގެ ބާރުގަދަ ޝީއީ އިމާމް މުޤްޠަދާ އައްޞަދްރު ބަނޑުހައި ހޫނުކަމުގެ ހަޅުތާލެއް ކުރަން ފަށާފައިވާ ކަމަށް އެގައުމުގެ ދައުލަތުގެ މީޑިއާއިން ބުނެފިއެވެ.

އިރާގުގެ ދައުލަތުގެ މީޑިއާއި ހަވާލާދީ ބުނެފައިވަނީ އައްޞަދްރު ބަނޑުހައި ހޫނުކަމުގެ ހަޅުތާލު ކުރިއަށް ގެންދާނީ ހަމަނުޖެހުމާއި، ހަތިޔާރު ބޭނުންކުރުން ހުއްޓާލުމާ ހަމައަށް ކަމަށެވެ. ނަމަވެސް މިކަމާއި ގުޅިގެން އައްޞަދްރުގެ އޮފީހުން އަދި ރަސްމީ ބަހެއް ބުނެފައި ނުވެއެވެ.

ސިޔާސީ ކަންކަމުން ދުރުވާކަން އިއުލާން ކުރެއްވުމާއެކު، އިރާގުގައި ހިނގައިދިޔަ ހަމަނުޖެހުމުގެ ތެރެއިން 10 މީހަކު ވަނީ މަރުވެފައެވެ. ސިޔާސީ ކަންކަމުން ދުރުވާން ނިންމިކަން އިއުލާންކުރުމާއެކު އައްޞަދްރުއަށް ވަފާތެރި ފަރާތްތައް ވަނީ ހިތްހަމަނުޖެހުން ފާޅުކޮށް މަގުތަކަށް ނުކުމެ ސަރުކާރުގެ އިމާރާތަަކަށް ވަދެފައެވެ. އަދި އައްޞަދްރުއާއި އިދިކޮޅު ޝީއީ ގްރޫޕަކާއި ދެމެދު ހަމަނުޖެހުން ވެސް ވަނީ ހިނގާފައެވެ.

ދެ ގްރޫޕުގެ ދެމެދުގައި ހިނގައިދިޔަ ހަމަނުޖެހުމުގައި މެޝިން ގަން ބޭނުންކޮށްފައިވާ އިރު، ގްރީން ޒޯން ހިމެނޭ ސަރަހައްދުން އަލިފާން ފެނިފައިވާކަމަށް ރިޕޯޓްތައް ބުނެއެވެ. މިއީ އިރާގުގެ ވެރިރަށުގައި ފާއިތުވި އަހަރުތަކުގެ ތެރޭގައި ހިނގައިދިޔަ އެންމެ ބޮޑޫ ހަމަނުޖެހުން ކަމަށް މީޑިއާތަކުން ވަނީ ރިޕޯޓްކޮށްފައެވެ.

މިސަރަހައްދަކީ އިރާގުގެ މިނިސްޓްރީތަކާއި ބޭރުގެ މިޝަންތައް ހުންނަ ސަރަހައްދެވެ. މިސަރަހައްދުގައި މިހުރިހާ ދުވަހު އިށީންދެ ތިބެގެން މުޒާހަރާކުރަމުންދިޔަ ޞަދްރުގެ ސަޕޯޓަރުން ޞަދްރުގެ މިނިންމުމާއެކު ވަނީ ގްރީން ޒޯނުގައި ހުރި މައި ތަންތަނަށް ވަދެގަނެފައެވެ.

މިއާއެކު އިރާގުގެ ސަލާމަތީ ބާރުތަކުން ވަނީ ކާފިއު އިއުލާންކޮށް އެސަރަހައްދު ދޫކޮށް ދިޔުމަށް މުޒާހަރާކުރާ ފަރާތްތަކަށް އަންގާފައެވެ.